Longtorai khurio chikonthe kami twi mairang, o jila chikonsa hatung saka gairing khungsa, bera kichik michik, bua kakjak burasani uaying hai, nokhungbo kwpla oro uro, son swlaijakya sal kudukma. O gairingo sotirwng tei durbajoyni chikonthe nukhung, bwsa kwnwi, bwrwi bwsa monairwng bai chatirwng. Nogo tv, radio tongnani kokto emangnise, kanani, chumanani ri kaham jorako kwrwi, thutai kwrwi, telekar somsjak kobong busuk kwcham wngna bohroknw siya, kichik michik tali thepjak khenta, tei rwjai. Maimui songmani tuk, korai tei kaitham kaibwrwi piyang aswknw bohrokn nukhungni manwi khwnwi. Malmatani bising maknwi togla, tokma masa tei chkon mikon toksa mabwrwirok kaonw.
Horh pherangbo kwrwi, lama bo kwrwi, nwngmani twini sepbo kwrwi. Hor wngkhe khupi musungo, hatung tola bai kamini bumung bai twisa twi sikambuk, kokoi mokoi wngwi kochok langkha, twi thene, maising wngkhe twi rampralango, ajora twisani khaklabo haichingkhung sisao. O twisani twinonw nwnglaio bohrok bisi kurungwi.
Bwsajwk kwnwi rwngnogo swrwnglaio, o rwngnogo mastor phanw phaiya, rangriwi tei khroksa remba jor swrwngjak borokbai phwrwngrio tei tal paikhe bono kisa misa rang bagwi rio, soi mastor khe nogonw achuk tongo, bo i moyalniya tei kubuni kaminini, doli gana. Sotirwng songi bwsarok talithepjak richum kanwi chumwinw rwng nogo thahnglaio, rwng nogo mid day meal ni chahmung nwmgmung mano.
Sotirwng bai durbajoi emangnukmani balukha, khungsa nok kahamni bubagra wngnani. Sorkarni nukhungni simi bwini kamio bigra khangra rokno nok rimani bo baithangni mokol bai nukkha. Durbajoi songni kamiobo khoroksa khoroknwi manmani tongo. Durbajoi rommanya tani bini talikao ba nokni manthai kwrwikha. Mailuma ba tani bini bagwi mwnwilangliya.
Bohrokni kami ADC o khopjag, village council tongo, tokhirai wngkha aboni member, durbajoi bai kahamkhenw sinilaio. O membarnw bono saphaio sorkarni nukhungi simi bigrarokno nok rijago. Bo durbajoino khungsa nok yapharna bagwi sak tarnai. O kok khwnawi khajawi durbajoi bisiknwi bisiktham swkang bini togla kotorma tongmani ratharwi bono naruai ringwi chahrikha. Durbajoi bai sotirwng naisinglaio, bohrokni naisingmani paimari buphuru sokphainai. Phiya bisi kwtal sokphai phano o naisingmanw naisingma.
Hatio, lamao tokhirai bai malaikhe bo uaririk khe mwnwio, kuai tei jorda mang sapung chaho, boroniba aswk rang man. Yasi buchuk simi chuntwi kakya, buarokbo chaksa baikha.
Durbajoi bono sao: Ata ang buphuru khorok saka nokhung kaham thepawi mansinai.
Tokhirai bukhugo kuai sorawi chuntwi swlak twtwi sao: Wnganw, wnganw tei kisa bwkha lokdi, samung kahamni bagwi, manwi kahamni bagwi kisa bwkha ma logo phayung, list kolokma nida, uko tabuk u jamilwngni sukuram manani wngkha, nini mungbo riajk, nwngbo manainw, tei kisa bwkha lokdi. Hindi biri nwngndi. Tokhirai bono bini juna simi biri kongsa kairingwi yapharo. Durbajoi bo o biri kongsabai bandijagwi bini kok siminw khwnawi ma tongo tini….khwna … aboni tei paimari kwrwi.
Horo maitwi chahlaiwi thutaio rokotwtwi bihik bwsai kok salaio.
Sotirwng sao: O chatirwngpha chwng o nok kwtal mankhe bwswk kahma wngnai na, dalan nok tinni nokhung. Uatwi pamtwi sina nangwlak, berakichik maisingo kwchangna nangwlak.
Durbajoi sao: Au kululu nok, chwng khorokbrwi.
Sotirwng sao: Chwngto aphuru gairingo tongna nangwlak.
Durbajoi sao: Gairingo de dalan nok tangwiman, tolanw tonglainai. U chini membar sao list kolokmaphwng chini bari sokphaite kisa lernai phwng.
Bwsajwk kwnwibo sao: Baba chwng buphuru nok kwtal manai.
Durbjoi bwsajwk kwnwini khorokno mihimwi khasogwi sao: Mananw, chwng aphuru o togla kotorno ratharwi nok kwtalo hablainai.
Naite naite bisiba kakha, village councilni omorbo bisibanw, bisiba laikhe tei kwtal khe ma batailaio chongmario, kwplai wngkhe member, chairman chongjago.
Chatirwng bwsaino sao: Tabuk bisiba kakha bwla, u da tokhirai teisa chongmario ani mario tokdi hinwi saphinai.
Durbajoi khorok sukuiriwi sao: Au chwngto togwinw ma thahngnai, swkangbo tokkha, tabukbo togo, ulobo ma toknai, chini talikio khe abonw swijak. Da tokhirai kwrwi hinkhe tei khoroksa sokphainai.
Sotirwng sao: Bonoyakhe bonoto ma toknainw, phiya chini bera kichik, nokhung kwplao tei sal bwswk ma tongnai. Mwtaiba chini talikao nok kaham khungsa jorako swiwi rohroliyade.
Durbajoi sao: Siya da tokhirai ba chwngbai tani aswk thwngkha, chini kami khamani jangirai chini silai bwswk gwnang bokhe nok mankha, chwngkhe nabo naharjakya uphilwi khoroksabaibo.
Soti rwng sao: Jangirainiba punk, uak tongo, chenchuani buma ano sao jangirai da tokhiraino naurai ringwi chuak arak totogra jora khankha hinw, punjuabo masa rathar chahrikha. Chini ba tamo tong.? U nokhung kwplawi tal tei athukirino naitwtwinw chwng mukum langnai, nok kwtal khe tei mangwlak.
Durbajoi hama kolok yakaro, tamoba bo tei sasinai, sak baithang bo chukya nok kwtal tisanani, bohok thaihbwwi supungnanise hara khura, nok tangnani to emangni kokse. Bwikhe bini silai chuknairok sorkarni nukhungni simi nok kwtal tangwi rijago bo khe mungsa boya.
Village councilni chongmari sampasukkha. Tokhirai song muktwrwi swrangbaikha, pailaiya hailaiya khe eyang uyang laisow, borokbai kok salaio, meeting khwlailaio, kok sao. Chahnani nwngnani jorako sep kwrwi.
Tokhirai jora khwlai durbajoi songni gairingo sokphaio. Durbajoi tei bihik kwnwinw nogo, bwsarok rwngnogo thahngbaikha.
Tokhiraino khamplai bowi rio, sotirwng bini kwbai kichik kuai batra kairingwi kuai phatwi yapharo.
Tokhirai bera kichik tei nokhung kwplabai kisa mokol kaio.
Bo sao: Durbajoi taklaile ang kwplai wngkhe jotoni swkang nono nok khungsa tisawi rinai.
Kothok kupruma hai kupruwi durbajoi sao: Ata abotwi wngkheto belai kaham wngnai. Nwng yakhe tei khoroksabo chwngno nok yaphar mangwlak.
Tokhirai yasi buchukni chuntwi swlaktwtwi sao: Ang kok rikha, list kolokma sikade, tei kisani bagwi nini mung keplekha. Ta uanadi i khepo toktwi mario ano tokdi , jesa khe phano ano kwplai khwlaidi, ang taklai chairmanbo mwchawi mano. Norokni nogo sokphaithani bwswk dora dukhu, lama kwrwi u kamini lama kotorbai kurungriwi chikonthe lama swnam rinai nini nok jora, nok gana kol kongsa kairinai, tei khitai nokbo tangwi rinai khungsa.
Sotirwng phaiwi bini yakung romwi khulumo, sao: Nwng mwtaise ata, chwngno kisa khairok jadi.
Durbajoi sao: Ta uanadi ata nini toktwi marino ani bwkhao rigwi tonikha, bwi jeswk phano muani riphaithung nononw toknai. Ata chwngno nok khungsa siminw ridi.
Tokhirai sao: Aha ani khukni simi kokde ongkhorkha. Ang uaisa kokrikhe tei o kok hao kwlaiya. Abo wngnainw, norok ano siminw kwplai khwlaidi.
Bihik bwsai baksa sao: Ata chini but nini bagwinw khatijak. Ta uanadi.
Tokhirai bohrokno hambai yapharwi bini lama lamrio, teisa salango taklaibo kwplai wngkhe khwmakha bohrokno nok kwtal khungsa yapharnainw.
Sotirwng sao: O chatirwng pha, ani bwkha sao taklai ata tokhirai kwplai wngkhe chwng nok mananinw.
Durbajoi sao: Au angbo abotwinw ma tongo. Bihik bwsai nok kwtalni metreng matrang bumul tagwi emang nuklaio.
Chongmari sokphaikha, phung aisirisi durbajoi bai sotirwng lineo bwchawi jotoni swkang tokhiraini bagwi khatijak mari toktwio togwi phaio. Chongmario tokhirai jotoni kwbang vote manwi kwplai wngo. Bo uak rwtharwi kamini borok rokno boirati ringwi chahrio ok supungwi; durbajoi, sotirwngsongbo karjakya.
Sotirwng sao: Taklaile ata tokhirai jotoni swkang chwngno nok kwtal yapharnai, ani bwkha sao.
Durbajoi sao: Bo taklai chairman bo manphano mano.
Sotirwng sao: Ata chwngno taklai kubuichacha nok yapharkhe bono togla maknwi ratharwi betha khe chahrinai.
Tokhirai muchungmatwi chairman manliya phiya yakchu vice chairman ni khamplaile mankha. Tabuk bini phanbo bangkha. Bini kok samungbo swlaikha, swkangbo bini nok kwbai kichik tongmani tabuk dalan nok tisakha, bwsarokno English medium rwng nogo rohorkha, bini nok jora lama kaham swnam jakkha, kainwi kaitham kotor koror rabar bagan swnamkha. Kanthani chumthani bo tabuk morok richumrok. Tabuk bini kuai phatwio tamobo bahai motom sapulwi chaho.
Bisiknwi kakha tokhirai hainw hai chongmario kwplai wngwi vice chairman wngmani. Phiya durbajoi songkhe o kwbai kichik bera tei nokhung kwpla nogonw kwlai tongo, bini talikani simi talthwison hor tei kakya. Tokhiraini nogo laisote laisote bini yaklap chamwi belep wnglangkha.
Bono nukhenw tokhirai jorda kosnangjak kwchak kwchak bua uairik khe mwnwio tei sao: Kisa bwkha lokdi durbajoi, tei lerliya, uko sakani simi rang sokphaiya wng tongkha.
Durbajoini bwkha bainani chengkha, bini bwkhao thamsi sisawi phairwrwk tokhiraini saka. Bini mokol bwskango kwnwi kwthamno nok manbaimani bo nukkha. Bohrok bini ulo nokni bagwi dorkhasto rinai rok. Bwini khugo khwnao bohrok bono uak pun rather chahrikha, chuak arak tei bilatibo tibi khankha, kisa misa rangbo yapharkha. Binile tamo tong, bohok supungnase kok tugo bini bagwi. Bini uak pungbo kwrwi.
Durbajoin bihik sotirwng sao: O chatirwngpha chini talika hangar bai takjak, ata tei chwngno naharliya, i maisingo chwng kwbai kichik twiwinw ma tongnani. Siya chwngno ata ba tani naharliya kisamang jodi jolijak eba naiselejago.
Durbajoi sao: Tani chwngno jolijaknani, mwtang ang bobai uade ualaikhaba, malaikhe ata ata hinwi ringwi bwswk borom rio.
Bisiknwi laiwi teibo talsni laio, tini khwnani tei paimari sokphailiya, durbajoini bihik sotirwng bwkha baijago, durbjoibo. Bohrok romwi mano uak pun mwchahyasak ata tokhirai bohrokni bukhugo mwnwima kiyokrigwlak kha. Phiya boroni uak, pun luajinai. Bwsa bwtwini richum ma paio, kolom, khata ako ma paio tei bohokto tongonw. Masa maknwi tok tongmani phalwi kisa rang ajimani nukhungni samungonw swbai jakbaio. Hinphano ata tokhiraini bagwi maknwi togla kotorma khati tonikha nok mankhe boirati ringwi chahrina bagwi mai phaitsa phano togla maknwino ratharwi.
Sotirwng soikhenw sawi mankha bohrok tei nok manliya, bo smai tongo vice chairman ata tokhiraino lachimung rinani. Bohrok bigra wngwi mano aswk borom kwrwile wngya. Bohroknibo borom tongo. Bisiburumnw bo samatwi bono chongmario vote togwi kwplai swnamkha. Phiya ata tokhirai bini kokno narukliya, phiklai tini khwna hinwi kara thwngwi tongkha.
Bo salsa bwsaino sao: O chatirwngpha thahngla ata tokhiraino naurai ringdi, chini nogo mai chahphaidi hindi phatisa phano, togla masa kotor ratharwi chahrinw.
Durbajoi sao: Abo tamo sa nwng chatirwngni buma, bo chwngno nok kwtalse riyakho, tei o toglabai bini bwkha mide misijakno, eba bohok pungno, uak yakhe punjua nangnai teibo tamo nango mwtai se sisio.
Sotirwng bwsaino sao: Nwng mungsa uansukna nangya, joto ano yaphardi angnw khwlainw, chwngbai aswk khar khar thwngmani, chwngno musuk swnmawi haichingkhungo twi rutuk rimani, bohbo sina nango chini dukhuno.
Durbajoi romwi mano bihik mungsaswk phoil chabkha, ata tokhiraino laichimung rina bagwi. Bihikno bo sinio, uaisa jolikhe bini khorogo hoki mang chwngwi tongo tei phatsa khe changsaya.
Durbajoy bihik bai phwrwngjaktwi tokhiraini nogo thahngwi pwila botok wngwi khulumo.
Tokhriai tongmang chahamng khulumjagwi kisa thoto moto chao, boto tabukbo sorkarni nukhungni nok kwtal bedokyakho durbajoi songno. Tani ba khulumma kwlaikha. Bo kisa uanajago.
Durbajoi sao: Ata chini nogo phaitsa mai chahphaidi, nuaijwk salkudukma mami maini chuak butuk nono khanani hinwi bwkha chongmani, ekhepo bo chuak butuk nini bagwi tiyar khwlaikha, tei nini bagwi khatimani tohglabo kuphung kotorma wngwi tongkha ata, ulo siyal rogde bwkhar twlangno, nuaijwk nono naruai ringdi hinmani balukkha, khwna sokphaisidi ata jesakhe phano nwphayugni nogo.
Tokhriai sao: Durba norokni nok mananw, ang uaisa kokrikhe kok narukya wngya, ang pokyakho, tei kisa bwkha lokdi, do ang khwna sokphainw. Hindi khuai khopsa chahdi. Tokhirai bono bini ruphain kuai batra simi kuai yapharo, ojil tamobo bahai motom sapuljak, jib jib wng tongkha. Bukhugo dawi jude haikhenw thokjago durbajoi.
Nogo sokphaikhe sotirwng bwsaino swhngo: Ata phaina de gosikha.
Durbajoi yachago: Au, phiya nwng kubuichacha de bon chahna tei khana muchungjak.
Sotirwng sao: Nwng naisiminw tongdi tei ang sama twi khwlaidi, bobai tei thwngjakliya, chwng bigra wngmano phiya bikha binaiya bo sithung. Chwngbo borok, malmataya, chinibo borom tongo. Bo chwng tei nok riliya uak, pun tei rang mwchaya hinkhe, chwng boroni simi rinani. Nok kwbai kichigonw tongsinai. Ulo je wngmani wnganw.
Diborni swkang drobonw tokhirai sokphaio, kutai kanwi, dangbai phaiwi, khorogo thok motom, bangrao jua khachijak, jotophuru bini logi juna tongo, juna bisingo tongo ruphaini kuai phatwi supungjak batra.
Durbajoi song bono khasogwi noksingo achuk rio. Sotirwngbo bono khulumo yakung romwi.
Sotirwng sao: Ata nwng phaima bai belai khajakha, nwng chini bagwi bwswk uansuk tongo, khaprum bibrum khwlai tongo, nok tabukbo manya phano chwngno manrinani bagwi saktarwi tongo. Sal kudukma swkang uasuk tongmani nono salsa nogo ringwi ani yak bai boksajak chuak butuk khanani tei tok ratharwi mai phatisa phano chahrinani.
Tokhirai nugo gairing bising hani Thapa saka baka, baka tuktnwi tuktham chuak butuk, chuak bahai bai nok motom tongkha. Bahai manmangnw bwslaio khuktwi phaijago tokhirai. Mamini chuak butukto mamwngya balukkha. Tinike jut khenw bohok, bwkha supungwi ma nwngnai.
Sotirwng sao: Chuak nwngi ata, asani ang tok rwtharwi muirok boksawi rianw, nogo hoku wnganw, ang tolanw maimui songsinai. Nwphayung nogo logi rianw.
Tokhirai khorok sukuriwi sao: Do kok kwrwi monai. Nini samung nwng khwlaidi tini tani dophra kaphra kwrwi.
Sotirwng gairingni ongkhorwi tola thahngo, tolao kululu gairing tangwi o jila tokrokno narugo. Tokhirai tok rwtharmani kaiyok kaiyaok khorang khwnao. Toglanw wngnai abo, durbajoi songi nogo boro boro sophaikhe togla kotorma mokolo kwlaio. Bini bagwinw khati tonio hinwi durbajoi bo sawi khwnarikha.
Durbjoi sao: Ata tok yathek, bwkha busukwi yogwi chahlainw chuak bai baksa.
Tokhirai khajawi sao: Do, do kok kwrwi.
Tok ni kayok kayok khwnama ulo mojomot jora laikha, hinphano tok yathek bsukui bwkha yokjakrok sokphaiya, tokhtrai unsugo mui bai baksanw mwchanw hinwi, durbajoini bihik yakna pokjakkhwna.
Dam nwi kakha tola ongkhormani satirwng, eyang tokhirai mai okhwijakkha, bohogo bubuk keku khe pungnani chengkha. Tabuk le tei lergwlak, mai mui munkhana, uansugo tokhirai.
Sotirwng sokphaio, bo sao: Ata mai mui munbaikha, tei swrapsa naisingdi. Ang nono mairang rok bokgrana. Kutung kutng mai bogwi chahri phainw.
Soti rwng mairang suwi bogwi riphaio, twi nwngna bagwi gelas bo thaihsa riphai twi supungwi.
Mai mui tibithani chubadi hiwni bwsaino logi nawi tolao ongkhoro sotirwng. Durbajoi songi bwsarokbo rwng nogo thahnglaijak. Maikhwlai bukcha bwskango nawi tokhriai achuk tongo.
Phiya o je tola ongkhormani, durbajoi bai sotirwng tei sose sokphailiya. Tokhirai khakchu bukchu wngo, tamoba wngma kwlaikhele,uanama kotoro kwlaijago, abotwi maikhwlai bukcha bwskang toni achuk tonirimaba lachima singsa.
Tokhriai tamo khwlaina pal manya, bwcha nanide eba naisingsinai soi khwlai manya. Aboba bobotwi tongmung wngkha.
Hinkhebo bo bwkha logwi tongo. Teibo swrapsa ulklogo durbajoi bai satirwng sokphaio. Phiya kwnwininw yak bukcha.
Tokhiari mokol pelulum khe naiwi tongo bohrok kwnwino. Abo bobotwi bisigra thwngma kwlaikha.
Sotirwng nokhani kwlaima haikhe sao: Hai ata nwng mai chahbaiyakhode tamo abukbo achukjak, uko nukao twi tongo yak sudi.
Tokhirai mwkhang torsjaksugo, bo tabuk saimano bono kusu swnamna bagwinw bono naruai ringwi tibikha..
Bini mwkhang chaksasugo, sakur kuphurba abo khom khom khe sijak tongkha.
Sotirwng sao: Ata togla bahan thode thokkha, nini bagwi khati tonimani. Ata wng bukhuk bai chwngno uai bwswk nok kwtal yapharkha, chwngba tabuk kaham khe o nogo tonglaio, nonobo kokbainw toglabai mai chahri rikhata ata. Nogo thahngwi bachwino sadi nuaijwk nono togla ratharwi mui songwi chahrimani bwswk thokhkha.
Tokhirai tei kok pungya, mukhang kosom khe khrok bomwi jaijor twikhe durbajoi songni gairingni simi phataro ongkhor.
Satirwng hi hi khe mwnwio gairingo tongtwtwi. Bo tini bwkhao belaikhe khajama tei tongthokma mangkha. Sotirwng kha bising bising kokchabwi twiphang tokhiraino naruai ringkha, mukthango bo tok romwi kisa kaiyok kaiyok khe pungri yakar rikha. Bohrokbai ata tokhirai sal kudukma thwngkha, nok chikonsani emang nukmani bo bai bwsai. Sorkarni nukhungni nok, bwibo mantogo, bigrarok, nok huk kahamni bubagra wngmanya roknw o sep mano. Tini khwna hinwi bisibani silai teibo kwbang sal lairikha, e khepo bo abotwinw abotwi. Bigra wngphano bohroknini borom hinwi mungsa manwi tongo, thwngjaknai manwiya. Tini tokhiraino bini tongmungbainw bono yagul suwiriwimanma bai bwkhao belai kha changma mankha. Nok manthung manyathung, bohroknibo borom tongo, bohrokbo borok abo phunukriwi mankha.
