-Digra riwi phaikha, asta kok khwnaya, khali bolongomang thahngnani naio. Bai nono kaisako swhngkhata?
-Tamo kok.?
Kwkhrang uaisa hokiani bai naharo, je kokno bo bibino sana hinwi naimani bo muchungjakya bibino karwi bwi khoroksaswk khwnathung. Bini bwkhani kokno sanani muchungmani tungphlamabai kwkhrangni naithok kosom mokol kolnwi chwngsao, bo bibino dukbuduk hai kwbagwi romwi khunjuo serek serek bini kok kotonno sao.
Buphyungni kok khwnawi achomsa chamung bai chikontini mokol torsao, Bo abotwi kok hwnauanw hinwi kisamang uansukmaniya, emango boya. Buphyung sakha bo rwngnogo swrwngna muchungjago.
Rwngnokno twiwi chikonti kisamang siya; tamo abo, tamo wng a jila, rwng nogo thahngkaiba tamo wng ako ako. Bohrokni kamio rwng nok kwrwi, gana gini moyalo boya, uyang hakchal kamio je jila phung aidrop yapri cheng khe soite soite dibor khegoi thanhgo, ajila rwngnok khungsa tongo hwnwi khwnakha.
Bo kamini phataro kwbang thahngmani kwrwi, beraimani bo bangthaya; nok huk, gati bwphayung; nokni tok pun, uak, tei mare aborokno twiwinw bo kulugwi tongo.Hatio boro buro se thahngo , kamini dormoni dada da onkorai hati khwlai riphaio, bini mui kwthwng, nalia, uak, pun ako phalwi chubao, abotwi poder pod samungo da ongkoraino manwi tongo.
Muitu no kopromwi uaisa rwngnok nukmani kokno muitu mano bo. A phurru bo cherai bwsate kha sidrop, bohrokni kamini simi khensani hakchalo cherungma mung bai khwugsa hati kotoro maising jora mela nainani hinwi mare hokia, hokia ni dada sengkari ako khe thanglaipuhru cherungmani rwngnok mokolo kwlaimani tongo.Bo achomsa chawwi nugo pale pal naithok naithok okra cheraiw, bwrwi, chwla pahnw kaisa palini richum kanwi chumwi rwngnokni khakhrang jabra phinjak thwngkhungo thwnglai tonglaio. Bo da sengkarino swhngphuru bo tamo tamo bo sao jeno bo kisamang romwi manmani kwrwi.
-Bai nwng tamo ano swrwng riyade? Kwkharang tabuk khorang kotor khe swhngo.
-Tamo swrwng rinani?
-Nwng pora bujiyada?
-Nwng khe bahai bwjikha le?
-Poren, porenni thanini simi khwnao.
-Sabo poren?chikonti sini manya.
-Me! Poren nwng siniyada, uko para khamani da somenni bwphayung.
Chikonti tabuk sinimano, ayung dhonarai ni bwsala kusu . Bini muitu wngw bono bo sal kwbang romoinw nukya, sal swkang rogo kwkhrang bai bayap; khar khar thwnglaio, seng nawi raja, senapati thwnglaio, twisao twkwlaio, matham thwnglaio.Kwbwinw bonobo nukya balukkha , baithangno bo achomsa chajago, bwphyung a poren mwngni cherai bai yar hai, aswk sal romwi bo kwrwi oyang bai bini kisamang bwkha kwrwi. Bwphyungno bo swhngwi jorako nailiya, bwphayung bo bwswk hamjak; baithangni pholani silaibo.
-Porenni tamo wngba?tamoba saka bo nono?
-Bo rwng nogo borti wngkha bai.
-Borti tamo? Bibi rommanya.
-Bai borti nwng siya! Rwng nogo habkhata; bini rwng nok kaham paithak hpno; mastor phaiwi pora phwrwng phaio hino, tei bini bijap rok bwswk naithok bai, tok, takhum, mwsah mayung, chibu , sindrai ,uak ako akoni mangpili rikjak; lekhamanibo rwmg nogo thangkhe gila rwngo sio bai .Phiya kok tongo khoroksa khoroknwi khorok kutung mastor tongphong pora manya hinkhe paijon bai buo, khunju molio.
-Is phanbaide bu ? bibi uanajago.
-Matang pora manya kheba bunainw. Bai side si? Chini kamini saka bai khungsa rwng nok tisajaknai .
Chikonti bwphayungni kokno kha riwi khwnao, je kokrok bo khwnaya, siya, rwngya bwphayungni khwgo khwnawi tongthokma mano bo jaichari, kisa bobo bolaio kha bising bising. Phiyaa phataro phunukya mare tamo kha kano uansugwi.
Hokia chikontini bwphayungni kokno kisa khwnao kisa khwnaya. Rwngnok chengnani naimani kokno bo sio. Mareno siya nugwi bo kisa achomsa chao.
– Nwng siade mare?bo swhngo.
– Tamo sinani ?
– Chini kamio rwngnok chengnani naimani.
– Kwbwide? Bwko anoto khoroksaswk bo sanai kwrwi.
– Nwngba nogomang achuk tongo, bwkhai…kok pairisukyawi thago hokia, aboni bara swkang khe mareni hwijak kwsao som phulmani hai wngnai. Phiya je wngnani tongmani wngthahngkha, chikonti ni mwkhang somsao. Sarapsa siring siring wng tongo.
– Bai ang yongsima romnani thahngo, hinwi kwkhrang huk sakatwi salhap bai khaprum thahngo.
– Hakchalo thahngjakna dang, chikonti chirigwi sahoro.
– Au bai, kwkhrang yachago.
– O mare, haba pailaigana, hoikiano sao chikonti.
– Au mare tei kisani bagwi haba dakti pairekhenw chanai, hokia sao.
Hapung thahisa bohrok jabra saiwi paiwi tei thahisa hapungo yak rikha, jeswk tangjaknani kok aswk jora soiwi koldong hai khe uah bowi rikha, aswk joranw tinini habani bari; bojak uah joratwi jabra saiwi paikhe haba kasanai bohrok. Satung kutung bai phikung tei bokhorok khamprow.
Hokia mokolni kunatwi khe mareni mwkhang no naio, tabukbo chwmwi kosomni mari.
-u: satungni satung, thapla satung taniba aswk tungkha, sochwi hohr; hokia nokha bai mwkhang tisawi pungo; chikonti rommano kisa swkang sajakmani kokni simi phernani bagwi mareni phoil.
Chiokonti kusta kok pungya.
Hokia chikonsa langma yakarwi sao:Agini sal hinkhe sakam borok phano wnthung, mwtai phano wnthung, chibuk phano wnthung je ani bagwi i jila tabuk gairing khungsa tangwi rinai bononw ang ani khapang yapharkhamw.
– Nini dongoi da gogon tangwi rikhe chakhmw, phyia nini dongoi nw biyangbo kwmakha.Chikonti mwnwiwi sao.
– Nukkhade teisa bini kok, mare ang tei bini mung jorako khwnani gosiliya, hokia thamsi kajago.
– Abo nini bwkhani kok deba?
– Twndi a kokrok, o, nono rwngnokni kok sagana mare, nwng siyakho, para khama bai da somor songni nok rwkwngo bwrwiphang tongyada oyang bainw lamani debrao; hani deual tinni nokhung; talni siminw chengjaknai, khoroksa mastorbo tongnai, mare sidesi a mastor chini nogo phaiwi thangkha, bumung kajol na tamobo, sak kuphur,
kuchuk kotorma, khwnai kokoi kokoi, chwla naithok. Paithago chwla naithok kogo bo kisa phan lwkhlaioi sao, jeni bagwi chikonti kisa kha khep khep wngjago. Je jila da gogonno khatang jagwi bwkha mogwi tongjak, a jila bwkhai khe boronibo tei kubuni kamini kahamkhe siniya kustaya chwlano chwla naithok hwnwi phan riwi sawi man.
Masa somlele chikonsa tok khukchwi bo somlele, khaklap phutlala biyangni birwi phaiwi samni phangsa swswk huk kwcharo songdari khuri o baphaiwi pungphaio: kok sadi bachwi !kok sadi bachwi! Tokni bumung kok sadi bachwi. Chikonti tei hokia kwnwinw baksa hi hi khe mwnwilaio. A tok lachijakkhana, pungma mwthak rio mare kwnwini mwnwima khwnawi.
-Do mare rwchabnaba kisa khwnanani muchungkha.Nini rwchabmung bwswk sal wngkha khwnaya. Hokia koio.
-Bo rwchabmung mare ? Nono twiwi tei pailailiya.
– Mare rwchabdi, rwchabya hinkhe ani bwkha koinai.
– Masema rwchabnai hinkhe muitu khwlaigana bobono rwchabnani.
Chikonti bini khwnathok twilwlw khorang bai rwchabnani chengo .
Rangchakba tabukni jora rogo
Boisak mai kaikha joista huk tangkha
Mai swkang paikha pakla tangkha
Harwng mogodam bubar barbaikha
Bari khakulu boslok rikha
Hukni thaichumu boslok wngkha….
Dibor khekdrop; nokha pimol kuar thakmari kwrwi, chwmwi kwrwi, langmaku bubarni bahai rujuwi sipsawi tongo bolong tei hapungni boyar, sipsatwtwi rotomdrop bwlai kwkhrang bwphang buchukno khasogwi motom swlango ninang riwi; khamani nokhao sikru kuchuk mwrwi mwrwi nokha sakha birlaio kitinglaiwi tei biyangbaibo hakchalo toilingching pungo khaching khaching khorangbai; kha khamjakmabai swplajak pholani hama kolokma hainw a pungma; samni hapungo tokthu khwichang pungo khwnathok chang chang khorang bai. Tola bai musukma gai bwsa no ringo hamba! hamba!.Abotwi tongthok jorao chikontini rwchabmung thakmari kwrwi kuthuk khorangni muanini senal swngo; I rwchabmung bolong, huk, haping bebak bai thansa wngwi sapuljago. Rwchabmung ni bising sisao kaisa kuthuk tei kwbung uansukmung. Hakchal hakchal o chikontini rwchabmung tei khorang jotono muani phwnangwi nokbar bai baksa pirjago.
Rwchabnaijwk jehai kwmao rwchabthani abotwinw khwnanaibo kwmao khwnamani bising.
-E hu! hu! hu! hakchalo borok khorowa chwla khorangbai chirikhok horo.A jora rwchabmung bo paikha.
-Bo mwkhra abo? hokia swhngo.
-Ang bwkhai sanai.
-Naigana nudenuk, hokia hukni jotoni silai kuchuk hatanio bwchawi talika saka yapha kokoi khe bogwi yacheremwi eyang uyang naharo. Borok khorosabo mokolo kwlaiya, belai hakchalono wngna o borok. Chikonti kiphilwi phaio.
Salhapbai nokhao swnarwi tongnai pimol hachuk buchukni simi muktham mukbrwi sakao sal tongthani bohrok haba paio.Sal dalak hai khe torsawi yak kwchak hai khe chaksawi tongkha, oyang bai nokhani bwsago pali kwchakni thwngma; pimol nokhao twilwlw satungni kormolwlw mwnakjak pohor mungsa naithokmani bumul phuarwi tonio. Salni gana gani khasa khaknwi phwdwdw chwmwi nukjago, satung rangchak yachagwi aborok chibuk mailam wngbaio.
Damra, chekhra, nokhai, piyang, luta pah manwi khwnwi nawi bwchalaio bohrok kami bai lam rinani bagwi.
-Mandar khitung kolok kede gudum, mandar khitung kolok kede gudum hinwi chiri khoktwi kwkhrang musuk bengwi talango, bangrao khuti dukhwi ako baljak.
-Bai ang thahngkha , norok phaisukdi, bai ang thahngka bai….hakchalo soiwi bo sahoro.
Dolsa atuka tei toksi ke ke ke khe cheklek laitwi birwi thahnglaio. Piyara, tentwrwi rokbo. Hakchal nokhao bwphang sakatwi berem berem khum hai machangwi biroi thahnglaio boga bodol bwkrango satung rangchak rujuwi.
Chikonti himtwi himtwi rwngnok tei bwphayung samani kokno uansugo.Bini bwkha tini khajama bai kupulum. Kwbwinw tinini sal jaichari kaham jaichari kaham ani bagwi. Kha bising bising sao bo.
