Message
(Kothoma bwsa)
-Bhuban Mohan Jamatia
Dated:- 05-05-2026
Daikong wngkha khoroksa Sub Inspector. Bo belaikhe maya gwnang tei kwsrang. Tei boni khwlaithai no kahamkhe mokol kaio. Haini bagwi boni boss bono belaikhe hamjago. Salsa tungsep (cha) nunglaiphuru boni boss bono sakha- Bg. Daikong; nwng hai borokno manwi ang belaikhe kwpal kaham hwnwi. Bo bw sakha – Sir, ahaiya nwng gana tongkhe ang mungsa bw wanaya hwnwi. Haile nokha bisibrwi-bisiba joratwi boni nok nukhung kaham nw wngwi tongmani. Atomsa boni sak kisa deramani bagwi sal kisa romwi nukhungo belai urumuru nangwi tongkha, phiya bo o kokno kebono saliya. Kwbwino, Daikong salsa sanja jorao duty ni kiphilwi tukuk-musui lenglai tongphuru atomsa siniya number bai call khaiwi bono sakha- nini tongmungno viral khaina thangwi tongw aswkkhe nini mwkhang to khamsinai nw tei aboni logio sebuk bw kwmasinai buchikha de hwnwi. Obohaikhe sikrijakma ulo bo thumaya chamaya khwlai belai wanajakkha. Bono sabo mohaikhe call khaikha mungsa buchwi manjakliya. Haile, bo bw khoroksa sikli bai message tunlaima tongw haiphano viral wngjakna kirwi khuk khengliya khao nw chobwi tongkha. Bo o jwngjal ni yokna mungsa lama manjakliya. Salsa Daikong phatsa nogo thangkha tei buma bupha bai malaikha. Aphuru buma boni mokjak mwkhang nugwi swngkha- babu twma mungsaswk de wng, wanajak haikhe nono nuk hwnwi. Daikong sao- ama mungsa wngya ble hwnwi. Buma sao- babu ang nono talchi – salchi romwi ogo chubwi tubumani erengya, tabukphano nini mwkhang nukkheno ang kaham hamya romwi mano hwnwi. Daikong bumano ama ano kisa jora rwdi hwnwi simi sakha. Bo mai khopsa chawi hainwhai campo kiphil phaiphikha. O salni sanja jorao campo nw kha soimaya wngjagwi boni silai bai sak-sak guli kogwi thwi thangkha.
Logi logi camp ni joto staff patimungno sawi manbaikha. Boni boss dodoro Daikongni logisongno call khwlaiwi bwsai thwimani koktwma sahorkha. Logisong bw kwrajwk- kwrano sakha. Bwsala thwikha hwnwi koktwma mankheno boni maphasong lengwi sila chabaikha, ayang bihik bw kabwi bwino phunugwi tongkha. OC Daikong ni mang kwthwino tilangwi nukhungni borogno yapharwikha tei Haste ni borom romani bisingtwi boni sithalni samung mithingjakkha. Tei boni boss nukhung ni borokrog bai patimungno twiwi kisa kok salaibokha tei nukhungni borogno kha khama bw yapharkha, phiya patimungno twiwi mungsa koktwma manboyakho. Kwbwino Daikong ni boss bo thwima bai belai kha khamjakkha. Bo khao swmai tangkha- jesakhebo o patimungo gwdaljak borokno rutugwi karinai hwnwi. Boni boss (OC) dodoro o patimungno cherwi naina nangkha. Bo camp ni joto staff no Daikong thwimani uklogo tamo pher tongwi man hwnwi swngkurwi naikha, phiya abono twiwi kebophano sai manya gwja. Yagulo boni thuyamo rutugwi hwijak kangsa dairy mankha tei aronio boni patimungno twiwi kwbangma swijak koktwma mankha. Dairyo Daikongni yaksi bai rigwi kwlangjak bwtang bwtang koktwma no marewi porei khwnarokha Camp ni ojama (OC):-
Salsa ang ani palsong baikhe petrollingo ongkhar laimani. O jora ang belaikhe twi kangwi khungsa nukhungo thangwi twi nungna sanmani, kwbwino khoroksa sikli ano twi khanrokha. Angbw bono hambai yapharkha. Aphuru o sikli ani phone number sanwi narwkkha. Akon kami bw samlalaiba, agini simi bono sinijak tongmani. Angbw kosong kosong o sikli no mobile number roi rijakkha.Tei ni salokhe o sikli ano message swikha-Dada nwng ulo chini iyang phaikhe haplangdi hwnwi. Kwbwino ang duty ni kiphilwi tukuk-musui mobile check khaiwi naimani sikli ni message no nukkha. Abobai ani khao kisa nangjakma hai wngkha. Angbw bono message rohorphikha- au, ang naiuanw hwnwi. Aboni yagulo o sikli bungkhru bungkhru ano kaijakkha de dada, ani nogo phaidi, nono dhormo dada khanani akorog hwnwi podrepod khe WhatsApp, Messege khwlaima thakya wngwi tongkha. Abobai ani bwkhao uru-muru nangwi tongkha.
Obohaikhe wngwi tongma jora ang salnwi CL nawi nogo thangkha. Ani mapha tongjabaikho phiya borog belai rabaikha. Tei ani bw bwsa bwrwi khoroksa kok mandrop tongjao. Tini joratwi ang ma- baba tei ani bihik bwsa no belaikhe hamjago tei borogno kahamkhe talaphi khwlai tongo. Ang sanja jorao kamini phalnogo tungsep (cha) nungna thangphuru mobile yakarwi kwlangjakkha. O jora ani bihik mobile check khwlaiwi khoroksa bwrwi ni message mankha. Bo ang phaimani yagulo swngkha- nini mobile o sabo bwrwi ni message phai hwnwi. Ang sakha- abo ani sinima khoroksa, abono twiwi nwng tamoni aswk wanajakkha ba, abo munsaya hwnwi. Obono twiwi chini kwnwini bisingo belai dorokhe kok banglaikha. Yagulo ani logisong chwrai tilangwi nokni ongkharwi thangkha. Phiya hati barsa ni ulo ang bono nogo kiphilwi tubuphikha. Message manmani ulo hinkhe ani logisongni tongmungbw pherwi thangkha. Bo kwrajwk- kwrano bw aswk kahamkhe naikoliya tei ang baibw agini hai sabasuba tongliya. Salsa ang nogo thangmani ani logisongno kamini Rati mungwi khoroksa sikla chwla bai kisa bejua khwlai nukbokha. Obono twiwi bw chwng belai kok banglaikha. Ani ma-babusongbw ano belai kutulaikha – nwngba agio aswk maya gwnang, aswk wansokna kwrwng tongmani tabuk twmani obohai wngkha hwnwi. Ang chwraiphoro ani master bai kok thaisa sajakma tongw- rang baimale ajewi manphiro phiya borom baimale tei kiphilwi manglak hwnwi, o kokno mwitu manwi teibo ani khao lachima tei wanama hapkha. Ang ha sakao tei kwthang tongna muchukliya.
Yagolo Daikong ni boss (OC) boni bihikno teibw kok swngna bagwi lam rophikha. Boni boss borogni nogo thangwi dogar thok thok khwlaikha. Daikong ni bihik dogar phiyogwi naiba bwsai ni Boss tei logio sipai kwbangma khe nukkha tei bo samung de tong Sir hwnwi swngkha. Boss sakha- au; nono teibw kok swngna tongkho hwnwi. Kwbwino, Boss bono swngkha- nini bwsai no sabo butharkhna kwbwi kok sa le hwnwi.Aba nukhungo mungsaswk kok banglaima de tong hwnwi. Bihik sakha- Sir pwito khwlaidi, sabo butharkha angbw saimanjaya. Chini nogo mungsa walai suklai kwrwi. Boss sakha- nwng dalar tasadi ani thani bebak koktwma tongw, nwng dakti soi kok sadi haiyakhe nono alongo chobwi swngjaknai hwnwi. Ulo Daikong ni bihik ui- ui khwlai kabwi simi tongkha. Boss sakha- nirogni nukhungni koktwma bebak ani yago tongw. Nini kwra-kwrajwkno nahardi hwnwi bw sakha. Golok golok khwna horwi maphasong bw phailaiwi boss ni yakung romwi kalai tongphaikha. Boss borogno swngwi naikha phiya sabo butharkha borogbw saimanya gwja. Borog o kok simi salaikha- hati barsa barnwi romwi hiksongnwi bisingo kisa kok banglaiwi hamsa nokni ongkharwi thangkha, yagulo Daikong hamsa no kiphilwi tobokha, haiphano borog chwngno mungsa kok swrai swraikhe salaiya hwnwi. Boss teibo borog no sakha- abono karwi mungsaswk patemung de tong kahamkhe wansok naina bagwi. Aphuru borog (mapha) sakha- kamini khoroksa sikla no hamsa ni thani phai phaima nugo hwnwi. Boss hainohai Daikong ni bihikno swngphikha- sabo chwla nini thani phai phai dakti mung sadi hwnwi. Phiya Daikong ni bihik o kokno gosena naiya. Daigaikhe swngjakjma yagulo bo sakha- kamini borok ba ahaino berai tongwi thangmani hwnwi. Tei chwlani mung bw Rati hwnwi masakha.
Yagulo OC eba Daikongni Boss pairoi potalei naima yagulo Daikongni bihik tei sikla Rati no abotwi samung hamya tangmani bagwi bisiba ni bagwi alongo chobwi roibaikha.
Awatoke
