Ketrengkung, ketrengkung pungo
Dengwio mai sugma khorang,
Aichuk bachaiui Ama mai sugmang
Phung aiwi thango khrang.
Kami amchai gwnangwi punglaio
Dengwini khorangrok batai,
Aichuk wngkheno kamio mwchangjak
Ketrengkung, ketrengkung punglai.
Guyek-guek khe uahanogo uakma pungo
Dengwio mai sugma khwnai,
Ada ok khuijagwi chanani sano
Amani khorangno khwnai.
Kuhu kuhu khe kungkila pungkha
Aichugo sichaui bachai,
Mai sugtwtwi ama rwchabo henerwi
Kungkilani khorangno batai.
.
Chiyok miyok khe toksarok pungo
Ama mai sugma rekeui,
Toksarokno rwgwi ama kulpaiya
Saichung mai sug twtwi.
Chokchochrochok chokchochrochok
Ama bailingo mairung chogo,
Gundak bai mairungno bailing bai khwiwi
Bamtwg bisingo mairung dao.
Ketrengkung, ketrengkung pungma kamio
Khwnaliya dengwini khorang,
Dengwio mai sugnai kwrwikha kebo tabuk
Aichukni simi phung aiwi khrang.
……
