Thaihbrwi hatung naoi chikonti songni huk. Gana gini tei khorokchanibo huk kwrwi.Hatung kwbang chukthaya, thaihbrwi hatung kaisa jila phaiwi yak romlaimani haikhe thansa wngphaikha , thaihsa hatung kolok wngwi salkabai tei thaihsa hatung bai khuwikha, oyangtwinw kamio thahngmani lama. Tei kubuni hatungrogno kitingwi tolabai twisilung; mwituk lung, therai lung, tei raisok lung. A jilla kwukuak ! kurkuak ! khe dokrok sapung hopung pwngo; chaktre tre kolok yathek bai yapri sewi , som sre sre kisa kolok khitung no baichwng baichwng khe eyang uyang beraio tei ada rutugwi chaho.Dol bulung , therai bwlwngonw bwtwih twio ,bwsa khwmpai khe aborok mirik philik phalak khe cherai hainw khaprum bibrum khe thwnglaio , chekleklaio , tei buma ni utung utung rwkthao , dok buma khasogwi bwsa rogno ada tugwi chahrio.Boro boro kura phaio tangblani jora , k -u- u- r -t -u -u -m ! k -u -u- r -t -u -u -m ! khorang bai bolong huk gwrwng riwi tonio. Bwkrang chak tere tere tok pupu rogbo twisilung gana gininw bulung besoro tonglaio. Twisilung barkheno teisa hapung , hachuk, ojila uah bolong, son bolong , buphang yaphang , aborok pah no keseng, jeswk sal thahngrwrwk aswknw kwma rwrwk , swkang salrogo aro tongmani bolong kuthuk, salni pohor joroka kwlaioi manya , mwsah, mayung , geguma, chibuk , sindrai, uak bangmani kul kwrwi aphru; a salrok tabuk kerang kothoma hainw; mwsah, mayung komor nani naitongbaikha. Thahngnai salrogo chikontisongni kamini borokrok salsa mui rutuknani hinwi ongkhor laikha hwno , thahnwthahngo thahnwthahngo, a sal tongmani talika hamyani mui ongkhornairogni bagwi, mwswi masa jorako malaiya, khaprum laimang khaprum laimang leng pra pra wnglai je jila chikonti songni huk a jila mai mui song lai chahnani bagwi bwthaklaio. Phangsa bongphang botok wngwi kwlai tongmani, a jila bol thumwi mai boksao, sarapsa uklogo nugo a bongphang ninango hnwi; jotonw atomsa chawi nugo aboba chibuk muisele se, mwswi kotorma masa monogwi botok wngwi kwlai tongkha, tei abo tongmani bura paithak, tei aswk no kotor tei kolok buphang bokcho hiwi koronani koknw.
Mui onkhornairok nogo kiphilwi da rua nawi teisa o jila thahngwi abono bwtharo. Sochwi kami khungbrwi ni borokrok ok supungwi a mui kolok ni bahan chahlaimankha. A kerang kothoma tabukbo okra chakra rok khwlailaio.Talyung ni kwchar, tabuktui jora nokha o chwmwi kosom tongnani kok, thangnai hati barsao uatwi hom hom uawi paikha polasa, saltham romwi bisi kwtal ni uatwi sapung hopung borokno haba duario.Misikha tallang jora ni satung da da o kekhokjak auar, bari bisra, swklaikha maisingo khabai mani hadwlwi, sanja drop o athukiri pini pana nukjakmani hainw bwphang bedego bwlai kwlwi lupapa wngnani chenglaikha, yongla ualaih, yongla toterok khal, bil , ban rogo nukjaknani chenglaikha, chibukrok hakor ni ongkhorwi yongla romwi ok supungnani chenglaio. Jabra bobrarog uatwi suklai jagwi kwkrwk, kwkhrangni kwchwng tei kwsrang,
A je polasa uatwi uaoi paimani, aboni ulo pah chwmwi badamiya wngbai kwmabaio. Nokha teisa chwmwi bwkcha, talyungni satung, gisti tangnairok hwno “kha jala satung” matongo sal bini pah tungma yakar rohorkha hayungno sokpronani bagwi .Nokbar kisini bagwi kisa khenw bwsak kolomtwi bai gama gama wngo. Je tokrok bohrokni umoro pogwibo twini gana gini thahngya a tokrokbo jehai saruksa, chora, tokha, sarua ako ako twio bwsak misiwi saklomo bawi tongphaio, swihrok dibor jora kisa tong tongwi twima, twisa eba khalo chapum chapam khe twio chupogo, hakungo kasawi hadwlwi o rodo w, aboni ulo noksaro eba bwphang sakolomo achugwi bwslai kolokma kairingwi lelao. Tokthu siminw satungni i tungmano kwbang leka naya, sak nangya. Bohrokni kwcham loitwinw bwlaih bai koton khwlaijak bedego bawi pungo : k u kru ku ku ku ku!. Iboni pungma dibor jorani huangmung tei siringmung no teibo hilik khe tisao bini khwnathok phiya kabsisi khorang bai.
Chikonti bini hukni baichingni mundul bwphang ni kwchang saklomo achugwi tokthu pungmani no khwnao, mare hokia gananw rituku bowi rokowi tongo; thudethu eba akhainw mukumwi tong chikonti rommanya, mare ni bwkha hamya, bo je chwlano kha phurjago a chwla bwpha bai ualailai nok kami yakar biyangbo patilangkha, baksa sao sipaio hapkha, baksa sao malkhungni hendelmen wngwi biyangbo hakchal hao soiwikha.Talsa kanani kasokha, tini jorako mungsa koktwma kwrwi, a borok ba bo jila tong, bo jila chah.
Sip sip boyal sipsawi thahngo, bwphang yaphang, bwlaih ualaih ninang riwi. Hakchalo uah bolong o kere kere khe khorang kaisa kasao.
Kangtham kangbrwi bwlaih kormo bwphangni simi kwraio, hokiani mwkhangobo kwraiphaio, bo kisa mokol phiyogo. Naharmao bwkha deramwngni mari kahamkhenw sijago.
– Tamola mare bwkha hamyade wng? Swhngo chikonti.
Hokia khukchwi narwi tamobo sao, khorang kubulmabai chikonti khwna phano tamoba saka rommanya. Langma kolokma yakarwi bo teisa mukumo. Chikonti mareni mwkhangno kahamkhe naharo; naithok kwlwlw mwkhng, chikonthe talika, a jila tungnwi tungtham khwnai khajuni kengwi rodo modo chawi tongkha. Mokol bwlaih tong tongwi ninago, belep khukchwio mungsa mwnwima hwijak tongmani hai matongo, o jila phola kwrwi, ramprajak. Talsa ni bising bwkhaibo swlaisuk thahngkha mare, uansugwi aochmsa chao bo. Bwswk khajaja tongthothok mwnwima twiwi joto phuru mwkhang kwchwng khe toninai bwkhaibo hakwrai khum hai hoichrebwi thahngsukkha.
Hokiani khapangni borok da gogonbo bobo twi borok sidu. Kha soksukya hai, siwinw tongo hokia bono bini khapang yapharwi rikha, pah siwi nugwi bo bwkhai abo hai holong bwkha nawi thopsabo malaiphaiya eba koktun kisa phano rohoryaoi tongwi man. Bwpha baise kok banglaio, bwkha kheklaio; hakasisi hokianole abohai khe kaglaimung tei khatangmung ni homchango lebang hai khampro rimani uklogole tamo kokba tongwi man. Kha bising bising mareni bagwi da gogon no polasa kudiwi paio bo.
Uyang khamabaini nokhao pale pal sikruk bohrokni kuar bwkrang phehelwi kaisa jila khonwi kiting kitingwi birlaio, baksa kuchugo, baksa hache che khe. Oyang bai bororwgo musuk ako kwthwi khibijak tongna. Bo sikruk rok birmano sarapsa naiwi huk bai kiphil naharo.Bwphayung tola babai bwsa gwnang gai tei deka masa musup twtwi muruk tongo.
Hugo mai rotomoi torsawi phaidorop, uatwi manmani ulo dakti daktinw yaskur jora chuk thahngkha.Uatwi ruai hainw sokphaio hinya khe mai hamnani kok tukkhamw.
Mai kwchar kwcharo khulia, dormai, mompho, sosa, thaihchumu, banta, nalia mwkhwi akorok kaikha, jotonw buuw pewi tornani chengbaikha.Hukni sochwi kwcharo khungsa kwbai kichik gairing; bini daburani amol ni simi bisibrum gairing tisajago, uak bolong, mwswi, atuka ako muruk nani bagwi. A jila dabura, nanu, bwma, bwpha pahni muitu kwlai tongo.Kisa swkangni kokse, i moyalo bolong uak tei mwswi akarlai tongbaimani ; hukni mai, mui kwthwng thugwi manwi bohrokni ada wngbaio. Kalinw siklarok mui koklai koklai sap khwlai baikha, tabuk uak bolong, mwswi akorok komornani nai tongbaikha.Tabuk jotoni nogonw kongsa khe silai gudok. Semani simi huk muruknani nangliya hinwi gairingbo tei tisajakya, je khungsa tongmani abobo chamwi baikhropnani chengo. Twisilwngo masa dok atkasa khe khorang chiring bai pungo. Abobai hokiani muktwrwi baio.
– O gaija langnaisa dok ! thamsi bai swraio hokia, kolokma iyasio bo , nokhani huangmwng bai bini seler naharma bai nahaoi tongo sarapcha. Lwtani simi twi siroi mokolo twi bwprao.
– Mare nwng tamo da gogon node jaichari khatangjak? Chikonti hokiano swhngo.
Hokia bini phaising tamo mungsa achoms chahmung mokolo kiyok riwi nahao. Chajakya de wngjakkha, uanajago chikonti.
-Bini kok ! hinwi hokia yakungni yasi bai jabra phwichao, khatangwi tamo wngnani, ang siminw khatangnani tei bo khe khajawi tongnani, paithak bai bini khorang kisa kharo.
-Saimanliya da gogon le bobotwi borok, bo bai malaikhe mare ang je khugo phaimani kok kwtwi kwtwi saoi khwnarinai.
-Mare tundi bini kokno, hinwi hokia khokchwi uaro, kha bisingni mungsaswk uansukmano phankhe sincherepnani naina bo. Bini mokol , khangar, talikao bwkha mothor jakmani mari kisisa khe sijagi teisa kwmao.
-Bai! Bai! Tola bai atkasa khe chikontini bwphayung kwkhrangni chiring khorang bai chirikma khwnahoro.Eyang bainw khaprumwi phaiwi tongo.Hokia tei chikonti kwnwinw sundruo, chikonti ni bisma twi hing kwchang bow. Bwphyungnide mungsaswk wngkha ? kha duk duk wngjago.
-Bai! Bai! Iko chibuk !bisi charni cherai rituku kanjak, sak keram kwkhrang nukjakphaio, yago latha, lathani buchugo chibuk kwthwi, kisa tomoro moronw.
-O taloka ! tamo abo; chikonti mokol kotor kotor khe swhngo.
-Chibuk dondul anose suknani hinwi rwphre phaitero, rikhata latha bai phungsa, uaisabainw bisma baiwi kwrak.Chibuk thwichukyakho, khitung buchuk kisa kisa khe ninangwi tongkho.
-O taloka !khibidi monai, khibidi monai! nwng kisamang kirijakyade , chikonti kirijagwi chirikhogo.
-Bai aboni bisda tong? Kwkhrang swhngo, chibukno hakchal khe baiphang bwlwng bai khitaihoro.
-Tani tongya wngnani? Chibuk bai aswk kha ta tordi monai. Chikonti kutugo.
-Chis! Chibuk de ang kiri bai, chibuk hachiki phaikhe bonobo ang yakaya .Kwkhrang bibini samo achugo .
-Swkang tordi, chukdi , sikla wngdi, yak bai bo bwphyungni khwnaino mihimow rio.
-Gai biyang? swhngo chikonti.
TEI BOKOCHO DATI PHIYOKJAKNAI
