Philtham
Pichni sorok, komolpur ambassa road. Khama bai abo bharot bangladesh ni ari ganagini ni doli komolpuro sowi kha, sakabai wngwikha pratham, prasa thahngkha tipra hasteni rajakhor aguli bai, prasa dormonogor bai tei prasa khe gondatwisa babai thahngkha. Ahrangchak kami no komolpur ambasa road sochoi khaklap kwchartwi phekoknwi khe cherwi kwlangkha.
Tamoni bagwi i kamini bumung ahrangchak pharjakkha khoroksabo sawi manai kwrwi, bura burichukrokbo tei muitu khwlai sawi manliya. Baksa sao swkango soito jugo i jila rangkhol bil hinwi je bil kolok tongmani a jila masa ah rangchak tongmani hino. Abo tongmani swrangtwi hai, je borok khoroksaswkno bo solimani kwrwi, samung sitra tangmani kwrwi abotwi borok kwthar talika kaham hwnkhe tal pilala horo a rangkhol bilo thahngwi bihor khe a ahrangchak bai malaio hino. Bini thani rang sankhe rang gola mano, bwsa kwrwi rok bwsa sankha bwsa achaijago ako ako abotwi thugwi kothoma kamini bwra bwrichukni khugo khwnajago.Koili juk sokphaimani uklogo samung sitra tangnairok bangmani bai, bohrokni akarmabai o rangkhol bilbo kwmao hino bini logi a ah rangchakbo. A rangkhol bil tabuk maini hauar. Salkabai dolai twima kochok thahngkha; malwi tongnai chibuk muisele hainw kokoi mokoi, kami borabot eyangnar haiching khungo singchang bwlwng, akondo, jinjinia, kwthwi khum bwlwng. Joto jora singchang phududu chari bartongo, sip sip boyar sipsaphuru mwsawi tongnai naithokti bwrwini bwchang hainw ninago, a jila piyara rok bawi pungphaio; tentwrwi singchangni bwlaih bwbar thumwi kamini tal, khejur tei kuai buphango bothop thumo.
Sal hap bai ari wngwi bwchawi tongo kuchuk hache hatung, a jila huk tangwi chahlaio kamini gisti tangnairok. Saka bai ah rangchak up chengdrop o kaisa twisa lamano tansowi kochok thahngkha, abo kwlaiwikha dolai twimao, bura, buri chukrokni koktwi twisa chamri kawikha dolaini nogo. Jaga jaga i twisani bwmung juda juda, i jila ah rangchak, kisa swkangkhe abo naurai twisa teibo swkang khe maitung twisa. I twisa mendi kamini sakabai ni hachukni gorgorini simi chengjagwi ah rangchak kami o sokphaiwi dolai twimao paiwikha.
Lamani babainwi thaipung, thaichuk buphang tei tongo rabonchura, krisanochura, swkal thwrwi, gulmohor, jarai ako ako.Talyung tei taltuk jora wngkha rabonchura, krisanochura ako barmani jora; krisanochura ni bubar kwchak, rabonchura, swkal thwrwini bwbar kormo; jaraini phantok bwthaini pali hai, bubar barma jora ma tongo buphang rogo hor nangkha eba nokhani simi chibukmailam kwraiwi bedego kwchawi tongphaikha.Swkalthwrwini bubar rangchak bwthai hainw. A jora rogo biyangnbo kungkila, tok kungkak, olaidiya, tokblu ako ako dale dal tok pal wnglai sokphaio; kungkila sebo seleya , lebo lelaya k- u -h -u k -u h- u khe sapung pungphaio. Phantok chakhwi tok ku – k u- ku -ku phantok chakhwi hinwi sapung hopung abo akaiya pungmang tongsinai nokhao birtwtwi; kamini cherai bodol a tokni logi salaio thaipung munkha, thaipung munkha.
Ah rangchak kami o beri tei daspa rokni kami, lamani babainwi kubung khe nok tanglai tonglaio. Kamio hohr pherang tongo, jotoni noknw hor wngkhe electric bulbni pohor bai pirsawi tongo, deep well bai twi supply bo rijak tongo, twini mungsa biyal kwrwi.
Sairik wngkhe kaham tei naithok rignai kanwi sago rituku phanwi chango gola khebwi twi khoknani phailaio kamini bwrwi siklirok bodol khe. Siklarok khumni khumtwi rwkanai piya hainw kamini siklarok samrogo tongo eba utung utung rwkthao, kara thwnglaio mwnwi kothok kok salai.
Bura rok nuk khe salaio: Nuk khade tabukni cherai rokni akkol , phikung bukur khwkyasak akkol hamgwlak.
Phiya abo kok bai siminw. Baluari rwngnok khungsa tongo, class ten jora khungsa rwng nok bo tongo, bumung ah rangchak high school ; a jila ni head master sayten sinha, muglisa belai nw kora. Cherai rok bono kirijagwi khitoma kwlwi jagwi thor thor. Aboni bagwi swrwngnai rokbo laihsi swrwngo bwkha riwi. Khungsa khungnwi phal nok bo tongo. Akran, berma ni simi chengwi dal, som, moso, kwtwi, chini, cha bwlaih, mosla, septipin, muti ako ako abo twi thugwi manwi khwnwi manthogo.Cha nwngmani stall bo tongo, bumung ahrangchak cha phal nok. Abo okra tei sikla chala rokni jai nok. Sanja wngkhe cha phalnokni bwskang lamthai bowi tas thwngnani achuk laio. Thwngnai rok wngkha khoroksa kerani sukendro, khoroksa bekar, bekar bo hinsuk manya, chakri yakar phaijak upendro, mai kutung kamini primary rwngnokni mastor ononto, jeno bwi jotonw da koto hinwi ringo tei tongo muikoknai kwrwng horendro, gisti tangnai kwnwi kwtham. Hor mojomot wngyasak tas thwngnairok bwcha laiya.Tong tongwi cha ni order kwlaio logi tiger biskut, nok ni bubagra chengkhirai samo achugwi murumo, rituku kangsa nawi thampwi rwphreo tei cha swnam khano order mankhe.
I kamini kaisa tongmari wngkha jehai borok kaham i kamio tongo abo twi borok sitra paithaknibo biyal kwrwi. Joto phuru i kwnwi bodol ni bising kok banglai tonglaio.
Phiya abo bising bising, phatarni borok khoroksabo abono sawi manya. Borok kaham hinwi je borok rokni bumung khuwi mano bohrok wngkha bithi kwrwng MBBS brojendro, kolikata ni simi swrwng phaijak, samungo habmani kwtal kwtal hakchal kamio tongmani tabuk kami sampaonw sokphaikha rangiya kami dispensary o tongo tabuk tei
tongo daktor ni bupha bir bahadur, master ononto, kamini sikla kok borok phwrwwg nai ni samung mannai sojol.
Daktor brojendro kamio phaimani swkang aroni mothani tongmung chahmung, sikla sikli rokni tong raida tongmani juda. Mothani bokhorok pah bokhorok kotor, mokol kotor, khamrek, bahai khe jani jani lab kairing man aboni mang sep naichom lai tongo. Chuak arak ni kok to kwrwinw, sal kwthang kwthang okra rok phegwi lama botok cheklek lai tonglaio, nangya kukya kok salai ualai laio, ahai khe podere pod tongmung phunuk tero.Tal burum bwrwi cherai sikla sikli tonglaima nawi bichar achugo, mothani bokhorok rok babai nwi nw kham tamo, chukli sugo; tok takhum, uak, pun ako boksing rijago kok siljaknai rok. Je kwbang riwi mano, bohok supungwi chahri mano, totogra akaiya sak misiriwi mano bini bagwinw bokhorok rok bwchao. Bohrokni koknw paithak, chathung, chayathung gosiwi nanani kwlaio khamakha jotono. Hamya, chaya wng khebo swkal mwtai rilaio, bolong burasano chago, sema naio, diyari kao. Eyang ochai chontai ni sago kakai mwchamang, chuk arak ma nwngmang sago bupham khao. Sikla sikli rokbo swrwng thani kwbang bwkha riya, tei bo kwrwng wngnani, sakao kasa nani, rang kwbang aji milik mwchang tongnani abotwi uansukma bohrokni bising kwrwinw hinjago. Tei bwkhai khe tongnai, kamio abo twi khoroksabo borok kwrwi je mokol kiyok rinani bagwi pohorni chati phunuk mano. Club tong khe, thwngnani manwi khwnwi tong khe, laihsi(bijap) thumnok tong khe, rwchabmung mwsa mung ni luajima tong khe sikla rokni bwkha kaham babai kisaswswk phano soton jak khamw. Abo ni bagwinw siklarok ni samung bwtang rogo khopjago sikli rok ni utunt utung rwkthanani, bwrwi khoknani, tas thwngnani, chuak arak nwngnani ako ako. Daktor nok bar kotor hainw sokphaio. Pah no bankundri hainw yaphang buchuk khwlai ribaio, bini tongmung, kok samung bai, khasokma bai joto sikla sikli no muani phanango bo; club nok khungsa tisawi rio, ajila laihsi, koktwn, thwngmani manwi khwnwi sokphaio.
Bisiburumnw hangrai ni molo rwchabmung, mwsamung wnglaio, kamini sikla sikli rok thungnuk phunugo. Hopung romwi khajaja tongthothok khe kamini pah okra chakra cherai sikla hukumuni mel o baithangno thansa khwlai rilaio. Hakchal hakchal kamini borokrok bo rwchabmung mwsamung ni pandao sokpai baio tei abono twiwi kamini sikla rok bukung chukjakbaio, kok bolai salaio. Abo siminuya mwtai swkal bwrasa ako obo borok rok ni puitu komor rwrwk, bokhorok kotor mothani borokrok khamplai segjagbaio, bohrok bo kwlai khe dakti khe yakarnani gosi maniya, sikla rokni thansa phanni bwskango bohrokni kebengmung twi kotoro chwkap kochok baimani hainw kwmabaio. Sikla phannw paithago kwplai wngo. Khamplai segjaknairok tei le tamo khwlai mansini, achuk achugwi swkangni sal rangchak ni kokno muitu khwlailaio tei daktor no kha bising bising swrailaio. Chuak butuk bokhokjago, arak butol swbaijago, sal kwthang kwthang khaklap pati arak nungnairok horo siminw jani jani nogo nwnglaio. Sanani thahngkhe ah rangchak kami khungsa naithok tei kaham kami wng kasakha. Swkangni ah rangchak tei tabuk ni ah rangchak sal bai hor.
Hinkhebo boro boro hamya rok ninango, bohrok je komoryakho , lang choyakho aboni mari phunugo.
Daktor brojendro no jotoni bara kha phurjaknai wngkha sojol, bwta kwlaio daktorno bini silai okraba, halok kisa chalai jaknw; mothani hamkrai, mothani hamya loi swlaini akorokni kobok mungo bo jotoni swkang swkang, daktor ni yagra yak bo. Sojol songni nok kamini sochoi kwcharo, jeno hinwimano kamini omthai, bohrokni nok ni siminw kami saka tei kami khama hinwi khakjago.
Sojol song bukhuknwi tei takhuk nwi, bwta somorendra jotoni okra , ongc ni technician, mumbai o tongo hik sa twiwi, bibi kwnwi jani jani nukhungno twiwi pailaiya hailaiya, sojolnw jotoni kusu. Bupha probhat chondro swkang salni communist kwcham, tabuk batil ni listo bumung tisajak; tabuk sal ni bumung siminw kamchwlwi hai khe chumjak communist rokni tongmung chahmung gothok jakyawi bo baithangno pah ni norwi twno. Swkango phwrwng naini samung tangmani ulo somajtontrp songsanani emang nawi phwrwngmani samung yakaro, marx, angles, lenin ni laihsi rok poriwi biplop khwlainani hinwi parti o bumung tisa rio. Jora kaisao bo tipra hasteni thugwi jagao sinijagwi tongmani, kok sanani kwrwng; kok bai borokno mwnwi riwi mano, kabriwi mano, thamsi kari mano, borok ni bomotom bisingo bini uansukma rokno sorawi mano kwlai khe. Jora kaisao bo partini kuchuk beremni twiphang khoroksa tongmani. Uaisa phuru mitingo parti o tamo twiwibo kok pherlaio, buphani kok twi tongraida nawinw kok banglaimani, partiline, parti ni uansukma, kok samung pherlaimung pah babainw parti ni samug no chajakya wngwi smai tangwi parti yakaro . O je uaisa partini ongkhormani tei kiphil liya. Tabuk nogonw achuk tongo, laihsini thumnok khungsa swnamkha, sapung sal samung humung paimani uklogo je jora mano laihsionw kulugwi tongo, bari bisra bwsa bwtwi, boro boro hati tei laishi abonw tabuk bini langmani ari wng kwsakha.
– Phona nwng tani parti yakarkhale? Tei khwlailiya de? Boro boro khoroksa khoroknwi dagini borok swhngphaio.
Sojolni bupha probhat chondro sao: Inkilab jindabad hikhenw eba miting misil khwlaikhenw da communist wngman, abotwi kok kwrwi partio ang tabuk kwrwi phano wngmano, phiya ang tabukbo baithang no communist hinwi kha chongo .
Sojol no twiwi buma buphani emang tongmani kwbangma, sojol thaitak; ma, pha, bibi, bwta pah ni khasokma man tongmani. Bohrokni dagio jotoni kwbang elem gwnang bo tongmani, jesa mungsa uaisa khwnakhe, uaisa porikh , uaisa swrwng khe eba phwrwng jakkhe tei pogya. Muitu narukmani phan bini belai kwbang tei kuthuk.
Ah rangchak rwngnogo mastor rokni thani bo tongmani golden boy, elem, koklop komthingma, rwchapma, amjokma o jotoni bara nombor kwbang manma, pah jila nw jotoni swkang, jotoni kwplai. Maidomiko kok uanjwi, ongko, soi si ako letter nombor manwi phirst dibison bai pas khwlaimani, bini emang tongmani da brojendro hai sak nai kwrwng wngwimanani. Bo thangkha agulio, jotoni bara kaham rwngnok o haboikha. Bini langmao saka kasamung tei tola o kokhlaimung kwbangma tongo, phiya kokhlaimung bainw hilik. Aguli o thahngwi musuk udamni jedosa wngo bini bo abotwinw wngo. Baithangnw baithangni bugra. Bobo kaham, bobo hamya sanai kwrwikha, naichom nai, naikani khwlainai kwrwikha . Agulio phaimani ulni simi bini
kokhlaimung chengjago. Utpol hinwi gul bajar ni khoroksa bepari kotorni bwsala bobai bayap khaka, bohbo bobai baksa class kaisao swrwngnai. Kisa salni bising utpol bini khapangni yar wng kwsao. Utpol tongmani belainw mirik, phatra phiya elem gwnang. Bwrwi rokno satok nani, kara thwngnani, hamjakmani switwn(letter) rok switrwng nani abotwi thugwi jila bo tose tongnai.
Salsa utpol bono bini nogo twlang thahngo. klass ni siminw borok serek serek khe kharo, dibor jora nogo borok khoroksabo kwrwi, buma biyangbo beraina hinwi thahngjak, buphakhe salbrwm hainw phalnogo pailaiya hailaiya. Utpol bono nogo sorawi phatsa khe doga berebwi rio.
-Mukumla dust. Utpol sojolno sao.
Sojol bini kok twi uwkumo.
– Do phiokdi tabuk.
Mokol phiyokmani babaksanw bo thorsa sundruo, bokhorokgo rua kwlaijago. Kangsa ingraji magajine, pornography ni, bwrwisikli ni mangpili, sak ri bwkcha, khwtng twngsa bo kwrwi, uaririk khe mwnwijak. Bini dosa wngo twini simi hakungo tisajak ah hai. Pwila kisa labolachijaktero phiya naharwi mang tongnnani muchung jago, kaisa phan gwnang muani tei sotonma bini bwkhao rotomwi phaio.Mungsa bumuk siniya tongthokma bai bwsak ni buikhumu thengsajago, bini bising sokphaio swlaimung mungsa. Atkasa khe siklamungni sojak dogalam lang lang khe phiyokjago; abobai je nokbar uatwi sokphaikha bo abobai yaphang buchuk bakmaya wngthahngo. Kaham hamyani ari pogthahngo. Bini sinani tukya i jila bo mannai bijra tongthokma; je tongthokmano koton khe hwijagwi bwino khogwi manani nango abo mankhe khao je changma mano abo tei kubunio manya. Thentrwi mwkhwi chahmahainw. Iboni muani belai phankwrak tei i muanio kobolwi lebang homchango bwkharwi khamma haikhe mungsa tongthok mawklang mano. Bini thwilam twi korai kosom khaprumnani chengo.
Aboni ulo chahphuru nwngphuru joto phuru mokol bwskang a bwrwima ni mangpili bini mokol bwskango kosbai thepajakma haikhe swrabwi tongo, bomotomni simi tei kutul nani se soiliya. Bini klasni sakur kuphur khoroksa bwrwima no utpol bini wngwi switwn swio. Bini switwn yachakjago, bwrwima bono kha phurjago. Bwrwimano logi twiwi bo phatoro ongkornani chengo, rupasi cinemahall , resturant rogo achuklai koksalaio, mwnwilaio, salsa bini bwkhao sitra muchungma bumuk pero, bwrwimano twlangwi borok kwrwi khotolo talang thahngo, bwrwimani kwlwi kwtwng bwsakno kwbak romwi motom suo. Bo tei bo swkang khamw, bini thwiho aphuru mayung kwthwng rokni akarma, muanini phekma, siklamungni thwih kwthwng.
-Sojol aswk daktiya, tondrikho, tondrikho. A bwrwima lachitwtwi kabsisi khe sakhe abo paijon hainw bini bwkhano bwphaio. Sojol mwkthango kiphilo. Chi chi bo ba sitra samung tangnani naimani tei kisa khenw abotwi deramung kotoro kwlaikhamw jeni simi kiphil nani kok tukkhamw. Kainwi langmao bini tie bwrwini, orai porai, bankundri phaikhamw jeni paithak bo siya eba o bwrwima. Tongthothok chahthothok khe bini langmani sal salsa salse khe paio; bwrwi o siminw bo thagwi tongya, hoku, chuak arak, tas thwngnani pah phaising nw bini laisoma chengjago, laihsini logi bini halok chalwi phairwrwkkha. Eyang nogo khe switwn swio bo belaikhe kha riwi swrwng tongo, chahya nwngya khe. Kwnwi kwtham pribat tutor tonikha rang kwbang nango, nokni simi rohorjakna wngthwng. Rangbo sokphaio bechep bechep. Rang mankhenw bini yar tei dagi ni borokrokno twiwi tongthokma bai mithik laio. Abotwi khe bwkhai bwkhaibo bisa laiwi amjokmani kok saklaijago.Utpol tei o bwrwima jebai bo sikla sikli tongmani pharst divison manwi pas khwlaiwi khoroksa khe doktor wngna tei khoroksa khe enginiar swrwngna thahngo.. Bo khe jotoni uklok bai komparmental manwi buma buphani emang no kocho kocho khe sachowi baitahngni talikao horhmusungwi pas khwlaio.Thaksuk thahngo bini langmani yapiri. Bwskang ni doga berepjakkha, bini tongmungnw kati berep wngwi bono kebengwi lama kasokha. Tei le tamo khwlai mansinai baithangni talikano toknani karwi. Bini bwkha baisugwi thahngo.
Pai thahngbainai sal tei sep rangchak roknoto bo tei uaisa kiphil manliya. Je samung chayarok tangkha abono tei uaisa sepengoi soi khwlainani jora kwrwikha. Abo lam kaisa lama hai uaisa thangkhe kiphimanya tei. Twrwk twrwk khe badamiya khasugo bo, jotonw bono apapua, nanunang, perkhakya hinwi kara thwnglaio. Bupha bwsalabai kok sana mwthak rio. Abobai teibo bwkha koio sojol; o result kaham khwlai mankhai siminw bupha bono hamjaknani, chajaknani, hamya khwlaikhe naiselenani, bo dokni kok abo. Tei tamojat hamjakma abo
aswk khamrek. Buphano khoraiwi bo teibo kwbang khe baithangno sukluk rina muchungjago, lama rimio yakung kasli jakna muchung jago. Kwcharo communist parti o habnani hiwoi aboni adonglaih yachago. Miting, misil rogo thahngnani chengo. Phiya sak naikwrwng da brojendro bini pah uansukma chapjak kha chongmarok no aula jaula khwlai rio.
Da brojendro bono swhngo: Sala dondomulak bostubad tamo, hegel ni tamo uansukma tong, aristotol sokretis ni philosophy tamo sa, tamono proletariat hin, tamono burjua hin, tamono sreni songram hin, bubagra tei selengni halok tamo, das capital tamo sa. Tipra hao dopha kotor tei dopha chikon ni halok bobotwi ma wngnai, tinin simi bisi bachi ulo tiprasa mothani bobo twi nukmari wngno. Lenin bo theory bai uansa tiprasani halok no songsanai. Tiprasa rok ni tong mwthang i ha saka bahai khe mwthang naruknai.
Abotwi thugwi kok swhngjago sojol phiya kaisanibo yachakma bo kahamkhe siya.
Da brojendro teibo sao: Swkang study khwlaidi, marx, engles, lenin teibo duniyani thugwi borok kotor rokni laihsi poridi, baithangni mothano study khwlaidi. Tipra hano beraiwi naidi. Doli, mopsol ya kami amchoi hachuk besor bwsoro se borok bwkhai tong chah sidi, tamo bohrokni dora dukhu, bo hukumu bohrok mwthang naruk, bobotwi bohrok ni langmani choba, bohrokni mwnwima, bohrokni mwktwi pahno sinani naidi. Uansukdi nokha, samungkhe hao, baithangno sinidi, baithangni mothano sinidi. Baithang thangkhese bwini kokno uansuknani sep manani.
Sojol buphani laihsi nogo habwi salsa salnwi laihsirok phiyogwi naitrung kha phiya kha lok manya. Tamo khwlaini tamo khwlaiya bakmanya wngo bo, jora kaisa o uansugo boiragi wngwi de himaloio patilangsinai eba buddist wngwi tibbot rogo thahngsinani, abo twi akam bikam uansukma bini bwkhao lupapa wngphaio.
Abotwi kutuk jora o da brojendro sokphaikhe bo teisa phola kiphil manma hai ma tongjago. Mothano swlainani, club songsanani, mothani hamya chaya danda sitra loino selengwi choba rinani, hukumu, kok rwbai, rwchapmung mwsamung ako twiwi samung khwlainani, aboni bagwi sikla rokno kok thansa khwlainani. Pah jilaonw bo baithangno thepawi tonio tei aboni bisingonw bwkha ni baikhropmung, bawkhani kwsa, baithangno kusumung rokno pokna chengo. Thangwi tongna bagwi, yapri thakya him swkang himan bagwi khao phan mano. Abo nw wng kwsao bini langmani ada.
Agulini kiphilmani uklogo kamino twiwinw kwlai tongmani bo, salsa hor khe hatini simi nogo kiphilwi nugo bupha salburum burum hor dam charo thumani loini simi pherwi bwchawi tongo bono naisingwi.
Sojolno ringhorwi sao: Kuphusa, nono kok thaisa sanani bagwi ang gila sal swkangni simi uansugwi tongmani, twi kwrwi gola bukcha wngwi tei sal bwswk tongnani, abo siminuya baithangni yakung bai bwchanani jora sokphaikha hinwi kha khwlaio. Nwng chakri nawi baithangni lama sak baithangnw naisidi, nini ma tei ano ta satok sidi. Asuknw ani kok, i kokrok sanani bagwinw ang hor dam char wngphano rokoyawi nono naising tongmani nwng tabuk thahngmano.
Buphani o kokrok khwnamani ulo bo koktma bwlaih o kok auai naina chengkha, a molonw kok borok mastorni bagwi kok auaijagwi tongmani, dorkhasto kangsa swiwi joma rikhe interview ringjago, kokborok mastorni chakri bo mankhibio.
Bupha khwnawi sao: Mayungni nogo sinjo achaikha.
Sojolni buma abo khwnawi gosiwi manya, sao bwsaino : O nwng khe sinjoni nogo mayung wngwi achaikhata. Naidi nini sak chalairok baksa montri, baksa neta kotor baksa officer kotor wngbaiwi rangri garini bubagra wngbaikha, nwng khe burasa thurthura wngwi nogo chochochok. Nini joto netagiri nwsalani saka.
Probhat chondro bihikni kogo khunju kaya tei bo abono khunju kathothok hinwibo kha kaya, aboni bagwi yabo yachakya. Baithangni laihsi porima, laihsi nok tei bisra o samung tangma o teibo bangkwgwi bwkha rio.
Twilamthai bukcha twi sakao kuphungwi tongnai thopsa thok haikhe sairik ni sal chwmwi bukcha pimol nokhatwi khe chaksawi hakchalni pimol hachukni kotono kuluk thahngo. Sojol ahrangchak kamini ap swkangdropni ykhrai saka achugwi sal kulukmano naio, bini yago sumui kongsa, bo saichwngnw. Joto babai sanja ongkhorwi phaio, sanjani andirao kwmao nokhani pimol, thaisa thaisa khe athukiri bodol kiyogo, sal hapbai nukjag kwchwng sanja daroknaima. Kamini uahsur tei uahmlang bwlwng, sobai kosoi bwlwng, thaipung, thaichuk buphango saruksa, chora rok horni tongthai seklai chekleklaima
magwi phairwrwk. Khoroksa gisti tangnaisani bihik nogo takhum kiphilma nukyawi takhum rokno ringwi tongo :Chwi ! chwi! Chwi!
Lamao borok kwrwi khoroksabo, hatini sal tini, kamini okra chakra jotonw thahngbaikha hati khwlailainani. Sojol tamoni bagwi bo tini ni sanjano belaikhe magsisi ma tongjago.
Joto babai mungsa magmung sijagwi tongmani hai. Siring sorok sanjao sojol jaimano bini bisingonw saichwngmung bwkhano hilik khwlai tonikha. Sanja darok naimano nahartwtwi uansugo bo, ang je hai saichwng sanja daroknaimabo. Tini i sanjabo saichwngmung ni bising kulugwi tongo,mokol bwsakng lama gana ginini maikheto, bari bisra, hauar joto lelarjak tei ojilrogo saichwngmungno rutuk mano sojol. Sanja jeswk kubungni simi teibo kubung wngwi horni bwkhak rodorwrwk aswknw bini bwkhabo bangwi hamya wngrwrwk. Bo uansugo, bwkhani joto jila kopromwi naio tamoni bagwi bwkhani i hamyamung. Khapangni i makmung no bo uakasa siyari hainw matongjago. Sal kahamrokni kok rokno muitu khwlaiwi baithangno kwsrang khwlainanaio, thok kwrwi chati hainw bo kwsrangmungno rotomriwi manya baithangni bising. Baithangni saka thamsi kajagwi bwchawi ayang uyang akhainw swrapsa himo. Muituk lwngo chengkharwmarok chwngbak chwngbak khe chwngwi birlaimanino naio. Tei uaisa swkangni jagaonw achugo, mayungni nogo sinjo achaikha i kok no muitu khwlai mwnwio kha bising bising . “Ang tabuk kok borok mastar” uansugo bo, tamoba teile khwlai mansini, kokborok phwrwngnai wngwi bo baithangni tei mothani bwswk jora kaham khwlaimanno.
Kok borok phwrwngnaini kok khwnakhenw bini mokol bwskango kuphungo hachuk besoro kwbai kichik rwngnok bera kwrwi, horo maslai bisingo habwi hulugo, musuk muski khiwi kwlang thahngo, swrwng nairok phaikaiba phaika phaiya khe ba phaiya. A jila yongkha tei thampwi bai satok jakmani jaga. Bo nukkha kokborok phwrwng nairokni dosa; bolong, hapung , hachuk, twima , twisa, harepek, satung, uatwi, manjagwi ma thahngo, rwngnok nokni simi khensani hakchalo, thangwi a jilani twi, ha, chahmung, nuwgmung bai sak soliya. Twi hamya nwngna kwlaio, khencho, dasto khina kwlaio kisa khenw. Yongkha, thampwi uarjak khe maisingni jora phungo twi tukuwi kwchangwi kwlwima haikhe tho tho kwlwiwi kulum kasao. Milik mwchang bwsak twlang thahngkhe bekreng bukur wngwi ma kiphilo. U mai kutung kamini sochi kanto maidomik phel, kokborok phwrwngnaini sebuk wngma uklogo bini hoku dumjak mwsandwini dosa; bwswk kuphung kotor tongmani, tabuk khe lummaching lumwi pat bekreng haikhe ramprowi thahngkha. Joto jora mogwi tongo, khangar kwbai, mokol thupa baikha, mwkhango lengmani mari.
Hakchal kamio longtoraini yaphngo bini rwng nogo thahngburum kulumo kwlaio, kwcharo mar mar kulumo kwlaiwi sal kwdukma rwng nogo thanhgya tongo, sapung hopung chuak arak nwngwi phegwi baithangni bokopalno swraikha. A duamani joraonw district magistrate rwngnok inspection o thahngo, bono kwrwi nugwi talsni ni bagwi bono suspension o khiklai tonikha. Ibo saichwng sochi kantoni tong deramungya boba twio kulukjak hapung kuchukni twi sakao lupapa buchuk se. Sojol uansugo boboda sochikantoni lamaonw himna kwlaino, bini bojro wngwi chuak tei arak ni bising saklom rutukna nangno. Bwi jotonw kokborok phwrwngnairokno swraio, naislejago, kudio, bohrokni kok sajakkhe bukung koirio, koktwn rogo podrepod kokrok swijago, phwrwngnai rwng nogo thahngya, swrwngnairpkno phwrwngya, nogo tongo popopok achugwi tei nogo tongtwtwi dwi nombori business khwlaio, kami beraiwi tas thwngnani, chuak arak nwngnani, bwrwi cherai twiwi kok banglainani. Eyang khe tal laikhenw beton ni rangle lekhanani pokya.
Sojol jotoni silai uansugo tani khoroksawkbo kokborok phwrwgnairok bwkha tongwibo rwng nogo soi soi khe raida twi jani jani samung no tang manya wng. Bo jila ba kebeng mung tong jeni bagwi kokborok phwrwngnairok abotwi chaya samungrokno tangthani uklok wslukya wng. Tamoni bagwi bohrok bwkha baijakbai, kha barabai, tamoni bagwi baithang no sokomol rinani bagwi yapri se?
Langmao je kainwi kaitham manwi joto ni bara kotor tei doro khe nangkukmani, sak hamkrai, chahthai, nwngthai tei tongthai aborokni biyla jotophurunw nukjago kok borok mastor rokni bagwi.Phwrwng nani samug manwi posting rijago hakchal hakchal kamio hachuk besor busoro. Kok borok sanai khorokbwswk le doli eba mophsolo tongba, hachuk besor eba bolong kwcharni lamani silai hakchal kami rogonw tongo tei jejila kokborok sanairok tongo kokborok rwngnok bo o jilanw tisajago. Kok borok master rokbo abotwi rwng nogonw posting rijago.
Thahngnani laisonani lama kaham kwrwi, tongnani nok kaham kwrwi, khitai nok kwrwi, nwngmani bagwi twi kukruk manthokya. Kami gana gani hati kwrwi, sak hamkrai ni sep kwrwi, hor pherang kwrwi.
Twisa eba holong khola ni twi ma nwngo, sak baithang maimui songwi ma chaho, rang yago tongkhebo painani manwi kwrwi. Sanja wngkhenw o jila langmani yapri thagwi thahngo, borok rok jani jani nogo habwi sanja ni logi loginw mai chahlai thunani luajima nalaio.Gunda sungbo tamo sungyawibo tamo, sal hor joto joranw thampwi akar lai tonglaio. Thampwi siminuda aborokni logi yongkhabo aswkwu satok phaio. Phwrwngmani samungo chubamani talsa talnwini bising kulum kwsao kwlai baio kokborok mastor rok, baksa khecho dasto khio, baksa meleriya manjakbaio, baksa tei kubuni kulum kwsao kwlai baio. Sanjani mwnak ongkhorkhe kok sanani borok manya. Khamakanw jora no pairinani bagwi chuak ni butugo chungwi ma pomo eba butolni arak bukhugo lukhlaiwi pheknani kwlaio. Abotwi nwngmang nwngmang loi wng thahngo tei nwngya hinkhe tongwi manya wngthahngbaio. Kulum kwsao kwlaikhe sak hamya wng thahngo, sak hamya wnghe bwkhabo baio logi. Samung tangnani bagwi bwkhao sarangma eba sago tarma manya wngbaio. Muchungya twitwinw chuak arak nwgkwrak wngbaio. Bohrokni besep bohrokni dukhuno khoroksabo amjogwi nainani gosiya.
Mothani kwbang boroknw bohrokni dora dukhuno siya, ereng ereng bohrokno twiwi jetemete kok salaio, kok bisigra salaio. Abotwi bo salio khencho dasto khimani eba meleriya manjakmani abobo bohrokni chayani bagwi se. Mothani borokrok bohrok no mokol kusu khe naio, borom riya kisamang, kok borok mastor wngkhenw chuak nwngkwrak eba arak nwngkwrak kephek. Buma bupha bwsajwk no kokborok mastor bai kok sunani jorako duna muna wnglaio, pwila koktma thumo, kephek ako de.Abotwi kusukhe naijakte naijakte bohrokni bwkha to kusu kahbaionu phla bo kusubaio.Kok borok mastor rok kha chonglaio, mothao bohrokni borom kwrwi kisamang, jotonw bohrokno tei kubuni juda mokol bai naio jejila tongo sak nangyamnug tei mokol kusu bai nukmung. Aboni bagwinw kokborok mastor rok baithangno mothani simi norwi babaisao juda khe khagwi tonio tei swnam tisao baithangni juda kaisa duniya jejila tongo bini baikhrupjak emangni kwthwi bwsak, sak baithangno kusumung, makjak phola, umorni kharmung, lang kolokya yakarmani yapri, baithangni talikano swraimug tei chuak arak.
Sojol swkango kokborok mastorno mothani seleng hinwi kha chongwi phaimani abobo bwini khuktwi khwnamani kokbai. Baithangni saka kwlaiphuru se abono twiwi yaphang ni simi buchuk kaham khe uansuk nani chengo; twrwk twrwk khe bisingo habo, kisa kisa khe yarungno sininani chengo. Tabuk bo chakrubsugwi sinani bara tongkho.
Je kamio bini rwngnok o kamini bumung twi sikambuk kami, salsani lama; chengdrobonw barnani kwlaio twima aboni uklogo pranwi twisa, lunga, khal, bil, hapung, haduk bwswk tongo abo lekhawibo lekhawi paiya. Thahng laisoni lamato kwnw kwrwi, akhainw bolong bolong, bwlwng bwlwng busuo yak yakung, sakni bukur thwih chorirwng khe ma thahngnani kwlaio nikumao.
Hati barsa swkango sojol twi sikambuk kamio thahngwi phaikha, hoktu tongwi phaimamani. Bo nukkha o jila tiprani mwkhangnw juda. Jora, simung, swkangmung i jila theng theng bwchajak. Oroni borok rok malkhung ni mwkhang nukya, kamini ongkhorya rokto malkhung nukyawinw singli chobaikhwna, radio ni bubagra kwrwi, horh pherang tamo siya. Bo nukkha chwlarok lachima kholopdrop pundari pwichanag phaio’ cherairok sakbukchanw tonglaio.
Huk, gairing, bolong, swkal, mwtai, kulum, kwsa, siyamung, bigramung, kwcham puitu, kwcham loi, kwcham raida aborok twiwinw jora i jila duk buduk kubul jakma haikhe senalo kwchawi tongo. Ma tongo jora i jila swkango swkangnani gosiyana, dugo kwcha ma hainw kwchawi tongna hamjakna. Borok rok sirisitini loi kwcham onw kulugklai tonglaio. Luajima naya kisamang baithangno swlainani. Tei bwkhai le swlainai? Bohrokno khoroksabo lam phunuk nai kwrwi hinkhe. Aro phaiwi Sojol je kubuino sika abo wngkha tipra haste ni bisingo tei kaisa tipra tongo, kaisa tei kaisabai kisa mang solya, pherlaimung sal bai hor. Kaisa wngkha hatina tei kaisa wngkha hachukni. Kaisa jila khe pohor, pirsamung tei naithok hamchaini mel bai kupulum tei kaisa khe thwimere mere chati hai, satung sago nangya thuklup tonijak jabra hai, khasokma manya buma matoi ni bwsa hai.
Tiprasa dophani charchi persent borok sak tarjakya, saknangjakya, naikani khwlaijakya uklogo uslukjak, koton khe tonijak tipra hao tongo. Baithangni dophani hamkraino tibini hinkhe o tipra hao thahngwinw samung tangna kwlainai. O jila tongnai bohrok bai baksa kwthawi bohrokni uansukmung, bohrokni naisukmung, bohrokni kebengmung, biyal akorokno sinani kwlainai. Tei jotoni bara kok kotor wngkha bohrokno hamjakna kwlainai. Da brojendroni kokno bo kaham khe mukthango nangjago.
NB: Kokbilati(English) kokthaih rokni spelling kokbilati raidatwinw khwlaijakkha i kothomayungo, porinairokno confuse ta wngna bagwi koijago, kokborokni spelling khwlaithani takhuk binoy debbarmani dictionaryno kaichomkha. Hambai.
