Drugno yakardi, langmano Hamjakdi – dr. bijoy debbarma

Philnwi (part 2)
Phek Manwirokni Sinimari
Duma, biri, cigarette : Duma tiprasarok siri sitini simi nwngwi phaio, duma chara kaiwi,
torkhe bwlaih phwranwi abono mutio dawi, hoki riwi dabani bisingtwi nwnglaio. Biri,
cigarette bwlaiho eba peparo bulwi chikon, chikon bara khe nwngjago horh phwnangwi
bukhukbai kusup jago. Phunukmari, Montu biri, megna biri, wills philter ako ako.
Chuak: Mai songwi, aro chuan bulwi butuk bising toni sumrio, hati barnwi ulao ojila chungwi
pomwi nwnglaio eba ri yakhe chiakhuk bai tolwi nwglaio. Tiprasarok siri sitini siminw abo
nwngnlaio. Terni jora, mwtai riphuru, kailabri, bulung naima tei thugwi tongthok jora
nwnglaio eba akhainwbo nwnglaio. Chuan bolongni kwbangma buphani yarung, bukur,
bwthaih, bwlaihni simi swnam jago.
Arak: Maini simi juda lamatwi swnam jago. Abo khe bati bogwi thapao boksawi swnam
jago, abo twihai, tiprasarok yak baithang bai swnam mano abono hino desi, tei phalnogo
paijaknaino bilati hino. Phunukmari: Desi koloi brandi, tei kami amchaoio manthoknai
kubuni arak ako. Biltatini juda juda brand tongo jehai, teacher’s choice, blender choice, 100
piper, black dog ako ako.
Ganja: Aboni bilati bumung cannabis. Dalsa phang(plant) . Abo tripura haste, N.E,
Afghanistan, Burma simi chengwi central tei south Asiao belai khe kaijago tei tangjago.
Asiani golden triangle o kwbang khe ganjano kaijago.
Ganjani bwlaih tei bubar bwdakno pharanwi phek manwi swnam jago. Ganja bwlaih no
phwranwi duma hai nwng mano, Indiao sadhurok belaikhe nwnglaio mutio dawi, hoku
swnamwi. Ganja bwlaih tei bubar bwdak no phwranwi Marijuana swnam jago.
Ganja phangni kosni simi Hasish phek manwi swnam jago.
Choras: Aboh bo ganja phangni simi swnamjago. Ganjani kosno samungo thepajago. Abo
belai pahng gwnang tani hinkhe phekmanwi kwbang.
Bhang: Abo dalsa phek manwi, ganja bwlaino musuktwi(milk) eba tei kubuni chahmungbai
sapulwi nwngjago. Abo India hakotoro terni jora bangkugwi nwngjago.
Aphim: Abo bo dalsa phek manwi, phang, bilati bumung opium,. Aphim phangni bwthaih ni
simi phek manwi swnamjago.
Sada tei jordha:Abo duma bewlaih simi swnamjago, baksa abono gungra khwlaiwi
khukchwio pomwi chao, baksa kheba kuai phaitwi bai chaho. Hatio, phalnogo thugwi dal
bidalni jorda manthogo. I phek manwi chini haste tei NE o bohrokrok bangwi chahlaio.
Heroin tei Morphine:Brown sugar hinwi bo sinijago. Abo aphim eba opium phangni simi
swnamjago, pwila aphim bwchwlwini simi morphine tei morphine ni simi heroin swnamjago.
Morphine abo sak hamkraio nangmani mungsa bithi,phiya abobaibo bangkugwi bohrok
phekmanwi hai samungo thepao. Opium India Mexico, latin America rogo kaialio tei
phalaio.
Marijuana: Ganaja eba cannabis nonw marijuana hinwi sinijago. Ganja phangni siminw
swnamjago i phek manwi. Abono nwngmano, bahai nawi mano, chahwibo mano.
Morphine: Abo Opium phangni simi swnamjago. Abo dalsa bithi, phiya baksa abono phek
manwi hai samungo thepao.
LSD: Aboni soisi bumung wngkha lysergic acid diethylamide. Abo bakuma(Fungus) ni simi
ergot swnamjago. O ergotni siminw i phek manwi belai phangwnang swnamjago.

Bithi phiya phek manwi hai samungo thepao: Kwbang bithi baksa bomotomni, baksa
bwkhani, baksa tentromani, baksa lengrimani bithirokno drug nanairok phek manwi hinwi
yachago. Corax, phesidyl, diazepam, spasmoproxyvon ako ako thugwi bithi tongbaio.
Yaba: Aboni teibo juda bumung tongo, Yama,biker’s coffess, kamikaze ako ako. Abo
amphetamine tei caffein i dalnwi bithino sapulwi phan gwnang phek manwi swnamjago.
Dendrite : Abo dalsa kos, manwi thepana bagwi samungo nango. Baksa aboni bahai nawi
pheklaio.
Sakao bumung khujak phekmanwino karwibo teibo dal bidal phek mawi manthogo, aboni
paimari kwrwi.
Phek manwi yachak mani lam: Phekmanwi eba drug juda juda lambai drug addikt rok
yachago. Baksa khe nwngjaknai, jehai biri, cigarette, ganja, choras, chuak, arak.
Baksa tongo bahai najaknai: Heroin, hasish teibo juda juda bithi tongo.
Baksa tongo chahjaknai. Jehai aphim, ganja bwlaih bora swnamwi chahlaio,teibo juda juda
phek manwi rokbo tongo.
Thwilamtwi: Bwsakni thwilamno suchibai phuplawi bithi nao. Brawn sugar eba heroin,
pethidine, morphine teibo juda juda bithi tei phek manwi.
PHEK MANWI TEI BWSAKNI DERAMUNG

1. Duma, biri. Cigarette. Jorda, sada bwlaih :
   Hama thop(lungs) hama lam, bohok, khukchwi, bukhuk bwslaini cancer.
   Hamathop tei ham lamni hamya Chaya, asthma.
   Bwkha deramung, high pressure, heart attack, stroke, paralysis.
   Khunju khwnaya wngmani.
   Diabetes
   Bohokni ulcer eba kwsa.
   Mokolni pohor kwmawi kana wngmani.
   Dakti dakti bua sokmani abotwi thugwi hamya Chaya sago nukjago tei ayuk barario.
   Chuak, arak: I phek manwi thugwi deramung ni yarung. Sago daledal hamya Chaya
   tei deramung nukjago.
   Deramungrok wngkha:-
    Bomotom derario, muitu narukmani phan no komoriwi borokno pokrai
   swnamo.
    Bwkha baijago, bwkha mwnago, suicide khwlaimano.
    Bukhuk, bohok, bubuk tei abukni cnacer wngo.
    Sak kupulum buma arak nwngkhe bini bwsani thugwi deramung nukjago,
   abono foetal alcohol syndrome hino.
    Accident tei thugwi akam bikamo kwlaiwi langma chowi mano.
    Liver sogo, hepatitis, cirrhosis, liver cancer, fatty liver tei thugwi deramung
   nukjago.
    Beswakni hamya chayano karwibo arak nwngkwrakrok kaham hamyani ari
   pogwi thugwi raida Chaya samungo kubulo. Rang kwmao, nok nukhung baio,
   samung kwmajago.
   Ganja: Abono cannabis, hasish, marijuana teibo thugwi bumung bai sinijago.
   Sakni deramungrok:-

 Bwsakni sense derabaio, swlaibaio.
 Jora korow
 Bwkha tei uansukmung swlaijago.
 Bwsak keler wngo.
 Uasukmani phan komoro, derao
 Muitu narukmani phano komoro.
 Emang koro(hallucination) nugo. Budukno chibuk hai nukma, khwtwng no
yong hai nukma abotwi thugwi koromung. Bwsago yong maljakma ako ako.
 Paithago kobor chao, bomotom derao.
 Hama nathani deramung nukjago.
 Bkwha duk duk wngo, kwlwio, tei bwkha kebel wngo.
 Okhalai chao, kwbamang tongo.
 Okhwiya wngo.
 Bwrwirok i phekmanwino chahkhe nwngkhe bohrokni okni bwsa bwtwi rok
thugwi deramungni mui wngo.
 Muktwrwi manya wngo, joto phuru uanajak tongo.
 Teibo thugwi deramung nukjakmano, rang ri kwmawi bigra wngo, samung
kwmajago, nok nukhung baibaio.

Heroin:
Heroin powder no bukung bahai nawi phegwi mano, eba thwih lam twi suchi bai yokhagwi
sago dao. Abono uaisa uanwi yachakkhenw yachaknai aboni seleng wng kwsao
Deramungrok wngkha:-
 Bukhuk, bwslai ransao.
 Bwsak tungphlao, kolomtwi ongkhoro.
 Yak, yakung bwsak hiligo.
 Owkhiya wngo, kwbao
 Bwsak motogo.
 Bomotom derao.
 Mokmang tongna kwlaio.
 Sakni thwilam rmaprow.
 Muktwrwi manya wngo.
 Twihlam tei bwkah(heart) ni hamya Chaya, infection.
 Bukurni infection wngwi kulum kotoro kwlaio.
 Thwihlam twi bithi yachakma bagwi AIDS(HIV) hepatitis B, Hepatits C abotwi
kirithohtok hamyachayani mui wngmano.
 Liver bai kidney derao.
 Hamathopni(lungs) deramung, nimunia, TB ako wngmano.
 Khorok derawi kobor chao.
 Bwrwi hinkhe ri suma derao, bohokni bwsa chokhrai mano.
 Aborokno karwibo teibo kwbangman deramung nukjago.
LSD: I phek manwi tablet eba kwtwi bai sapulwi eba bwtwi swnamwi chahjago, nwngjago.
Lsd ni thugwi deramungrok:-
 Emang kobor nugo.(Hallucination)
 Heart rate bango, blood pressure kwbang wngo, bwsak tungphlao.
 Bwkhao kirima habo, bwkha mwnago.

 Bomotom deraiwi uansukmanya wngo, kaham hamya siya wngo.
 Kobor chawi accident eba akam bikam o kwlaio, suicide eba baithangni langmano
sachowi mano.
 Mokolni nukma tei khunjuni khwnamarok koromungo kwlaio.
 Muktoksa torsao.
YABA: Abo tablet hai khe manthogo, abo chahajago, baksa abono gungra khwlaiwi twi
sapulwi thwihlamo suchi dawi sago yachago.
Deramungrok:-
 Tonthok kokro tongthogo(Euphorira)
 Swrapsani bagwi sakno phangwnang hai ma tongo.
 Okhwima kwmano.
 Mokolni simi muktwtrwi kwmao, thuwi manya wngo.
 Bwsak tungphlao, kolomtwi onkhoro.
 Bwkhani balance kwmao, kisakheno thamsi kajago.
 Jotoni bara kotor deramung wngkha uansukmani phan komoro. Kaham hamyani
ari tei perlaimung rom mayawngo.
 Koro kwrak wngo, bulai toglaio gwdalo, raida Chaya samungrok tango.
 Thugwi emang koro nugo, bwsago yong maljakma hai tongjago.
 Bwkha kwlwijago, blood pressure bango.
 Bomotom derao, Bwkha(heart) hamathop(lungs) derao.
 Kidney, liver derao, chahlam bubuk ako derao.
 Yak yakung kwlwio.
Swkango bumung khujak kephekmanwino karwi teibo tongbainai phekmanwi jehai Dendrite
jeno addikt rok rumalo yachagwi bahai nao abo chini lungs eba hama thop no derario,
uansukma tei bomotomno swlaimung tibio, thugwi hamya phaising bwkha thango, kobor
kokro wngo. Abotwi phensdyl, corax, amipthitamine, pethidinde, akok rok bwsakni thugwi
sakdek rokno derario bomotom deraio, borokno anti-social swnamo, bwkha mwnago,
khorok derawi kobor chao. Nok nukhung baoi, rang khokri paibaiwiwi bigra khangra
wngbaio. Drugni swraimaungnai paimari kwrwi.