Lai kabujak bisi kwtham swkangni kokrokno muitu manjakhe tabukbo tongwi manjakya bwkha khamjago kiting. Mokolni muktwi mokol kunatwi reke rekewi phaijago.Uaisa uisuba sarikni sal twilwlwk jorani hatalni boyar bai khilijagwi kobonwi twlangjago mukumuni thaio. Langmani khurio bamjagwi imang mukthang chekelekjago gana gini rekewi. Toksa toktwini rwchapmung khwnai khapangno tekto jwngjalni haparo twlangjagwi jolima hojwlai chwngjago. Mukumu kwcham bahai poknani chaitokmang chaitokmang lempwrasukha. Oh khalisa bwkha, mwsa chajaknai bwkhaba twmani bujiya wngkhwna sidu! Gairing sakani baikhwlai thwinani muchungjago kiting.
Kiting, khumpui bai halok cholaimani sal kwdwk balukyakhu. Yasi bai lekhawi mankhu. Jora kaisao kiting bai khumpuini halok belai kwrak tai kubui kwthar tongmani. Achomsa twmani buini nasikma juda eba muwani rijagwide khumpuiba bisi kwtalni uatwi manjagwi phang bwlai swlaijaktwi swlaijak thangkha sidu! Mwtairok twmani bagwiba jora kisani tongthokno riwi Birmano khiklaina muchungkhwna. Naila, kitingni bwkhao bwswk sal kwdwkni kha khamwi tongkhwna, mokolni muktwi ranwi tongkhwna, kebo siya, Buma Bupha boya; saka tongnairok simino sawi mananw. Uram uram kha khamjakhe tei uaisa halok manjuphinani muchungjago kiting, khapang rangchakni Jadu, ih bwkhani khachuksa khumpui bai. Bwkha khamjakni kokthairok khengwi samlalai mwkhang nasiklailai kokrok salaina muchungjago.
Kiting bai khumpui rwngnok khungsao poriui tonglaiphuruni simino halok manjulaimani. Kiting bai khumpui porilaimani rem(class) thansa-ya phano kwnwini halok belai kwrak, kubui kwthar chaswmai dwkhwi bai kwrakhe raplaijak. Kebo borokni kwcharo bachaphaikhe langma arina tongo. Eba borokni halokno tansuna phaikhe, kwnwini halok hachalo ma tongkhe kwnwnwino thansani hathaio mang kwthwi nuknai hinwi swmai kwrak tanglaijak. Phiyaba Salsa oh swmairok bebak nokbar bai kobonriwi twlangjakbaikha. Kitingni kwthar kubui halok manjujakphano, khumpuini bwkha buphuru jani swlaijak thangkha kitingbo sawi manliya.
Corona bemarni jorao rwngnok , rwngnokyung, habanok akorok bebak sojagsinai hinwi haphang sakhwlaima bagwi khumpuibo tongwi chawi swrwngwi tongma hostelni nogo thango. Ah jorao khumpui, kitingno kok riwi kwlangmarok bebakno komorwi thangbaio. Nogo thangwi hachal wngwibo Mobil bai kok salai tongnani kok bebak kwmabaio. Nogo sogwywi salnwi saltham tongmani ulono khumpui ni tongmung swlaijak thango. Kiting bai mobile twi kok samarok hano. Khumpui nogo thangwi kami ganani chwla naithok, rang gwnangni bwsa bai halok Kwtal manjuo. Yang kiting abohai koktwma-rok kisaphano sawi Manya.Bo khumpuino aswkheno puitu khwlaio je – bono karwi tei kubuni borok bai halok manjulaigwlak.
Khumpui, kitingno sama tongo, “ Rangchakni aphu, nono karwi ang tongwi mangwlak, nono karwi bui bai nukhung khawi mangwlak. Ani khukni kokya, abo ani swmai se”
Kiting yachago, “ Ani kormo, nwng ano aswkde hamjak ? ”
— “Ani langmani swlaibo hamjago”
— “ Kubuida kormo ? ”
— “Im”
— “Nwng ano karwi bui bai”–
Aphuruno khumpui, kitingni bukhukno bini yak bai muthubwi hino,“ Aphu, nwng amohai ta uansukdi, ang ninino tongnai, ulobo tongnai, thwiyasak tongnai, thwiwi thangwibo nini thanino kiphilwi phainai”.
Kiting mungsa kok pungliya. Salburum burum abohaikheno Khumpuini khurio khorok berawi bwkhani kokrok salaio, jorao mwnwilaio, jorao kaplaikhe kwnwnwino kaplaio. Kapma thakhe bono bo muktwi huwi rio tai kwnwnwino kwbagwi bwkhano metheplaio. Aboba hamjakmung-ni marise-dwla! kha khamjakni swlwkma khorang, kwnwnwini mokol muklele, sarikni sal kwchang jora. Kwnwnwini kha rilaima aswkde tiyari kuthugo kwlwkjak, kwnwnwino silailiya.
Oh kokrokno muitu manjago kiting.
Khumpui tei masa chwla bai halok kwrak raplaikha. Kitingno khogwi mobile twi kok salaio Sapung hopung . Kitingni call eba massage phaikhe hai irai sawi kokya kok pherwi kok saya tongna naio. Haiphano kiting kha koiya. Twmale hinba bo puito khwlaio, khumpui bono kubui bwkha baino hamjago. Yangle khumpui bo bai chalwi tongna Naima bo kisabo siya.
Sal kwbang balukha kiting, khumpui bai kok masaya. Aboni bagwi kiting belaikhe kha tongthokya wngjakha. Call khwlai naimabo block se khwlaijak. Haikhemang talsa laikha. Rwngnok bo khulogwi rikha. Haiphano khumpuino rwngnogo phaima nukliya. Aboni bagwi khumpuini bayaprokno ringwi swngwi saui mankha , “Khumpui oh rwngnogo tei poriliya, bo bini Kami ganani rwngnogo no porina hinwi admission wngwi paikha”. Oh kok khwnai kiting belaikhe dukhu nangjakha, mokolni muktwi mokolo chuwi , bwkhani dukhu bwkhao tonwi tonikha. Aboni ulo teibo saui mankha, “ bo tei kubuni alka chwla bai hamjwgwi tongo hinwi”–— oh kok khwnai khorogo pherang kokjagwi belaikhe jolijakha tei dukhubo aswkhe nangjakha. Ah salni simi kiting belaikhe dukhu nangjakha. Sapung hopung chaya nwngya, Buma buphani swkango huijagwi kabwi mang tongkha. Call khwlaibo block oh khiklwiajak wngma bai belakhekhe jobo- jolijakha. Haikhemang talsa talnwi wngkha.
Tei tamole khwlaijanai bwrwirokse bujiya hinkhaiba tongna nangjakha ta haino. Halokni dwkhwi choywi lolai lolai wngwi narjagwi tongkha ta. Aswk dukhu tekto no control khwlaina bagwi uaisa uisu drugs rok used khwlaina muchungjago kiting.Haiphano ih Buma buphani borom no naharwi tabuksak jora kaham kwrwngno tongkhu. Kisaphano drugs rokle used khwlaijayakhu.
Aswk Kha bai khuk bai langmani lamao logisong sanwi ringhorwi tongwibo kiphilwi phailiya wngwi Kha yokjagwi koklop kaisa swio —
KHIPHIL PHAILIYA NWNG KHAPANGNI JADU
Gairing nugulo khangar yak sungwi
Tei waisa kiphilwi phaiphinw hinwi
Nasingwi tongjama khapang-ni jaduno
Puitu bai halok khaui.
Nwng phayanw hinwi
Khumbar barsa kholwi narwkma
Buphuru Jani babwrai chalangkha hoywi
Khapang-le dwksa wnglangkha wanaui.
Kok rwlaima kha-swmai tugwi
Langmani logisong swnamna hinwi
Thinang yakhwrai bolai
Kha bai kha-no manjuwi.
Achomsa chini halok-ni kwcharo
Biyangni boyar ba sibphaikha
Chaswmai-ni duk chowi
Holok tansujak thangkha.
Muktwi-ni twisao kochogwi
Sal hor mukumya serekhe yakarwi
Ma tongkha jaduno khatang khatangwi;
Logini kagwi hachalo thangma ba
Langma-se chotwtwi.
Kha khamwi swlwksai phaio
Ah jora methebna phaigwlak kebo
Jadu tini-bo nini mangpili naywi
Khapang yoksao swlaijakma nugwi.
Kubuino nwng kiphilwi phailiya!
Puito-ni halok phonwi kwraikha
Langma-ni lama kuphungsai phaikha
Himnani phan belnani nangkha.
Langma-no bedogwi risinai nini samo
Kubui hamjakma phunugwi
Hayung-no yakarwi thangsinai
Muktwi-ni twisao kochogwi.
Aow langmani kothoma Sana thangkhwlai mokolni muktwi yoro, khapangba khatangwi phaio, thinangni yakhwrai baywi kwlaio. Langmani lamao himnani phan belwi phaio. Kubui hamjakma pogwi Manya, poknani hinbo oh khalisa bwkha bujiya, poknani rwngya, pokmani bithi tongkhwlai bo masingno bithi chawi pogwino paikhamu. Ahaile kitingbo bwkhale kahamjase! Tei tamle khwlaijana tongba langmao wngna tongwino wngsio ta, gothokna tongwino gothoksio, malaithai tongwino malaisio ta. Thangnai borokse thangwi paikhaba , bono da tei pun boya musuk boya sotonwi narwk Mansi. Thangsithun thangnai borokba, kaham kwrwngkhaino halok Kwtal manjulai tongthok mwnwi khe tonglaisithu. “Phiya anikhe tamo wngnai, halok Kochoni Mari hujagwide thangnai? Ih hayung komoryasak hujagwi, komorwi thangwlak. Jaduyoi, Oh kokno muitu narwkdi”.
