Kokrwbai bwlai wngkha kokrwbaini hamsanani lama. O lamano romwino swimung achaio, swinai achaio, kwtal imang tei kwtal uansukmung achaio. Kokborok kokrwbaio kokrwbai bwlai bisio kangsa kangnwi khwlai kwtal swinairogni saktharwi tonglaimabai ongkhorwi tongo. Baksani bisio kangsa, Baksani bisio kangnwi, Baksani bisio kangtham akoro akorog ahai khwlaino ongkhorwi tongo kwbangma motha eba sakbaithangni saktharmungbai.
Salmari 26/11/2022, Jora Damnwi jorao Swikwrwng Narendra Debbarmabai komthingjak Jorani Khorang habanok “Rwbai Nogo” Hatal Kokborok Kokrwbai Bodolbai “HATALNI BOYAR” mungwi bisio kangsa ongkhornai kokborok kokrwbai bwlai Swikwrwngrogni yaktwi phiyogwi rwjakkha.
O kokrwbai bwlaino phiyogwi rwkha Swikwrwng Bijoy Debbarmabai Swikwrwng Narendra debbarmani yaktwi. Logio manjakkha koklopnai Shyamali Debbarma, Samir Debbarmano khobwi komthingnai Subhendu Debbarma, Rostam Debbarma, Dhiman Debbarma, tei Prijesh Debbarmasong.
Kokrwbai bwlai phiyokmani ulo Swikwrwng Bijoy Debbarma koknarwkthani sakha “Kwtal jorani siklarogno samung ma yachaknai, chini soi kokrwbai, kokthai, tei laibumano teisa kwtalkhe mwthangwi ma tubunai, Bui kwbangma sijak nukjak dopharog chini laibumano borokni muchungwi snamwi twlangwi tongmano soi soi kokthumni bisingtwi kubuino ma swinai.
Aboni ulo Swikwrwng Narendra Debbarmabo bini kok narwkthani sakha “Siklarog kubuino kubui, tatalno tatalno sininani sanani phan tongna nango, Bwkha nangriwi bui ahai khwlaio, bo ahai khwlaiya abohai rogo naichomwi siniwi tongnani bagwi kokkwcharkha. Logio koklopnai shyamali Debbarma, Samir Debbarma sikla bwrwi bwsarogno jora kariwi swinani kobokkha.
O pandao Tripura Universityni kokborok bedego MA khwlai tongnai kokborok kok hamjaknairog phaimanjak phaikha.
