O holongni takjak mangthong
Tamoni bachai matong nwng thongthong?
Khuk tongwibo kok thaisa saiui manya nwng
Haino tongjao bachaui nwng saichung!
Mang tongwibo nini langma se kwrwi
Bahan tongwibo nini bwthwise kwrwi.
Bukhuk tongwibo nini bukhuk kwrwiswk
Khunju tongwibo nini khunju kwrwiswk
Mokol tongwibo nini mokol kwrwiswk
Yakung tongwibo nini yakung kwrwiswk
Yak tongwibo nini yak kwrwiswk.
Nwng kaisa holongni takjak mangse
Borokno kosolkhe takjak mangthongse.
Mukumu narakna bagwise nono swnamjago,
Phiyaba laibumao nini mung swijak tongo.
Tamo khe nwng saui da man?
Nwng tamoni bagwi takjak eba swnamjak?
Nono borom rwui khumni mala kanrilaimani
Dup satrai sogwi borokrok nono khulumlaimani.
Ter songchalaiwi, panda khlailaiwi
Nini yakung yaphango baroklaimani
Nwng saui da man aswk nono twiwi khlailaimani?
Nono twiwi bwswkse swijakkha laibuma
Burung burung bijab kwbangma
Nwng tini kok saya phano chwngno
A laibuma kwthang kok sao chwngno.
Nwng chini dophani kwthang mukumuse
Nwng chini kaisa dophani sinimungse.
A sinimungno chwngno tabuk kwthang tonio.
Holongni ayuk bai baksa ayuk logwi
Hayungo dophani sinimung rwna bagwi,
Nini mangno kosolkhe holong bai takjago.
Nwng kwthang wngwi kok saimanyaphano
Nini laibuma koksao chwngno kothoma wngwi
Nini yakung bai nwng himwi manyaphano
Himnani dagio nwng kwbangma borokrokno.
Nini mokol bai nwng nukyaphano
Mokol nukrwo nwng saisai borokrokno.
Nini bwsago thwi kwrwi phano
Thwi kutuk rwo nwng kwbangma siklarokno.
Phwrwngo nwng chwngno laibumani kokno
Dophani bagwi samung tangnani jotono.
Nwng se chini dophani hukumu
Nwng se chini dophani mukumu.
Nwng chwngno laibuma chernani phwrwngo
Nwng chwngno laibumani kokno muitu manrio.
Nini jarwi se chini laibuma kwthang tongo
Dophani mwkhang chwngsaui tongo.
Nini mangthong bwchaiui tongsak
Baiwi hao pwtapsa kwlaiyasak.
Koksamang tongnai nini o mangthong
Laibumani kokno khursaui kusung kusung.
