Bisi chibahai swkang Jorani kok. Osa sampajak satukura twisa, tok bokhor hachwk bakhogwi Huk chanairogbo Garingo kasamani kamio kiphilbaima jora, kheto khainairogbo mai tangbawi haba yakarjak. Yang kami yakarwi aguli khowairogo rwng swrwngwi tongnairogbo osani bagwi nogo phaijakmang. Kok thaisabai jotono nogo phaijakmang wngwi nukhung khung chibani Mayungkhor kami tabuk tongthothok wngjak. Sarik sal twilwlwk wngkhai kamini bwkhwrwi bodolrog osani thwngjaknai manwibai thwnglaio, siklirogkhaiba osani sabo tamo ri paikha taklai tamo design ongkhor buphuru ri pailainai ahairog salawi ha ha hi hi wnglaio. Kamibo mojomo kotorba jotonino haba hukba paijak, nogobo chana maini biyal kwrwi hinkhai Mayungkhor kami tongthokma judano wngu. Goriyaphuru lama buphurukhai jotono kurum kuthumba kami hohom dodom wngwi tongu. Kamini babaitham bwkhago Mai kuplung awar, kamini salgra bwkhago wathwilwng hapung, hapung ayang narokhai Bangla ha. Hapung sakao kasakhai banglani twima twisa awar nukhulai tongo. Hathai rekeui twisa kwthang yorwi Mayungkhor kamini awar kwchartwi lawi thango. Kamibai gwdaljak twisani mungbo mayung tuku. Godok motomdrop Athuk-Khangraini bagwi hakchalo thangna nangya. Enchi twiwi swrapsa jangrikhaino mui thokya hinwi yasi buchukbai mai khochana nangya. Watwi joraokhaito muihamjwkrog mojomono manlaino. O twisa bangla bai nanglaijakni bagwi Muihamjwkrog ayangnino phaio.
Thaipung-thaichuk kami khonwino kaijak. Bisi bachini swlaibo kwbang umorni thaipung thaichuk kamino kwchangdodo khawi tonio. Aborog Sompraini bupha Dongdari kailangmani buphangmang. Somprai bisinwi swkang bupha Dongdari mwtai chalangma ulo Mayungkhor kamini chokdirini barja yachago. Sompraibo thaichuk thaipunghai khawino kamino saklom riui tongo. Kami khungsani lukuno baithangni nukhungni borokhai khaino nugu. Nogo wathop thopsa rikhaibo kebono karwi chaya, ebakhai nogo wak bwtharkhai diboro bwthwi songma nokburum tunma karwibo bini nogo kuthumbwi chalaio. Horobo bubuk bokhorok chakhwi songkhai ahaino khaio. Teisi yathek khunjurogkhai bwtharwi kwragwi phalnairogni bagwi Mosdeng dengwi logio twksa khatiui tonio. Semao bwsajwk khoroksa tongmano Manu bwkhak kawi rohorma ulo tabuk nukhungo Bihikbai khoroknwi susung. Khetoni mai balwi rwkana, nokbra sap sutura khwlaina jora jora hati wngwi riphainani simi chengwi tok masa ratharwi sogwi akoi kwragwi rinai Sidam Baruwano karwi tei kebo kwrwi. Kok thaisabai Chokdiri Sompraini nogo kethek methek Samung khainai Sidam baruwa. Toksa kuriya ,punsa methuwa thwiwi machanaibo Sidamno.
Aboni bagwino Sidam Chokdirini bolai bolaiwi “chini Dasonghai Maya gwnang Chokdiri ang nukyakhu, Judistirhai kubui borok.”
Tini phasal, Gantharai hatio chokdirini wak bwtharwi phalwi phaibawi Chokdirijwkbai twksa rijakmano Malen beparibai nwnglaina achukjak. Chakhwi chaui wainwi waitham Tengi nukjakri nwngkhaino Chokdiruno Judistirbai sursaui bolaina chengsapkha. Chokdiribo nwngu-chaosi hinphano sakni boromno narwgwi tonina kwrwng, phegwibo buihai ligi lagai kok sanai boya, pencha logwi tongnai boya. Bini lama bo phuru phuru nwngwi tongnaijat. Sidambai bolaijagwi khopsa kusubwi chungi yakarwi sao-“akon lukuni kaham hamya naikolna bagwisi Chokdrini barja yapharjakmaba ani je khwlai mansak khwlai tongjao.”
Chikdirini kok thakkhaino Malen Bepari chungi romna naima yakarwi sao “ chini kumui Sidamni kok erengle wngya, kamini borok simiya, amchai gwnangwisi Judistir hinwi sakhai nonoba siniyasi kwrwi.
Sana thangkhai Sidam Baruwano Sompraino Judistir hinwi mung lairisio. Aro uro baruwa wngwi thangkhai kicha micha pandao achukkkhaino bini Da Chokdirini kokno bolaiyaui panda mwthagwisi manya. Aboni bagwino Judistir hinwi sakhai kaitham kaibwrwi Moyalni borokrog Sompraini mungni logio bini nogo Musuk Al jortham tongma, kheto kani chuku tei chokdrijwkno Jiraniani hamjwk tuma bebakno saui manbaio. Abo simiya Sompraino Hamjagwi kailai pandao bwkra rang khok bachisai rijakmarog khuri togwi nukjakmaswkkhai amchaini borokrog saui ribai manu.
Sidambo ereng erengle bolaiya. Somprai bwkha kuwar borok, kebo solok ari sanphaibo kebono yak bukcha kiphil riya. Sidamni bupran Mongorai B.A pawi tabuk aguli sebuk khwlai tongmabo Sompraini jarwinota. Mongorai rem chinwio kakhaino biyalo kwlawi choping chapang wngwi tongmano nugui sompraino je nangma bijaprog pawi pori rikha. Aphuruni simi mongoraino rwng swrwngthani bokhorok kaham nugui je nangma naikolwi B.A pairikha. Bono abohaikhai pori rima nugui Somprai kwbangma khunju ketaijaknai kokrogbo khwnana nangkha. Bwsajwk songdari Kormotibai kaina bagwi bwsa haikhai naikolwi pori rio hinwi rogo tai tai sajakna sajakna nangkha.
Jesaphano wngthun bini jarwisi mongoraini langma swlaijakmaba bobo chokdirino mwtai haikheno borom rio. Agulio tongphano Goriya-Hangrai kubuni bosor joraokhai Chokdirini bagwi Chokdribai Chokdrijwkno ri kwtalrog riphaina koroya. Kok kichabai sakhai Mongorai Sompraini bwsahai.
Sidam bai Malen Bepari twksabaino mojomo hor thuklaikha. Sompraini nokno karwi Mayungkhor kamio tei keboni nogo chati chwngliya. Yaksi yaksi siring sorop wngjak. Malen bepari pencha kolokni bagwi doi yakarwi manlaiya hor thuklaikha. Sompraikhaiba borog nwnglaima ganaono rokotwtwi muktrwioda ebakhai sichajakda borogni kokno Au! Au! Simi hinwi logi riui tongu. Hamung siniya kok salawi mus nanglai tongma joraono noksaro tongnai Merwng bok sari bok swngwi rimabai sundrujajlawi nok bisingo siring sorop wngwi thangu. Kharo kharokhai Mereng swngwi tongma logiono phataro ‘omago’ hinwi Dopsa kwlaima khwnaui Chati twilai khorokthamno ongkhorwi phailaio.
Doga phiyogwi naiba sabobobTikaro tawakhai kwlaijak. Somprai chati twiwi – ohma! Mwtaida wngkha-ataida wngkha sabo boroni phawi ahaikhai kwlai tongphaikha” hintwtwi ganao thangwi nugo, bisi thamchihai umorni chwla khoroksa pant kolok thorchaui kanjak, genji chumjakz rirog harpek nangjakmang. Ogo mai kwrwi jora hacham kasaui lengjakmahai bukhuktwi kok peplaya bohok simi lephu lephu khawi hama so so wngjak. Swrapsani ulo chokdirijwk khorogo twi bumang bumamg yang naro tubui mankha, tophanosi bwswkbo hakchalni phaikha, bwswkbo okhuwi phaijak sichauibo sago Phan kwrwijakna, kok sanabo saui manya. Tukuri musuri rirog swlai ribawi mai bwtwi khanijagwisi Malkhungo thok dakhai Engine samung khwlaimahai binibo bohogo kichaphano sogwikhaba bokhorok samung tangna chengkha.
Mai bwtwi nwngbawi achomsa “o mwtairog ano khairokjabadi, ano mwthangjabadi hintwtwi chokdirini yakung romtwi romtwikhai khulumna naio. Tamoni bagwi khairokna, tamoni bagwi mwthangna yaphang buchuk rombwi manjaklaiya Chokdirisong bono waisa bono waisa muktak muktakkhai nasiklai mwlang chalai tongu. Ta kiridi, ta kiridi chwng tongbla’ hinwi simi chokdiri bandio. Bandijakmabai wngjakya swlwkjak bwkha, bini mwkhang loksisi mokjak, durarani chandari ha kwranni jabrahai bukung mayungkhor kamini borokrognibai solthaya loksisi, bini sakduk kok sao, o borok biyalbai tukujak. Sidambai swngjagwi sikhok romjagwi swngjakphurunihai hoisene koisene khawi bini sinimung rio- mung Suren, Buphani mung Narayan Baidya, kami Kamalpur bakhak.
Chokdirini khorang kwtwibai boro phaima, bahaikhai oro sokphai swngjagwi suren sao- ayang twi haching kamio musuk paiwi kiphil tongmani himte himte horbo wngwi thangkha, Twi korma parao sogwikhaino ano Musuk sikhok hinwi kasui bulaikha. Musukrog Rangrog sabo segwi naharbaikha siliya. Kunumote kharwisi langma simi manbusio. O kokrog satwtwi kha khamjagu Suren.
Bini kok khwnaui jotono kwchama bwthai thaijagu. Kebo mungsa saya sinino Chokdirino khulumbwi o Yong phola bomdrom salnwi salthamswkphano ano nograi swnamjadi, muniphano khatiui tonganw hinwi kapna chengo. Suren aswk khairokjaknai laibuma saui khwna riphano bini kok sathani wainwi waitham yakung romna naithani, phikungrog kirikjak nukthani Chokdiri kubui kothoma kothoma huijagwi tongnahai matongjago. Chokdri wansugo Twisatwi Muihamjwkrog toksaui phaimahai Suren hapung toksaui phainaisi. Surenbo kahamkhaino sio, Tar busu nangwi kirikma, ari mwrwknairogni yakni yogwi phama kubui patimungno saui manwibo Mayungkhor kamini kiphilna nangya.
Jesakhaiphano Chorahai bothop thumdrop mankhaisi wngkha abono Suren phan thonwi phaima. Buini mokolni muktwi nugui manya bwkha kuwar Chokdiribo Surenni kubui laibumano rombwi manphano yak bukcha kiphil rina bini thani aswk kwlaiya, “ otithi devo Bhaba” wansugwi Surenno bothobo chitogo
Surenni bwkhano tei udru mudru khwlai rina nailiya. Nogobo samung khaichurunai nangwi tongmaba orono tongwi mano hinwi sao. Chokdirini o kok khwnaui Masing siyaribai sal pasaui manya wngwi tongma siyaribai siyari kuksaui chumui besero kormolwlwk salni pohor ongkhormahai Surenni mwkhangbo chwngma nukjakkha.
Suren borokni khano swlakna kwrwng. Khuk kwtwi, tongma koinene, dagijakmano ihi hinya. Sal bangya sanino kamio bai kumui, yong, Nana-Dabra halok boui bini jaiti swnam paibaio. Swkangono sakha samung tangthanibo dagijakma swlai au hinmasi dou. Samung khwlai manthun manyathun abo ulni kok, tobo au thaisale khukchwi kinaro tonio Suren. Chokdiri sakrupjakphuru bwsak sinnani, khwnai kuphur phuwi rinani, dagijakyai Mairang hanta sunani, duma swgwi rinani aborogkhai bini salburumni dagijakna na nangya samung bwtang.
Chokdirini Khano simi swlakkhai wnglak, Chokdrijwkni khanobo swlakna nangnaible. Abo suren phaiphuruno bokhorogo daui tubujak. Chokdirini khano swlakna bagwi kolomtwi khiklawi samung tangna nangya Surenni bokhorok thaisano simino wngu, Suren tabuk mokol baithang nukphawi teibo saui mansukkha.
Chokdirijwknobo mui awan hulchuruna, bati bokthani bati twi swlainani simi chengwi arak hade hamkha hamya chanawi sanaibo Surenno. Kok kichabai sakhai sal kisani busingono Suren Chokdirini nogo som wngwi bachakha. Bini o tongmungrogno nugui Chokdirito hakchalni koksi kamini lukurogphanosi Surenno buphuru nogo kiphilnai hinwi swngraknai kwrwikha.
Naite naite suren Mayungkhor kamio taldok lawi thangkha. Aswkni bisingono bini yarwng aswkkhai rakkha, chokdirini hao Chokdiri bubagra wngkhai Suren Montri. Kamio bubagrani kok jeswk samungo phwnangjago, montrinibo aswkno nangu. Mui thokya, mui som nangya, mai kwthwng kherep hinwirogo kok bangna chengkha. Nogo wak bwtharkhai Sidamsong aginihai mukhi kakya khawi yathek-bokhorok ma warliya. Kamini lukurogbo pal baksa chakhwi chalainarog ringjakbailiya. Bwtharwi phalkhai yongbwrwi belai pechal ma nangu, aboni swlai kwthangwi phalkhai teisale mano, ahai irai saui kwthangno phalawi rohoru.
Hati wngna bagwibo almarini rang bwswk karina kariya tabuk abo Surenni thaniosi surani. Akon Sompraibo umor raui phairwrwkba je mansak samung heleng rina muchungjagu. Aboni bagwino bebak som-berma hati wngnaile nokni Montrisiba surani bini yagono tongthun hinwi yapharwi tonio.
Siyan kwrwng suren hati wngburum tini kicha khwna kicha khaikwlawi narwkmano bwkha kuwar Somprai saimannabo naiya, Surenni sakao puitu simi pojasa.
Phiyaba borokrog thok-khum phulwi talka pilanda khawi matongphano tumung sago chor kongsa hapjak tongkhaino thok-khumni kokno pogwi thangu. Surenbo abohaino rang bechep bechep solao ma daphano, Mairang mijil riui chakothok abuskhai machaui tongphano chaui ok kwlaijak. Thutwi chatwi khao chor gwnang khep khep wngjago. Je naharmungno twiwi swmai tangwi Mayungkhor kamio yapri sephaimano sowi tongnani aswk kwlaiya. Naharmungno supungna bagwi sal kaham nasingmang lairi rohorkha tobo samung chariui manyakhu. Hati tongkhaino Goriya sal. Amtwi bosor jorao hinkhai borokrogni kha sarangjak tongthokjak, naslema kena ari tongphanosi kwthalaima nakarlaima nukjago. Suren diborni diborni mai chabawi thuyambo rokotwtwi o kokrogno wansugwi tongo. Bo wansugu- “jesaphano wngthun bwskangni Goriya salono bihik tei bwsa khoroksano khobwi Buma randino Mayungkhor kamiono naharwi phaisinai.”
