O Nokhayung tei hayungni bebak manwi khwnwino Jorani dwkhwibai khajak. Hayungni langma gwnangrog bebakno jorano romwi thangwi tonglaio. Jorano romwi manyarog o hayungni kwmai ma thango. Kokborok tei hukumu mission Achaiphruni simi baithang choba khlaiwi jorabai baksa kok, kokrwbai Tei hukumu mukumuni samung khlai phaikha.
Abohaino tabukni o Digital Molo borokrok bijapno yaphao twilai porilaima jora,Hachal hachal hakotorogni laitesakhe bijap porilai tonglaio.Omorog bebak Jorani bwthai.
Kokborok tei hukumu mission kwbangma sal romwi Digital formo yapri rwna bagwi uansuklaimani tongo. A uansukmano samung thepaino Thanai 19th November 2022 Salmario, KOHMni President Bg. Dr. Bijoy Debbarmani nogo Kaisa Pandani bisingtwi Kholongma kokrwbai mungwi kaisa Digital formo Website phiyogwi rwjakkha. O pandao Hasteni Koklop kwrwng Bg. Chandra kanta murasinghno khobwi Kokborok Sahitya sabhani President Bg. Bikashrai Debbarma, KOHMni kwcham President Bg. Chandramani Debbarma, tei KOHMni President Bg. Dr. Bijoy Debbarma akosongni manjakmabai i panda chengjakkha.
O pandao lamsokmung koknarwkkha KOHMni General Secretary Bg. Bijoy Debbarma, Panda komthingkha Sharmila Debbarma. Kholongma kokrwbai website phiyoknani swkang Rangchak budul Naisi Debbarmani khuktwi koktang thainwi khwnanani mankha.Tei logio Koklopnai Bikashrai Debbarma,Lincoln Murasingh, Rostom Debbarma akosong koklop khuktanglaikha. Paina nogo Website phiyogwi rwjakkha TTAADCni Education Bedekni Executive Member Bg. Chitta Ranjan Debbarmani yaktwi. Paithago Digital formo Kokrwbaini website tabukni jora tangwi nangsuk aboni kokno sukurubwi sai khwnarwkha KOHMni President Bg. Bijoy Debbarma. Bo koikha hasteni borokrokno websito thangwi porina bagwi. Porina bagwi Google thangwi “Kholongmakokrwbai.Com/”hinwi swikheno website mannai hinwi sakha.
