Kokborok Tei Hukumu Mission 1993 bisini simi Kokborokni bijap Karina samung Chengmani. O publication bai Kokborok Kokrwbaini munggwnang swikwrwngrok kwrwngjak tongo aboni utungono kwtal jorani sikwla swikwrwngsongbo gwdaljak o publicationbai. Abohaino KOHM ni Achukphang swikwrwng Dr. Bijoy Debbarma ni nogo bwsate panda khwlai 03 Talyung 1433 TE chasalo KOHM ni chaitokmungbai tei Kangba Bijap Kokborok Kokrwbaino hamjaknairokni thanio phiyogwi rijago. O kangba bijap kokborok kokrwbaino kuchuk beremo tisathani yakhili wngnai hinwi sakha KOHM ni achukphang swikwrwng Dr. Bijoy Debbarma. O salo KOHM bai phiyogwi rijak kangba bijaprok wngkha 1. Holongo Swijak Kokbiti (Koklop Bijap ) swinai Dr. Bijoy Debbarma(President KOHM), 2. Republic of Jailand (Koklop Bijap) swinai Chandramani Debbarma( ex-President KOHM) 3. Tipra Jatir Baghyo Biporjoyer Mule Shree Dashrath Deber Bhumika swinai Lt. Aghore Debbarma, 4. Tipra Jatir Bishoye Binoy Debbarmar Nirbachito Lekha, 5. Hapingo Srapsa( A collection of Kokborok Poems Exclusively for Womens poets along with their short Biography) chabnairok Pihrsati Debbarma & Sharmila Debbarma.
O bijaprok thangnai Bijap tero phiyokjakna tongmani jorani bising press ni sokphailiya wngma bai phiyogwi maliya hwnwi sakha achukphang.
Aghore Debbarmani bijap kwdwkma swkangno bijap swijak tongmani kebo khoroksa abono tikhwlaina soiya eba gosirakya, bo bijap karina naikheno ah jorao tongnai haphang,Borokno tikhwlairwna gosiya. Bo aboni ulo KOHM no yapharkha o bijapno.Bini bijap o swrai swrai swijakha India Govt.bai Tripura kwthamani ulo bahaikhe Tiprasa bosong norjakha tei tamo tamo patimung wngkha jotono sukurubwi swijak tongo. Abono karwibo porimani bisingtwi kaham knowledge mano tei bijap porina belai nangsugmani kokbo sakha KOHM ni achukphang. Abono Karwi “Hapingo Srapsa” bijap kokborok kokrwbai eba Tripura hao omono puila bwrwirokni wngwi bwrwi swinairokni simi thumjak koklop tei bwrwirokbaino chabwi karijak bijap.
Kokborok kokrwbai bijap ni bechepbo sana thangkhe chini bisingo soi simung sokphaikha eba sikla soknani chengkha haiyakhe risa sorchana chengkha. Chini borok bwskango phaiwi tongo bijapni berem o tei rangbo ajiwi tongo. Joto bwthai phunuksanai Kokborok Hukumu Mission no hwnwi chwng chirigwi sawi mano hwnwi sakha KOHM ni Achukphang Dr. Bijoy Debbarma. Abono karwibo alaida khwlaiwi a salni koktwma thumanirogni pandao tongo KOHM ni tangphang swikwrwng Binoy Debbarma, Sharmila Debbarma, Shyamali Debbarma no khobwi KOHM ni adongsong tei kwtal jorani sikwla swikrwngsong.
Kokthumnai Dhanuraj Noatia (editor of Kholongmakokrwbai.com pub by KOHM)
