Kwbangma swkangni salni kok. Jora kaisao khoroksa bubagra tongmani, bumung munuipha. Hayung sakao khoroksa cherai achaiwi bumani bohokni simi onkhroma uklogo kabgrao. Phiya munuipha muse munuigrao khorang kotorkhe. Bubagra bai isri tongthogwi khajawi bohrokni bwsani bumung narugo munuipha. Bumung munuipha tei munithanibo bo jotoni kwplai. Bini khukni kok chengho munuimabai paio munuimabai. Tei bini munuimao tongo jadu. Bwi jotonw bini munimano kha phurjago, hamjago. Abo bubagrani phanbo.. Mungsa samung jesek phano kutuk wngthung bubagra bono munuimani bisingtwi milik mwchang khe pairio. Munuimanw bini samung charimani lam tei phanbo. Bini mungbai bini habo sinijago. Hakchal sampa tei kubuni bubagrarok jotonw muniphano sinibaio, kha bo phurjago, chabo chajago. Munuiphani sengkwrakrok aswk phan gwnangya babo bangthaya, silai pertham, seng ako aswk kwrwi. Hinphano phangwnang bubagrarok emangobo uasnsukya bini kena wngna bagwi eba bini hano sekna bagwi.
Bubagrani lukurok bo bubagrano hamjakbaio, bubagra jehai munuikwrwng tei abotwinw khasoknabo kwrwng. Bini hao mwchya manwngya kwrwi, bigra khangra kwrwi. Bulai, suklai, toglai, ualai bo kwrwi bainw kokbaksa. Jotonw kwthalai milik mwchang khe tonglaio.
Abotwi tong kwchang jora achomsa chwmwi bukcha nokhao pherang koktwi bubagra munuiphani mukhangni simi munuima kwma lango. Bini mukhango onkhorwi phaio tangblani chwmwi kosom lobjak nokha. Joto phuru mogwi tongo, mokolbo mwnak, mukhangbo mwnak. bukhugo koklam kwrwi. Bubagrani montri, biti kwrwi, sipai, birindia, ochai, chonta, seleng bailing jotonw uana jakbaio. Abo tamo wngma kwlaikha. Lukurokbo uana jakbaio, noyungmao de chukli wnglai hinwi kokrok kasao. Bubagrani montri, uasnuk kwrwi, biti kwrwing rokni saka borokrok thamsi kajak baio. Joto bai borokrok kabnani chenglaio, baksa chahmun nwngmungbo karnani chengkha.
Ochai, chontai diari kao, sema naio, thikana naio, thugwi mwtaino chaklaio mungsa samungo chukya. Kobiraj, bithi kwrwng ringkha bubagrani hani tei buini hanibo sokphaibaikha, bithi mungsabo samungo chukya. Bubagrani mukhang ni
tal thwison hor tei kutulya.
Bubagrani munuimanw phan, aboni bagwi kenabo kwrwi. Phiya o munuima bubagrani mukhangni simi kwmakhe o phanbo komornai aphuru phan gwnang tei kubuni bubagrarok i hano sekana bagwi phaibainai.
Teile lerwi chaya mungsa le mungsa lam ma kairingnai. Montri , biti kwrwng, uansuk kwrwng joto kuthumlai kok chaplaio. Bubagrani hao tei phatarni hao bo auai khwlai rio je bubagrano munui riwi mannai bono khoptek kaisini rangchak richak, rasa mala, langma kwrwngwi chuak butuk, ha teibo kaham kaham
yakpai yaphar jaknai. Bebak phaising noyungmani adong song pirjakbaio tei kok pirlaio.
Noyungmao bwtang bwtang khe borokrok kuthum laio. Pwila sokphaio khoroksa naithokti, phatwi laih hai khukchwi, beloso kwlwi hai yasi, muiphrai bosok hai bwchang tei muani kupulum mokol. Hayungni thung naithokma o bwrwimani mukhango rwngjakphaikha. Bo sokphaio bwchang kolowi sak nangterya wngwi. Bini yago tokphringni(Peocock) bwkrang. Tini jorako bo abotwi chwla malaiyakho bini mokolni bolong kuthugo kwmaya. Bini puitu bubagra bini naithokmabainw munnai, bini bukhugo munuima kiyoknai.
Phiya bini puituo tokha khilango, bubagra bono nabo naisukya. Philiksa phano boya. O bwrwimani boromo nango, aswk kwlaikhede bo chenanai. Bo bwkha baiya yakni tokphringni bwkrang bai bubagrani yapha, phemai kheb ketogo. Bubagra holong hai thir. Kab kabwi bwrwima noyungma yakaro.
O bwrwimani ulo khoroksa kok kwrwng sokphaio. Bo sao abo mungsaya, bubagrano munuikothok kok khwnarikhe bubagra munuiyawi tong mangwlak.
O borok kok munui kothok sao: Bubagra, jora kaisao khoroksa butua tongmani, bini kami ni khoroksa naithok bwrwima siklino hamjak kha, phiya bo lachiwi sarakya. O bwrwima korai kana kwrwng tei bo jotoni bara bini koraino hamjago. Bini kichingsong sakkha butuano o bwrwi sikli ni bwkha manna hinkhe pwila bini koraino ma hamjaknai, bini khitungno motom sudi. Kichingsongni kok khwnawi butua kukubuinw o
bwrwimasiklini koraini uklok thahngwi korai khitungno motom sukhe korai bai lathai rijagwi bukung bua kakkha.
Noyaungmani jotonw bohok raksawi munuilaio khorksano karwi abo wngkha bubagra. O borokbo mukhang kosom khorok bomwi kutul lango.
Tei khorksa phatar hani kok kwrwng sokphaio. Mwkhang bo bini munui kothok. Sengkari tungsa tungsa, tei khochai bo tungsa, abo lokhlaio hao dorong diring. Bukhuk mwkhra hai khuyik muyik, bwi jotonw uansugo bubagrano bonw munuiriwi mannai.
Bo kothoma sana chengo: Bubagra, ani kiching khoroksa chuak kephek salburum thaihsini chuak butuk, luta kaisini arak nwngyasak bo aisi kiyokya. Ani marebo belai naithok tei ani yarbo bono jaichari hamjago. Bo salburum burum bini tei khoroksa kephek bayap bai achgwi chuak arak wnglaio. Hor kuthugo kephek wngwi nogo kiphilo. Bini nok bwsakngo buphang tola uakma masa khajak tongo. Ani yar kephek wngwi lam himtwtwi uansugo bihikno bo hamjakma yapharnai. Phiya bo lamprao sokphaikhe bobo nok bobo doga korow. Bo hor burum burum bini uakmani khislangno motom suwi uakmanonw kwbagwi thuo, phugn aikhese bo thorsa sundruwi nugo bo uakmano kwbagwi rokojak. Abotwi khe sal paio. Salsa ani kiching phegwi uakma bai horo rokowi tongma joranw uakma bwsa bao. Ayang phungo bihik bwchawi phataro ongkhorwi nugo bwsai uakma gana rokojak tei uakma bwsa kwbangma bakha. Bo nogo thahngwi noksi tibi bwsaino tum ni
saka tum buo tei sao: Kaijakmani bwswk dukkha, bwsa khoroksa ano yaphar manya uakmanokhe aliknwi bwsa yapharkha.
Ani kiching lachijagwi nok kami yakarwi biyangbo kwmalango.
O borokni keang kothoma jotonw jut chajago, hao rodolai munuilaio. Phiya bubagrani mukhango swlaimung buko, o hronw hor o mwnaknw mwnak swrabwi tongkha. O borokbo kechen gosi kutulango.
Jotonw bwkha baijak baio. Bwkhao kirimabo habo.Tabukle hao orai porai nangsinai, lukurok bwkha barawi bulai toklai wngbainai, swrangmung nangbainai joto jila, morki nangsinai, kenarok seng harwi, korai kawi sophaiwi ha seknai, bubagrano along nogo chobnai. Noyungmani borokrok kablaio, lukurok kablaio, buphang yaphang yongsa kuksa jotonw kablaio.
Abotwi hamya jora khoroksa borok sokphaio, keram bwsak, tukujakya, mokol kolele, bwsago rwja simuk, themai bereng tongkha, bwkhanai abrum jabrum kurukjak tok bothop hai. Pundari pwichang kanjak lachima kholobdorop, sak ri bukcha. Bono birindiarok dogalam siminw rukhlaina naimani, montri okra nukslabwi bisingo tibi phaina dagio.
O borok arakbo nwngjak wngna, didak midak, bo sao: Bwi khorksabo manai kwrwi, ang mano, ang bubagrano munui rinai, ano bubagrani gana thahngna ridi bini khunjuo ang serek serek kok Sanai.
Bin bwsak sitra, mwnam, themai beremjak bwkhai bubagrani gana jabini riwwi man. Bono tukunani dagikhe bo gosiya, bo sao tukukhe bini kok samung rigwlak. Bini kok ma nao hinphano
bini sago thok motok phulwi bugrani gana thahngna rijago. O borok te te didak midak khe bubagrani samo thahngwi bini khunjuo serek serek kok sao.
Tamo jani kokmwtaiba sama kwlaikha o borok, bubagra achomsa jotono sundruriwi haha ha ha khe munuiyo tei thakna siya. Bwi jotonw pwila kirijakbaio ulo jotonw bubagrabai baksa munuilaio.
Tkhuk bukhuk tabuk ani swngmari jotono thani tamoni bagwi bubagra munuina kwlaikha, o borok tamo sakkha bubagrani khunjuo serek serek .
Je yachak mannai yakpai mannai:- 1st prize: Nokha kupulum athukiri,
2nd Pirze: Nokhaisa pilala talni pohor
3rdprize: Mochomsa chengkharuni pirma.
