Kokborok sanai Dopharog mokol paiwi kwbangma phasing yapri sewi himlaimani abo 1970 Bisini simi hinwi mano. kokborok kok tei luku Rwchapmung mwsamungno swkangwi twina bagwi tei aboni hamkraini bagwi 1972 bisio tabukni Sepahijala Hangkhorni South charilam amchaini Lembuthal kamio “Kokborok Sahitya sabha” achaio. O mothano songchanai Kokborokni Elemgwnang Thwijanai Alindralal Tripura. Kokborok sahitya sabhani bisingtwi tiprasa kami mulugo kwbangma sichamung tubukha, Rwchapnai achaikha, Swinai achaikha, Thungnuk mwsanai achaikha. Thaisakokbai sana thangkhe hukumu mukumu kwtalkhe mwthangwi tisalaikha. Kokrwbai bwlai, bijap, Hukumu panda, koklam panda akorog khwlai phaite phaite 2022 bisio phaiwi tabuk Rangchak bisini panda khlaina thangwi tongo.
Kokborok sahitya sabhani Rangchak Bisini panda Chengjaknai 9-10-12 Decemberni saltham romwi.
Puila 9th Decembero chengjaknai Motha achaima thai South charilamni Lembuthal kamio.
10th -11th December o salnwi hinkhe agulini Dasarath bhawanno Panda khlaijaknai. O pandao Kokborok sahitya sabhani Rangchak bisini yakpai “Kokpha” ongkhornai, Kokrwbai bwlai “Dangdu”ongkhornai tei logio bijaprogbo ongkhornai. Abono karwibo Bangladesh, Assam no khobwi juda juda hasteni Swikwrwngrog phai manjak phaiwanw. Koklam, koklopnai panda tei Rwchapmung mwsamung panda akorokbo wnganw. I rangchak Bisini o tongthokmungni pandano hodom dodom khe khlaina bagwi Tabukni Kokborok sahitya sabhani adongsong hor sal samung khlailai tonglaijao.
