Hamjakma kokthai sa khe khwnathok
Kubui hamjakma bwswk kutuk kok,
Hamjago hinwi sana kwlaisa,
Kubui de o kok amjok di waisa.
Hamjakma kokmang je borok siya
Bini hamjakma kubui hinjak ya.
Kubui hamjakma aswkno tekto
Hor chwngwi tongo bwkhao bisingo.
Kubui hamjaknai tatal kok saya,
Khani borokno hamya nuk maya;
Bini hamjakma borom kupulung
Sakno soiwino tongo khatungmung.
Bwkha bisingo risibo nangnai,
Phiya kwrak khe hamjagwi tongnai.
Muitu khwlainai hopung sapungno
Kwmana rw ya khani borokno.
Bini thanio nakarmung tongo
Bwkha butharwi bo le hamjago.
Khani borokno kwmajak phuru
Muktwi khikwlai kabo aphuru…
Sakduk goronno kotor wngjak ya;
Hamjakmani bai mokol nuk maya,
Langma tongsakno hamjakna naio
Thwiyasak logi songna naijao.
Kubui hamjakma dulima kwrwi,
Belokjakmung bai kwlaiya belwi,
Kwrakno tongnai kubui hamjakma
Rwui kwlangnai kubui kothoma.
