Odishani satung-watwi chaui talchisa trainning paima ulo puila posting Dhanbandni BCCL Unit o sokphaikha. Ani soi soi camp hinkhai Dhanbaadnino Basantimata Area-12, abo Dhanbaadbai chalma Chini Bugrakhor agulibai Ambassa chalmaswk. Sebuk manma kwtal, tongkhor kwtal, borok kwtal, kok kichabai bebakno kwtalnang. Aboni bagwi oro boro bahaikhai duty rijaknai mungsa siyakhu, buini yapri rwktharwi ma himgranai. Tobo salthambono saui mankha, oro koilakhroni koila khokjakmano kasunani, Koila tisanai malkhung kotor kotorni Battery motor mwrwknani tei phataro koila twlangnai malkhungno naichernani. Aboni bisingo dorokuk samung hinkhai Malkhungni battery bai Motorno khogwi manyatwikhai mwrwknani. A mungnwi manwi khokjakkhai sebukni awa tokke. Aborogno karwi kubuni samungrogo tei mungsa kha swrangya wngjaknai kwrwi. Tongjaknai nok abus Malaktham building kotor kotor, aboni bisingo ani tongma kwcharni khotol, ani khotolni salsibai bwkhak panthor, tei hakchako nuhuro hapung chuksoro chuksoroni somsu somsu. Kolomma joraba sarik sal twilwlwk hinkhai belcony-o achukkhai Agi amabai thaichumu khaknani hugo logi twlangjakphuru Garing wa sumui tamjaktwi khawi nobar sipmano muitu manhoru. Kubuino sarik jora belcony-o achugwi matongkhai kolomma jorao nobarni tongthokmungno saui mansugu. Horobo ayang bwkhakni Tailam phiyogwi thukhai Aichugokhai ri kutungsi chumna nangu. Aboni bagwino watwi waphuru simi ani o tailam kholopjak, teikhai sapung hopung phiyokjakamng.
Sarikni duty kwrwiphurukhai belcony-o achugwi Salsibaini nobar chatwtwi panthor kuplung Misip ada chalaima naharwi achaima hano khatangma holi rio. Joraokhaiba Nagendra Jamatiani Hakor bisingni nokharbaisid thungnuk tei Dr. Bijoyni Lontraini Ekolobya koklop poriui swrapsa kokrwbaio kwlwgwi thangu. Joraokhaiba Bimal-Manikni jora kwtalni rwchapmung khwnaui sikla bwkhano Ba santimatani simi Tripurao nasingjak khoroksani khurio tunui riuio.
Ahaikheno godok chichi khugo kwlaiyaui Idli, Sambar, poha-Roti chaui Hati bartham laisapkha. Tini koktisal salsa lenamung naharwi sak chalai Tapan Tudubai sapung tongma ganani Panchet Dam bai Maitham Dam-o thangwi twi kwkhrangni nobar chaui phailaimani bwsak kicha mojijak. Horni mai chabawi amabai kok sahorbawi mobile nawi tongma buphurubo mobile yak kepleui muktrwi lailangkha kha siya. Imango ang thujak ganao bachaui siniya sabobo bacha phaijak, mwkhang kahamkhai nukya. Mwkhangobo mwnak wngjak. Imango ang maswngo- nwng sabo? Doga sojak bahaikhai haphai?
A borok sao- ang tailamtwisi habu. Yasi surwi iko ang u tailam Ganani Neem buphangono tongu . Bini a kok khwnaui imangono kirima habwi ang sichasukjakda siya tobo mokol phiyogwi naisik naimani kubuino andra gundra ani thuyam ganao bachajak haikhe nugui rio. Kahamkhai sichasugwi mokol phiyogwi naimani ganao kebo kwrwi tailamtwi simi nobar sibwi ani Gunda swngjaknao dagar dagarwi riphaio.
Tailam ganani neem buphang bwkhago nahartwtwi swrapsa bwsak bikhumule bachakha. Tophano imangba tamo nukya tong hinwi wansuktwtwi Tailam sowi rokophirmani, imango nukmahaino kisisa sichajagobo ganao bachajakhai nukmano muitu man manwi bwkha udru wngu. Wansukjagu o nok tangmarog bisi thamchi laijak hinwi khwnao, dale dal borok tonglangkhwna chalangkhwna, dale dal patimumg wngwiphano mankhwna, ang uskangno phainai tamo saui mannai. Haiyakhe o neem buphangoboda mungsaswk patimung tongna. Ahaini bagwida omoni swkangobo wainwi Imango ayang tailam bwkhago achugwi kaplai tongmarog nuk. Hor kuthugo mukumtwtwi hamung siniya ahairog wansugwi bwkha kwrak hinphano mokolkhai phiyokrakliya. Jeswk kirio teibo bui thwimani, hamya lengmani, agi kamio kaka sompraini bwsajwk bai Somplik swkal kolopjagu hinwi kami gurum sariui khuri tokmarog muitu manwi khetom kwlwi tongsio. Ahaikhaino doi muktrwi thangya aichugosi muktrwi laisio.
Taini phung aiwibo bwkhao kaisa swngmung kada kasaui phaio- “dikholo agirogo kebo thwijak eba simalung ahairogda tongna?”
Bwkha tongwi manya ani sak chalai Tapan Tuduno horo je patimarogno saui khwna rio. Bini kokbo ahaino- Naidi Debbarma, angbo sasukto manya, phiya ani wansukmabo ahaino, chwng tabuk tongma o nokto koilakhor sakaosi. Sabo saiman, agirogo o koilakhorni koila khurthani hapung kuwagwiphano borok thwijak wngwi manu. Tabuksi machinebai koila khukaio, agito boroksi khukaio. Hinkhai aswk bisi kologo waisale abohai patimung tongnai.
Bini o kokrogno khwnaui ang masao- atwikhai thwijakni bagwida borogni phola o buphango kuthumbwi tongkha jani”.
Bo sao- “wngwi manu, aboni bagwino nwng thuphuru simiphano tailam soui thudi, mungsato wngya tophano oroni tongkhorno sisukyakhuba joto phasing hoja khawi thumano kahamta.”
Tapan Tuduni nok Bokaro-o Dhanbaad bai kicha hakchalo. Aboni bagwi bini kok saimansukkhai sayaphano o bini wansugwi samani kubuihaibo. Bo kubui patimungno saimanjakphano ang horo teibo kirijaganw hinwi saliyana ebakhai awai wngna kirijagwiphano saliyana. Bo aswk samabaino tangwi siya angbo o kokrogno kubuihai kubuihai matongjagu.
Camp ganani Cha phalnogo cha nwnglaitwtwi a amchaini borokrogno oro Camp tangjakya sani bobohai tongmani hinwi swngkhai baksakhai saui manya hinwi sao baksakhai kok pherwi thangu. Salsa auto mothornaini khugo khwnakha –“isi bwrwichini swkang wngano oro nok kwrwi, koilakhorsi tongmani. Ha kuwagu koila khurwi manya hinwi haphang aroni koilakhorno mwthagwi rio. Aboni ulosi aro quarter tangna chengjagu.”
Bini o kok khwnama ulo a horni patimungno twiwi keboni thani naitukna thangliya.
