Nakarmung (Kothomayung)~ Andrew Debbarma

Bwkhak Sa
Nukhung birmanni bwsa wngwibo lwngka borok ya khasinai wngnani. Kha sinai borokno khai jotono ma bolaio tei kaham ma hino. Tabukbo mwnago thuwi tongnai hayungni pohorno nuhurwi man ya siya nukya kamio rutugwi mano khoroksa khoroknwi khasinai tei lama kahamo yapri baroknai chwrai. Aboni bising Nathan khoroksa. Bo khorokni kolomtwi hao khiklai samung tangwi chanai Kamalni bwsla okra. Bumani mung Manimala. Ahaino khujakma bumung Kwchangti. Borogni kamini mung hwnkhai Chokdrimura. Bo chwraini simino kha sinai nukjagwi phaio. Bo bui bai juda khaibo nukjago. Buphabo tong kosong tongwi cha kosong chanai. Bui hai phatra kwrwi, borok sutrang. Kwrwi nukhungo achaima bagwi Nathan thinangni kokrokno twiwi wansugna si-o. Bo lekhaporaobo kha rio tei kaham kheno lekhaporaobo laio. Phiya bo bai chwraini simi baksa poriui phainai kamini joto bini sak chalairok daktino lekhaporano yakarwi soilab tongnani swrwng baio. Phekjaknai manwirok sago naui tok borjak hai kobor suluk-salak wng tong bai kha. Lama kwcharo okwra-chakwrani swkangbo siliya, keboni mwkhang khorangbo nahar liya hoku tulung-tulung kusub laijak, mokol kwchak kwchak khai bukhugo khoni pom laijak. Salbrum a leta pata wakrok bai mang se tongwi phaina nang kha, ahaiphano hamya manwino khalwi o sitra lamani bo sakno kati rwkha. Sakni langmano hamjakma tei dophani thinangni bagwi hamarini boyar tubu thani chati wngnani bini saktharmungni bising twi khe bini wansukma kubui tei tongmung kaham dang dang khe nukjago. Phiya bini bahanokjwk khoroknwi bo haiya; borog khai buini nuktwi buini tong twi tongna muchungo tei buini haino tongna swrwngo. Bahanokjwk khoroknwi Khumbarti bai Sampili. Bukhuknwini mungno bumano narwgo. Bini bahanokjwksong bo hai kha siya. Kamini bororokbo Nathanno khai chwrai kaham hwn baio.
Nathan rwngremchinwi-o (Class twelve) poriui tongo. Kamini bini sak baksarokni bising bo simino khoroksa lekhaporano yakar ya kho. Bini umor bisi chichar (18). Bobo sikla sok saui phaima joraba bwkha udila kha kobor chamani jora. Imotwi joraono kaham wngwi phainai phano se kwbangkuk chwrairokno lama koro baio. Bobo abo haino buino swrwngwi siklani kha udila chama bai hamjakmungni kha kobor chama hapharo sogwio tei phirogwi phainani lama korojago. A jorao bini langmao puila bo bwrwi hamjakmao bakhlai jagwi kwlawi rw-o. Phiya bono abo hai wngnai hinwi bini buma-bupha tei kamini bororokbo kisabo wansuk ya.
Bo lama koromani uklogo bini bayab khoroksani yak tongo hinwi mano. Salsa bini bayabno bono khoroksa bwrwi bai sini rwui tei salaiwi rwo. A bwrwini mung Khumpui Jamatia. Buphani mung Banthe. Buma Sukurani. Nathan bai Khumpuini umor aswk kebeng lai ya. Tal simi pher laio. Khumpui bini swlai talbrwi swkni kusu wng ganw.
Bwrwini khwio kwchaui de tei yogwi man sinai? Yangle bwrwini nukhung bai Nathansongni nukhung hor bai sal. Bwrwini nukhung borogni swlai belaino pherlaio. Bwrwini bupha chakri khlaio. Khumpui gwnangni bwsajwk hinwi ri chum kaham kaham tei kwtal kwtal mang kano chumo. Kwcham wng ya phano kisa chumjak khaino se tei a rino sago thepana se nai ya, ri kwtal mang swlaiwi tong mano. Je nangmani manwirokbo bebakno manwi tong baio. Mwkhang phuljaknai, bwsago phuljaknai, bokhorogo phuljaknai tei sajokjaknai bini manwirok bangmani kul kwrwi. Sana thang khai aswk kha sinai bwrwi ya. Goronle tongo, aswk dok man ya wng ya. Sakur koromo, mwkhang kiting lwlwk, khwnai kwsap, yasi muyasok tei mokol tokthu. Nathanbo chwla khai naithokno. Sakbo hengwla tei bwsak kuphur. Borog khoroknwi belai khai se mwchang lai kha. Nokhani logio chumwi budul budul khe mwchang tongma hai eba hachwkni khurio dale dal gapni khumrok barwi mwchang rwma hai haiya khe buphangno buduk kwswngwi mwchang tongma hai Khumpui bai Nathanno kwnwi bacha rwui jesa kait twi phano naisik khe khorop khorop mwchangmani khibina kwrwi. Swnamnaisaba borogno kwnwi kaisa wng thun hinwi da aswk khai mwchang rwui tagwi rohor kha ma hin nanw.
Khumpui bini naithokmung bai Nathanno kwrak khai phanwi na-o. Chwraini simino Khumpui tongthok chathok langma manwi tei biyal kwrwi wngwi phaio. Biyal tamo tei biyalni tekto bahai bo thopsa phano wansuk nahar man ya, bini wansukmungni phataro. Abo hai langma Nathan kisa phano man ya kho. Phiyaba Nathan langmao sak soinani tei biyalno khuktwi monogwi bwskangni khatungma naharwi kha kochomwi tongnani abo hai langmano chwraini simino swrwgwi sak soi phai-o. Puila hamjakmao kwlai gramaba Nathan mokol nugwi man liya. Bo bongbwrai khumni bahai bai phegwi kobor chama hai kubui kubui kheno Khumpuino kobor chaui hamjagwi thango. Khumpuibo bono hamjago.
Khumpuini smartphone tongo. Nathan phone matwi jaya kho. Nathan Khumpui bai kok sana bagwi waisa uisu bini bayab Boyarni mobile bai khe kokduk manjuwi koklam sao. Tei bini botoijwkni mobile naui Khumpui bai whatsAppni bising twi khapangni kokrok sao. Abo hai khe mang sal kisa laiwi thang-o. Nathan bai Khumpui belai bwkha manwi khoroknwino hamjakmungni hapharo kwlwgwi thang lai-o. Khumpui bai kok ma saya khe salsa phano Nathan bwkha swrangjak ya. Bo bini bayab Boyarni mobile-no bini rang baino reachrge khlai rio, abo hai khe bo Khumpui bai kok sana chaitokja-o. Nathan hamjakmao kwlwk sugwi thango. Bo Khumpui bai kok samani horni dam kaisa-kainwi eba kaitham jorarok bahai khe wngwi thang saui man ya. Bwkhani kokno kariui salai te salai te kok thogwi jora kwbangma laimani siswlab ya. Jorarok bahai khe lai swrapsa hai se ma tongo. Hamjakmao kwlai phuruni simi Nathan kisa agini tongmung swlaijak thango. Twrwk twrwk bini buma-buphabo bono ter manwi tong laikha. Salsa khe horni dam kwtham tamma jora-o Nathan Khumpui bai hamjakma kok saui tongmani bini buma thuma sichaui tepsa khnachomwi tongo. Phung ai kheno bo bwsla Nathanno swng phai-o, “Tini horo sabo bai aswk kok sakha nwngba aswk hor kuthuk jorao?”
O kok swngjakma bai Nathan bujiui mano miya horo buma bo Khumpui bai kwbangma kok salaimani bebakno khwnai tong bai khwna hinwi. Buma bai imo hai khe swngjagwi lachimani bai bini mwkhang swlaijagwi thango. Bo kok thaisa phano pungwi man liya. Siring siring wngwi mwkhang ha-o bomkhlai-o. Buma khe bono jaikhaino chajak liya damrogwi hino, “Buino se atwi khwnaui naislerma kul kwrwi tabuk khai nogo se nuk si blasa! Pora se pai ya kho nwng da tabuk atwi wngnani jora? Chari da man man ya bwrwi bwrwi wngnani lachi yada? Nok huk se kaham kwrwi—hamya tongmung swrwng tong kha. Nono tai waisa amotwi wngmani nukna do!”
Buma bai abo hai khe kutukjagwi Nathan sak sak mwkhang khichigwi pajak liya. Bo hinjakmani kok Khumpuinobo sarak liya. Tamoni hin khai Khumpui o kokrokno khnaui bwkha baijaknai hwnwi bo kaham kheno sio. Teini salni phungo Nathan Khumpuini mangpili bini bijab bisingo daui tonimani haino hai buma bai manjagwi rio. Aphuru buma thamchi belai kajagwi hin-u kha, “Nwng sajakbo kok khnaya na! Amtwi kok khnaya chwrai hwn khe nokni nongkhor lang di.”
Mai chalai phuru haino hai Nathan bupha bai waisa sajago, “Bui hamjak phano nwng hamjak ya hin sadi. Tabukrogo ta hamjak khudi. Chwng khe nono kaiya da tongno ba? Swkang pora se laigadi bablu, ulo chwng jetwino naiwi kaiwi rw wanw.”
Nathanni buma Manimala bai bupha Kamal, borogbo agi kwnwi hamjak laiwino kaijak laio. Phiya borogni hamjakmungni kwcharo mungsa lamani busu hokna nang liya. Keboni kebengmung nukjak liya. Babainwi phaisingono buma bupha gosiui kaiwi rwjago. Borogni imang mukthang wngma haino Kamal buini hamjakmanobo mukthang wng bai thun hinwi naio. Phiya bihik Manimala bwsaini wansukma bai kwtha suk ya. Twma khe bwslano borok khwlai tisanani kha thonjak tongmani bagwino borog Nathano hinna nang phuru ma hino, sana nang phuru ma sao. Phiya bwsajwk khoroknwirokno khe borogbo aswk cher ya.