Kuridok nok twiwi kami chikonsa bumung swih kobor, lahar kotorni simi diborsa ni lama, hathai kotor hathai ni kuna babisa. Bonsing o kimini kasko. Kasko siminuya jotoni bo bokhorok, bini kokbai jotonnw achuk bwcha ma wngnabaio. Kisaswk thenta wngkhe bono mokol pengya wngkhe bini bokopalo kisa misa phano hohr nansinai. Reson phalnogo thahngkhe bini banta reson kwrwi wngsinai, teres reliph ni samung sokphaikhe bini bumung rutugwi tei mangwlak. Agulini phona kotor rok bai bini achuk bwcha, maikhlai baksa mai chahlaio. Sabono khutung baknani, sabono khoiratini rang rinani, teres reliph ni samungo saboni bumung tisanani, bo bwkhak kamini lama bojak nai, joto jila bonsing ni dagimung kwrwi hinkhe chusechukya. Rwng nokni mastor nobo kainwi jila attendense ma rio rwng nogo tei bini nokhlao. Bono butuk thaihsarok yapharkhe talsa joratwi rwng nok duawi mano. Bwrwi cherai twiwi kok banglaikhe , bihik bwsai ualaikhe, sikok mankhor romjakkhe bonsing ni totogra rannai, je bohrok bangkugwi bini totograno misi mano butuk bai, bati bai , bini talikaonw mwnwima philiknai.
Bo bini phanni maribo narukkha, rwngnok tisa rikha, it soling lama borikha, swkango kua tongmani, bini nok gananw kisa khama bwkhak, bo kasko chongjakma ualo ringkua khur rikha. Kua kwcham karjakkha tabuk, obo bolong, duk buduk jabra bobra bai kuphugwi tongkha, o kua tabuk karjaknw borok thahngnai kwrwi.
Chuak arak bo kha phurjagonw, bini buphabo sordar tei nwng kwrak, cherai phangsnini simi baka saka khislang kosom tei khislang kuphur nugwi torwi phaimani. Nok, bari bisra bati bahaibai motowi jib jib wngwi phaimani. Buphani borom bo narukhkha tei bupha wngkha sordar, bokhe tabuk chairman, tiprasarok kasko hinwi ringo. Bihik sompati arakrok nwngya phano butugo khe bwsaino chubao. Thapa o mai muini tuk korai boksamani babaksa chuak boknani, bati boknani samungbo bwkhariwinw khwlaio, abobainw bwsaini bwkha mano.
Bini rang rini i biyal kwrwi, phan ni biyal kwrwi, borom ni biyal kwrwi kaisanw biyal abo wngkha khoroksa bwsa chwlani biyal. Bini bwsajwk khoroksaswk songdari, tabuk torwi chugwi risa skodorop wngkha. Kamini rwng nogo swrwng tongo. Bini bwsa chwla kusu khoroksa achaimani phiya achomsa abuksa kwlwi tongphurunw horsani horo kulum kalaiwi bumani khuri bukcha khwlai tei bonsingni bwkhano bukcha swnamwi thwilangkha. Bihik sao swkal se chahthao. Phiya bonsing sabono swkal hinwi silsanani. Bohrokni kamio khoroksabo swkal rwngo hinwi bo simani kwrwi. Abo bwini kamini phano tongmano, bwini kamini swkalrok derarikhe abo kubuni kok, kamiole bono dera riani aswk bwkha kotor borok kwrwikho.
Bwsa chwla thwima ulo bonsing teibo chauk arak no kwbang khe kha phurjakkha. Nwg phano aswk kephek khe ligi lagai khe nwngya. Bo kamini kasko, borom gwnang borok abo bo joto phuru muitu narugo, arak nungwi kisa misa phekphano.
Bonsingni musuknok kotorma tongo, musukma tei al baimani dama, deka joto thumwi madok masni wngnainw, abono karwi tok, pun, uak tongbaio. Bo muni narugwi kheto khwlaio, bisra khwlaio, huk bo khwlaio, bini al chuainani khetobo tongo tei hukbo tongo. Musuk murukna bagwi bini nogo khoroksa tungsep barini (cha bagan) kuli phaguano muni narugo. Bini nongonw tongo , chaho tei samung tango.
Bonsing parti khwlaio, o partini bumung tei partini mari kwchak kwkhrang. O bodolnw bono chairman chongo. Kwchak kwkhrangni okra bai bo salsa malaima tongo. Bo bono agulio ringwi sakha: Phona nwng baithangno jotophuru kwchak kwkhrang hinwi uansukdi, chahphuru, nwngphuru, thuphuru, emangnuk phuru, mukthango joto phuru. Nwng sisawi tongphrubo kwchak kwkhrang, rokowi tongphuru bo kwchak kwkhrang. Kwhchak wkkhrangse nini bihik bwsa, jaiti nok nokhung. Khoroksa borok pwila nini thani sokphaikhe swhngdi bo kwcha eba kwkhrang, bo nini kok khwnaya hinkhe bo nini kena, bono ma sokomol rinai. Langma bai butharya phano rang ri bai borom segwi bono bomri tonidi.
Bonsing smai tangwi o kokno gosi phaikha tei thaihsa thaihsa khe bo mukthangot hepawi tongo. Bini kwchak kwkhrangni bwsakngo kami suidu borok yaskur murwi ma achuk baio. Bini kok manya hinkhe bwlaih laihsabo ninangya.
Salthahngrwrwk bonsingni phan banrwrwk tei agulini phona rokbo bono tei bo samung bogrwrwk. Bo teibo pailaiya hailaiya wngo. Samung tei samung. Phiya samung bang phano bo chungwi tei batino koroya pogwi phano. Abotwi dophra kaphra wngma joranw phagua koktma mano bini nogo bwsala okra kulum kwlai tongkha. Bo bonsingni thani duamung sanwi nogo thahngo. Nok huk, malmata naikolni barja bihik tei bwsajwkni sagonw phinklai jago.
Phung bwchawi bo nokhlao ahcugwi tungsep(cha) nwngwi tonphuru bini buai sokphaio, bini nogo uak mala rwtharjaknai, bo khwmakha ma manjaknai, amchoinwi teibo kwchak kwkhrangni bodolni twiphangbo sokphainai. Bonsing mang hinya, oro uahan, bubuk katakuti chahlaimung siminuya, chuak, arak tei bilati rokbo tongnai. Buaijwkni yakni chuak tei arak thoknani hinwi thoksugonw. Phagua tongkhe bihiknobo logi twikhamw phiya nok naikanai khwlainai borok kwrwi. Bonsing saichwngnw thahngo.
Chuakbo aswknw thokkha, arakbo aswknw thokkha, nwngrwrwk teibo thokrwrwk, mai mui bo song kwrwng songkhwna, ok supung chah phano okhwima paiya hai. Kok golok golok salaite salaite tini yak laiwinw nwngo bonsing. Mojomotnw phekkha bo. Tei bini logi rinairokbo bono phan khe khankha. Sairik sal twilwlw jora bo bwchao. Buai bono logi borokde rohor na hinw swhngwi naikha. Bonsing boromo nangjago aswkle bo phekya. Borok logi twina gosiya.
Kephek wngwi bo lamrio, bini yak yakung yapiri kubulkha, khorok kiting tongkha hinphano bo bwkhani phan bai boromni kok uansugwi kepleng himna bagwi saktaro.
Nok gwna saokphaiphuru bo ahchomsa bwrwi khorang ni chrikma khwnahoro : Ano mwwthangdi ! Mwthangradi! sabo tong.
Kisa cherai khoangnw. Bosing thoto moto chao. Sabo wngman i saltwilwlw jora. Tamo abo bwsajwknobo kisa solo. Bo khunju chagwi khwnao bwkha riwi, rom mano abo kua kwchamni simi phai tongo. Abo khamakha mwtai, burasa ako wngkhana. Bono chukli khwlai koro rina naitongkha. Bo bwkha torwi swkang thahngo.
Kua tola ni simi o chirkma o khorangni, kua bukhuk jabara bobara kuphungjak mungsa nukjakya.
-Nwng sabo? Bo kisa bwkha torwi swkango.
-Ano sinilyade baba ang se nwsajwk. Bonsing thorsa sundruo abo khwmakha burasa wngnai, bono twlangna bagwi phaikha. Bini mairwng paisinai. Bwsajwkni mang romwi bono bandi tongkah. Aboni khuio yakung rikhenw bini mairung paisinai. Phatsa khe elem philigo bini bomotomo. Burasa, mawtai satai parti kwhaliya. Bo swhwngwi naigrana abo parti de khwali.
Bo swhngo: Nwng jesa phano wngdi nwng kwchak khwakhrang de eba kormo kuphur, pimol.
_-Ang mungsaya baba, ang cheraikho, ano tisadi kok sayawi. Bosing puitu thangsugo abo burasanw. Bo doro doro kutulo. Nogo bihik tok pun uak tei musuk rok janai jani khtolo bengwi tongo.
Bwsaino nugwi swhngo: Mating no nukkhade, khama bai deka bengwi naharna bagwi thahngmani.
-Kuai kwcham baide? Bonsing shwhngo.
-Au. Yachago bihik. Bonsing phekmung swrango, bo thorsa sundruo, bo dobon dobon khaprumo kua kwcham bai. Phiya o khorang thagwi thangkha, chrik liya, o jila sringmung bono lamjak tongo.
