Anta Joy Tripura
O Pantwi Pantwi
Mung bisingni mung khwnathok
Mung kwchangsa
Pantwi mung.
O Pantwi Pantwi
Nini mungno saboba
Pantwi hin’wi mung boklang?
O Pantwi Pantwi
Nini mungbo Panwi wngmabai
Habarni pantwini goronbai
Nini goron pherlaimung krwi.
O Pantwi Pantwi
Pantwi mungbai
Nungno gothesio mwchangsio
Kubui kubuini nini tonggwrwngbai.
O Pantwi Pantwi
Nunglai koklam saikhaibo
Minik wari wari khaitiywi
Koklam satiyo.
O Pantwi Pantwi
Nunglai lama himkhaibo
Hamchwk kwta(Kwtal)rok
Lama himtwi hai.
O Pantwi Pantwi
Nini khorangle
Kwchangsa khaitiywi
Twilwlwkni khwnathokma
Khorang khwnakhai khasrang’wo.
O Pantwi Pantwi
Nini moko(Mokol)lai chwngririni
Ta(Tal)hai kwchwngsa
Minikjak moko(Mokol)bai mwchangjak.
O Pantwi Pantwi
Hapung gara Twibung gara
Nunglai mwchangma
Beni swlai bara.
O Pantwi Pantwi
Khum bwkhai thok bwkhai
Nungle gondro Khum
Hachuk sikao tongnai
Kwthar Tiprajwkni bwkhai.
O Pantwi Pantwi
Kok saklaibo wathele thele
Borokno naikhlaibo wakrak krak
Tongmungbo koine koinesa.
O Pantwi Pantwi
Nokhani pantwi haping’wo kwlaikhai
Kharangsawi phaiyo haping
Nungbo jeni nokhung’wo hamjwk thang
O nokhung khapang Ehu..hu.. khorang.
O Pantwi Pantwi
Mwnak jorani habaro
Kwthar Tiprajwkni habar
Nini aro tabukbo
Sirisudani kwchang mari.
O Pantwi Pantwi
Nunglai mwchangnai
Rinai chongrung kankhai
Bokhorok risa sokhai
Khaja risa boklaitikhai
Yago mathiya kangjakkhai
Yakung’wo being ki kangjakkhai
Kw-bang waumu bwsa hojakkhai
Kotowo ramtang chondroha kankhai.
O Pantwi Pantwi
Khum buba(Bubar) kiyokma jora
Naiywi tongdi kisa
Bwkhai man’wi biywi phaiywi
Baphaino kosom bombrairog
Taborodi o kosom bombraino
Rwgwi hodi koreni o bombraisano.
O Pantwi Pantwi
Khum buba naithok naithokya phabo
Chuwo mungsaya mungsa samung
Khum kiyok drwk’wo
Bombraisa phaiywi baphaikhai
O Khum mwtai-tai ronani chukglak.
O Pantwi Pantwi
Khum kiyod drwkba
Ama-aphani khuriwo tongtdi
Yaksi yagra Thangkhai
Ama-aphano odung’wo twlangdi
Gam hamya Ama-aphani
Yakno romwi himdi.
O Pantwi Pantwi
Ben Khum khowi ronaino
Nunglawi Mwtai-taini yakung’wo tabokdi
Kwthar khwlaiywi nini yakbai
Khum Khowi Mwtai-taini yakung’wo bokdi.
“O Pema” -“Pantwisa eba Bwrwibwsa”
