Phaidi chini hao—
Rangchak tipra kwlwksa hao.
Hapung hathai bai kwkhwrang bolong,
Mwchangwi tongo bolong-halong;
Hathai Kotor, Hachwk Beremrok,
Longtorai, Jampui, Sakhan akorok,
Teibo tongo Chakwrakma,
Montang hachwk bwswk naithokma.
Twima twisa bojak o hao,
Naharwi nai khe kha kiyok sao;
Gomati, Manu, Longai, Dhalai,
Haora, Muhuri, Pheni, Khuwai.
Sini kulok ya buphang waphang
Chini ha ama bwswk se mwchang.
Phaidi chini hao—
Nakhwrai gwnang hao.
Hapung somlwlwk, nokha kwkhwrang,
Toksa tokmili pungmani khorang.
Hachwk khurio siyari lob-lob
Khao achaio koktang-koklop.
Bata bangphai bubar kolobjak,
Bolong tomwsa rai-rai koichigjak.
Bolong khumtoksa phududu barwi,
Bahai motom bolong saharwi,
Gati khamani muibali buphang,
Toksa jonijong rwchapma khorang.
Nok kuridok nokdok,
Chalai kuridok chalaidok,
Kami khalaiwi tongnai lukurok,
O hani bwsa tiprasarok.
Phaidi chini hao—
Berai phaidi huk-hapingo.
Huk gwnangwi maitang kuplung,
Khumchak chakrorom huchung.
Tongo chakumra, khaklu, khokleng, moso,
Bojra, siping, mogwdam, beleso,
Thaichumu, Dorompai, Momphol, Masinga,
Naiwi nai phaidi kuplung langa.
Chauibo naidi bwswk se kothok,
Phaidi chini hao norok.
Gairing sakao nobar sib sib,
Sibnani nang ya kisib,
Maichu chujak tei tilok twi kwchang,
Chaui bwswk se khabo kwchang.
Swtwi bwlaio ah-bar egmani,
Muiphle wasung godok songmani,
Motom huhu thok yai thokthotok,
Chakhai bwswk se thok!
Teibo chaphaidi muya awandru,
Banta mosodeng, chakhwi, muituru,
Chakhwtwi kwthwng, berwma bwtwi
Chaui totwra kwtwi.
Chini awan bangwi sokwrang,
Buini bai juda chaui khuk swrang.
Phaidi chini hao—
Tong kosong tongnai borok dophani hao.
Khwna phaidi Jaduni khorang,
Dangdu, chongpereng, sairenda khorang,
Kokthaino kholwi baikhenemani,
Khwnaui khapang swrang temani!
Nai phaidi chini yakni tak borok,
Rigwnai risa kanmung kan borok.
Teibo chini kotok rang bwtang,
Yakungni kharuk, khajuni surang.
Phaidi chini hao—
Rangchakni bokhor hao.
Nai phaidi chini dale dal khumrok,
Hano mwchangwi bubar naithothotok.
Ha silwi baro bari Khumtoya,
Bahai motomma kak ya.
Bahai jib jib majitolabo,
Toskuma pungma khorang khwnao,
Kami bukhuka lamaku buphang,
Bario thaio baikang,
Bolong khum maike bubar rochongwi
Naithogwi baro phududu wngwi.
Bisi kwtalni watwi kwlai khe,
Hatal motomwi boyar sibcha khe,
Tongthogo khapang udila chaui
Sakni khum thok baro motomwi.
Tongthokma bara rangchakni hao,
Phaidi chini hao.
