Baithangno norwi pohorni sampilio
Kebo thong kainai kwrwi.
Unkolok mwnakni kotono huijak huijagwi
Sakni richum simuk swkakna pailaiya!
Bwskango bachai yasi pakogwi khorang supnairok
Ani takhukni muktwi thopsabo hosanai kwrwi,
Nok kwpwla watwini bahai satungni mwnwimao
Sajwk sajwla noksaro achugwi mai khopsa sanjao
Kebode riphaikha tugwi?
Khorokni khwnai phurwi bekereng bwsak bai mwchangwi
Satung watwi siyari hungwi bisi monogwi
Lamao thujak nok huk kwrwi kwpal birmanja
Oh sahebrok twmani mwkhang uphilyagwja?
Malkhungo birkhungo kawi khorok narliya yang uyang
Mokolo phon hapjakna kirijagwi .
Waisa wuisu nugwi kha khamjago tokha thamchumu hai
Haiphano methepna betheya.
Hachwkni lama kebeng kosong kwkak baijak
Yakhwrai bona saliya—
Gati kuwani twimukni twichang twirumu
Twi kaham thopsa riliya.
Jotono solao chakya chakya mwnwiya ha kaya!
Mwkhwi swnamwi chamang chamang degereui
Moso yokjagwi kolomtwi swra swra.
Swkango salangma kok, kokni gorono morok
Pokjaklangkha boroni tabuk,
Khorang subwi hachwk hapung bakhogwi nini lamao
Chaya nwngya thuyakhwlai rwktharwi
Chikon ni kotor swnamkha
Tabukle mokolse pengjakliyagwja!
Imangni hayungo kobonriwi mwnwima rutugwi
Khatungma khapango sal kaham naisingwi
Mokol mukumya tongjamase
Paithago oh kwpalno kwpal.
Salno rwktharwi himte himte achomsa khunjulamo buphaio
Rangchakni khampwlai seklai kereng kurung!
Kolomtwi kisi mwkhang bai imang chujakba
Jotono pisa piring.
Tabukle sabono asawi yapri senani
Kha baijagwi muktwi huywi lam romo
Hachwkni bolong bwkhak.
Thangna swkang nairwkna ta phaidi
Mokolo thapwla silwi riwanu
Chakya khapango hopereng pirma.
Bihik bwsa twywi nok khanani
Rangchakni khampwlai manwi tongthogwi
Sal phaikhe bolongni bwthai chamang bohok degereui
Okhwlai chawi tongdi norok!
Chwngle hachwkni sandaiba ah lamano lama
Sachlang boyar khapango nangwibo
Swlailiya sakmangni goron.
