SWIKWRWNG CHANDRA KANTA MURASINGH-NO MUITO KHWLAIMA

KOKBOROK KOKRWBAINI KOK SANA THANGKHE SWIKWRWNG CHANDRA KANTA MURASINGH-NI KOKNO SAYAUI KOKBOROK KOKRWBAI KUPULWNG WNGWI MAYA. BO KOKBOROK KOKRWBAI HAPHARNI KWCHWNG ATHUKIRI KHOROKSA. SWIKRWNG CHANDRA KANTA MURASINGH 1^ST APRIL 1957 BISIO SEPAHIJALA HANGKHORNI SONAMURA BWKHASTENI TWIWANDAL AMCHAIO OMTHAI THWI KWLAIO. BO KOKBOROK KOKRWBAINI SWIKWRWNG SIMIYA KUBUN JUDA JUDA KOKBAIBO SWIO TEI KOKPHILWI SWIO. BHARAT HAKTORNI UTTAR-PUB AMCHAIO SWIKWRWNG C.K. MURASINGH-NO KOKBOROK KOKRWBAINI BAGWI PUILA NATIONAL SOKAT SAHITYA AKADEMY BHASHA SOMMAN SOKAT YAPHARWI BOROM RIJAGO 1996 BISIO. ABONI ULO BONO TTAADC HAPHANG 1997 BISIO MAHENDRA DEBBARMA MUKUMU SOKAT YAPHARO, TEI 2001 BISIO TRIPURA HAPHANG BONO RABINDRA SOKAT YAPHARO. BO HASTENO KARWI KUBUN KUBUN HAKTORO TEI BHARAT HAKTORNI KUBUN KUBUN THAIO THANGWI KOKBOROK KOKNO PIRWI KHA.

SWIKRWNG CHANDRA KANTA MURASINGH SWIMUNGNO KARWIBO THWNGTHANI ROGO BELAI KWSWRANG TEI BO BADMINTON THWNGNA BELAI HAMJAGO.

PHIYA KOKBOROK KOKRWBAINI HAPHARO SAL KISA SWKANG CHUMUI KOLOBWI MWNAKMA KUPULWNG WNGWI PHAIO, ACHOMSA PUITO THANGYA KOK JOTONI KHUNJUO PIRJAGWI THANGO. THANGNAI  27^TH MARCH SALMARINI PHUNG JORAO ACHOMSA KHWNAI PUITO THANGYA KOK PIRAJGWI THANGO. ASTABAL THWNGKHOLA REKEWI PANTWI SPORTING SOCIETY-NI BADMINTON THWNGKHOLAO BADMINTON THWNGWI LENGLAMA JORAO ACHOMSA LANGMA CHOWI THANGO.

SWIKWRWNG CHANDRA KANTA MURASINGH-NO MUITO KHWLAIWI BOROM YAPHARMA TEI BONI SWIJAK KOKLOP KHUKTANGMA PANDA KHWLAIJAK KHA 23^RD APRIL SALMARIO AGULI KRISHNANAGARNI DASARATH HUKUMU SWRWNGNOGO. O PANDAO KOKBOROK KOKRWBAINI KWBANGKUK SWIKWRWNG TEI KUBUN KOK SANAI SWIKWRWNG SONGBO PHAIWI MANJAKKHA. O PANDA SWIKWRWNG C.K SIRNO MUITO KHWLAIWI KOK NARWK KHA SWIKWRWNG NANDA KUMAR DEBBARMA, SWIKWRWNG DR. BIJOY DEBBARMA, SWIKWRWNG SNEHAMOY ROY CHOWDHURY, PROFESSOR DR. SUKHENDU DEBBARMA AKOSONG.

O PANDAO OKWRA SWIKWRWNG SIMI SIKWLA SWIKWRWNG KHOBWI SWIKWRWNG C.K. MURASINGH-NO MUITO BONI KOKLOPNO KHUKTANGKHA.

O PANDANO SONGCHANAI WNGKHA SWIKWRWNG CHANDRA KANTA MURASINGH-NI SAJWLA BOROMGWNANG LINCOLN MURASINGH TEI RANGCHAK RICHAK FOUNDATION.

KOKBOROK KOKRWBAINI BECHEBO SWIKWRWNG C.K. MURASINGH THWIPHWLAIYA KWTHANGWI TONGNAI.

KOKRWBAINI KOKTHUM BY DHANURAJ NOATIA