Sampili tabuk borok kotor wng kha. Bo tabuk Agulini kaisa Private rwngnogo Phrwngnaini samung khwlaiwi tongo. Bono kainani kokbo swngjak kha. Bo bai kok swngjaknai chwla wng kha hukbar bedego haste haphangni sebuk khlaio. Sampilini kailai panda wngnani tei talsa se jora tong sio.
Tini koktisal, rwngnogo thangna nang ya Sampili. Phungni mai chabaiwi maichao achugwi tv naiwi tongo. O jorao kaisa unknown number eba sini ya number bai bini phone-o SMS sok phaio — “Tamo khwlai tong Sampili? Ano siniui da man kha?’’
O SMS no manwi Sampili kiphilmung rohoro — “Siniui man ya, sabo wng khaba nwng?’’
Bono SMS rohornai wng kha Suman. Bo kokphil rohor phiro, “Aswk dakti da pogwi thang kha Sampili nwng ano? Ang se Suman, tabuk bude sini ya kho?’’
Sampili sakha, “Sini kha. Aswk bisikbrwini yagulo tini bahai khai nwng ano muitu manjak?’’
Suman kiphilmung rwo, “Ano nakar sidi Sampili, ang nwng bai tabuk teisa halok manjuna muchungo; nini kubui hamjakma tei mayarokno muitu manwi ang belaino kha khamo!’’
O kokno khwnaui Sampili kunu kok kiphilnani kokthai kwrwijago. Bo mobile off khlaiwi thuyamo gerego tei hama kolok rohoro. Bini mokolo muktwibo reke-reke yorwi phaijago. Bisikbrwi swkangni kokno bo muitu kubukjagwi sere-sere bwkha sajago. Aphuru Suman bono swmai tangwi samani tongo, jephuru phano bono yakar ya hinwi. Sampili teibo bini laijak kothomarokno muitu manjagwi twrwk twrwk a jorarokno bini uansukmani mokol bai joto nugwi tong baio.
Sampili bai Suman kami kaisano tong laimani. Borogni kamini mung Bairagidepa. Chwraini simino borog kaisa rwngnogo poriui phai laio. Aphuruni simino Sampili bai Suman kha phurwi hamjak laio. Sana thang khai borogni hamjakma chwraini simino hinwi mano.
Salsa Sampili bai Suman gulachi buphang tolao achugwi malai laio. Sampili Sumanno swngo, “Naithok, nwng ano thwiyasakni logi da rwui manno?’’
“Ani yalwk, nokha bai ha se philjagwi thang ganw, haiphano ang nono le pogwi man glak’’ — Sampilini yapha bini yaphao beraui Sampilini swngmungno Suman saklaio. “Nono ang thwiyasakno logi rwui thangnai.’’
O kokno khwnaui Sampili mwnwiwi swng phiro — “Tumungno nwng bai ang malai ya tei kokbo ma salai ya bisi kaisa tongna kwlai khe, nwng ano pogwi da thangno?’’
Suman khorok narwi Sampilini bukhugo yak muthubwi sao, “Nwng bai jeswk hakchalo tongwibo, ang nono sal brum brum muitu khwlaiwi tongnai.’’
Sampili hino, “Nwng ano tabuk hamjakma rima hai thwiyasakno hamjakma rwdi. Ang nini hamjakmung simino manna muchungo, tei kustam phano ang nini thani san ya.’’
Abo hai khaino Sampili bai Suman kaham khai hamjak laiwino tongo. Salsa Suman bini khani kokno chobwi simi toni man liya, bini bumano Sampili bai hamjak lai tongmani kok bebakno khulogwi saui rwbaio. Bini buma o kokno khwnaui mwkhang somwi thango. Bo bwslano Sampili bai kainani muchungjak ya; tamni hinba kamini joto bororokno Sampilini bumano Swkal hin laio. Tai bumano Swkal hinmani haino bwsajwk Sampilinobo swkal hinwi wansuk lai baio. Aboni bagwino Sumanni buma Swkalrokni nukhungo hinwi bwslano Sampili bai kainani kha mithikjago. Bo bwslano sao, “Khwna di batung, Sampili bai le nono kaiwi man gwlak. Tai kubuni alka bwrwi naiwi hamjak di.’’
Suman bumani i kokno khwnaui wanajago. Bo kisa jolijakma hai khe swngo, “Khoroknwini kubui hamjakmano nwng tamoni gosiui man ya ama? Amo hai hamjakmarokno tamoni kebeng?’’
“Hamjakmanoba tamoni kebengnani batung?’’ khorang lem khai buma kok kiphilo. “Jotoni buma buphano bwsani bagwi kaham wansugo, tai bwsani tongthok-chathokno naio.’’
Bumani bangwra-o kwbagwi Suman hin phiro, “Ama nwng ani tongthokno naiwi tong khai ang Sampili baino kaijaknai. Ang bono tai pogwi man gwlak.’’
Aphuru khai buma bwslano swrai swrai khuk khengwi rwo Sampili swkal hinwi. Aboni bagwino Sampili bai hakchal wngnani dagio. Bumani i kokno khwnaui Suman wanamung kuthugo kwlaijago tei kibo kirijago. Tamoni hinmale Suman chwraini simino buchu bwchwisong bai tongwi tormani, bo buchu bwchwisongni khugo swkal mwtairokni kokno mang khnaui phaio. Aboni bagwino swkalrokno khai bini khao jobor kirima tongo. Bumani khugo i kokno khwnaui bo a salni simi Sampili bai hakchal wngnani chaitogo. Sampili bai mabo malai liya tai kokrokbo saliya. Haiphano bo Sampilino hamjagwi tongo.
Suman abo hai wngmani bagwi Sampili belai kheno dukhu nangjago. Phiyaba bo saui man ya Suman tamoni bagwi bo bai kok saliya. Yang khai o bisiono Sampili porinani bagwi Agulio thangnani nango. Bo thangnani swkang Suman bai malainani belai kheno koiwi sakha. Tamo khai Suman bono jora rwliya, hai-irai saui samung pai laiya phunugwi mang sak katiui tong kha. Aboni bagwi Sampili bo bai malaina muchung phano malaiwi man lang liyauino Agulio thangwi ma pai kha.
Hatibarsani yagulo Sampili Sumanno SMS khwlaio — “Naithok, nwng ano tamoni bagwi jolijak? Nwng tamoni swlaijak kha ano buji riui sadi.’’
Suman ereng kok saui kiphilmung rwo — “Ang nono hamjago, hamjakya wng ya. Haiphano ani amasong ano khogwi kubuini bwrwi bai kok swngwi pai kha ano kainani bagwi. Nwng ano nakarwi rw sidi. Nwngbo nini lama thang sidi alka chwla bai kaijagwi.’’
O kokno khwnaui Sampili muktwi kwlaijagwi kab twtwi sao, “Nini hamjakma aswk da kebel? Nokha bai ha philjagwi thang phano nwng ano pogwi man ya hinwi kok rimanirok, o kokrok biyang kwma bai kha?’’
Sampilini o kokno khwnaui Suman tei mungsa sanani kokthai kwrwijak kha. Bo kok paithak saklaio, “Ano nakar sidi.’’ Aswk kok sauino bo Sampilini phone number-no block khlaiwi rwo.
Aboni ulo waisa phano borog kok ma salai liya. Sampili salbrumno Sumanni call tei sms naisigwi tongo—abo hai khe bini bwkha belai tekto nangwi ma tongo. Aboni bagwino tini hai jorao bisikbrwini yagulo Sumanni SMS no manwi Sampili belai kha khamjago. Sampili reply rwya wng tongmani bagwi Suman call khlaio. Sampili bini call yachak khe Suman bebak kokno khulogwi saui khwna rwo bo agi tamoni bagwi bo bai hakchal wngnani nang kha.
Bini kokno khwnaui Sampili kok kiphilo, “Nwng agi ano samani tongo, nwng nini lama thang sidi alka chwla bai kaijagwi hinwi. Tabuk angbo nono sajao, nwngbo nini lama thang sidi alka bwrwi bai kaijagwi.’’
“Ang nini langmao teisa kiphilwi phaina muchungo’’ — Suman kab twtwi sao.
Sampili kok phirogo, “Sorry, nwng agi je ani bwkhano swbai kha, aboni bagwi tabuk ang nwng bai hakchalo sogwi kha.’’
Suman hin phiro, “Ang nono tabukbo hamjak kho ani rangchakyoi.’’
Kisa khorang tor rwui damrokma hai khe Sampili paithakni kiphilmung rwo, “Ani kailai panda wngnani tai talsa se jora tong sio. Please ani lamao busu wngwi ta bacha di.’’ Aswk kok sauino Sampili Sumani number-no block khlaiwi rio.
