Thanangchi hachwk sikamni bokhor,
Kuchuk sakao sikamrok khator.
Tipra ha bai halok kwthaya
Dhanya Manikya kha tongthokjak ya!
Mayung kuphurno bo sanhor kha,
Chobani mukur borog phunuk kha.
Khorok bom liya Sikam ojama,
Sanhor kha chobani lama.
Thanangchi hachwk kuchuk-ha-sikam
Kasaui mannya hacham;
Twipra hani birindiyarok
Bara baichingo khomtengwi borog,
Kasai man liya hapung ha kuchuk,
Nahar nuhur ya buchuk.
Rai kwchak wng kha choba sengkwrak,
Bubagwrani khachuk phankwrak,
Swmaino chaui choba nongkhorma
Dagiui sakha choba khwlaina.
Chango ri khaui choba nang lai kha,
Nokha talcharni choba bolai kha.
Phiya borogno mechen man liya,
Holongni hapung kasathok liya.
Khorok kholpechi Sikam sipairok,
Tongthokjak laiwi chirigo borog,
Chuwak nwng laiwi tola naikhwlai
Phunuk hor laio yakung yakwrai.
Mokol gothok ya Rai kwchak nugwi
Hoku kajago kwpacholong twi.
Bini sipaino naisigwi hino—
Kwrak khwlai di khano;
Phiya sipairok kirijak laiwi
Tong laio mwkhang somwi.
Omono nugwi Rai kwchak sakha—
Kwrak khwlai di norokni bwkha;
Norok ba tamo bwrwi mamang da?
Yakung usulwi thangnai mamang da?
Chwla wng khwlai choba khwlai di,
Bwrwi wng khwlai chokhano lub di.
Rai kwchak teibo thamchi kajago,
Bathamni nukhung swpwlai sao—
Nok mariui watwi kwlai thun,
Thulaimung kwrwi wansukna si thun!
O horo imang Rai kwchak nuk kha
Subrai Raja bono saphai kha—
Khwna phung aiwi muphuksa masa,
Nuk ganw nini sipai khoroksa.
Muktham tei khakcha muphuk tormani,
Mukchar wng ganw bini lokmani,
Bini bwsago wakur duk khaui
Rohor di bono saka yakarwi.
Imang nukmani kubuino wng kha,
Aisrisri muphuksa man kha.
Warukni dwkhwi muphukno khaui,
Borog rohor kha saka yakarwi.
Muphuksa thango saka kasaui,
Twrwk twrwk khai hapung makhogwi.
Warukni dwkhwi khaui rohorma
Sotonwi choya joboi kwrakma.
Rai kwchak aro thingkoloi thang kha,
Bini uklok jotono phai kha.
Abo hai khwlai ha Sikam kaui,
Borog thang lai kha chakhwla twiwi.
Hor kuthuk jora borog sogwi kha,
Sikamrok Chuwak phek laiwi tong kha.
Kuchuk Ha Sikam kabaima jora,
Aichuk kwrabo wngmani jorao,
Bubagwrani birindiyarok,
Sikamrokno mechen kha borog.
THANANGCHI CHOBA || Andrew Debbarma
