Buluwa – Cherai kaham
Kosomti – Buluwani buma
Tokhirai – Buluwani bupha
Nangswrai – Tokhiraini kamini buphayung
Koiti – Nangswraini hik
Kungpher – Nangswraini bwsala
Topthai – Kungpherni kamini bwta tei bayap
Arang – Kungpherni kiching
Sengkari – Ochai
Selersa – Chuwak kephek
Sompwrai londa – Saknainai
TONGKHOR
NUKSA::
(Phung aisirisiri Kosomti hatinao achugwi khangaro yak sungwi wansugwi tongo. Bumano ahaikhe wansugwi tongmano nugwi Buluwa bumani ganao achuk phaio.)
Buluwa– Ama, ama. Tamo aswk mogwi tongkhasa?
Kosomti– Nwphaba borobo kwmaui tongwikha. Hornwi wngkha nogo sokphaiya. Kokkhokbo kwrwi. Bisi kwtalni muihan chana muchungo hinwi painani thangmale mungsaswkda wngwi tongwikha sidu!
Buluwa– Sokphainola ama. Babuba tamo wngna tong. Ta wananaba.
Kosomti– Do akon, himdi mai chalaigwna.
(Mai chana bagwi bwchalaio.)
*****
NUKNWI::
(Sanja maksa-maksi. Buluwa teni salo amjokmung tongo hinwi khawarwi rwng swrwngwi swiwi tongo. A joraono Tokhirai sola bukcha chuwak kephek didak-midak khwlaiwi nogo phaio.)
Tokhirai– Ani mungno Tokhirai, bui ano jotono hino ang borok swrai swrai. Doga phiyokdi. Oi… Kosomti. Doga phiyokdi. Doga, doga.
Kosomti– Akon, khorang ta tordi. Cheraini khwna amjokmung tongo.
(Kosomti kok satwtwi twrwkkhe doga phiyokna naio. Doga kahamkhai phiyogwi manswlapya sinino doga kakhagwi Tokhirai nogo habo.)
Tokhirai– Bobotwi amjokmung abo? Kok sidano saui manyajat. Oro kebo porina nangya. Nongkhorbaidi, o nukhungni jotono nongkhorbaidi. Mai magwna magwna cha-chaui tei samung kwrwijak. Khwlainaphurukhai ang simi. Chanaphurukhai pal pal oribak phengkwlaiwi chalaibwla. Porio hinwi sapung hopung tongmani swlai ani logi buphang rana swrwngkhai rang kichale ajimankhamun.
(Tokhirai bwsala Buluwa rwng swrwngwi tongmani bijaprokno segwi khitarwi rohoro. Buluwabo jolijagwi kha khamwi saichung saichung kok saui kabwi nokni nongkhorwi thango.)
Buluwa– Ang o nukhungo tei tose tongliyata. Tonglaidi norok kahamkhai hik-sai. Hiknisi chaya hikni. Hamjagwi kaijakma sidano kahamkhe naiwi kaijagwi manya. Bwsai aswk koborbai bahaikhese kaijagwi phaikha.
Kosomti– Iko, o cheraino kaprise rohorsukha niyada. Amjokmung burum burumno ahaimang khwlaio. Nokha saka tongnaisaba bwtwi kwpalba swiwi rohorkha sidu. Borokrokni sago kwlaiya kwlaiya yongsa-kuksarokni sago sidano ani o kwpal ta kwlaijathun. (Kosomti kabo)
Tokhirai– Nongkhordi, thangdi nwngbo nongkhordi.
Kosomti– Au, ang kwrwikhai nwng hamjakbele! Salsaswk o hano yakarwi thangano. Aphuru nini tongthai tode tongno nugano. Ani sajwla khoroksani bagwise ang tongwi tongjao. Haiyakhe bokilino ang mwtai chaui paikhamun.
(Kosomti kaptwtwi nokni nongkhorwi thango.)
*****
NUKTHAM::
(Dibor khiring khiring. Kosomti noksar phartwtwi saichung saichungno tamobo hunu hunu kok saui tongo.)
Kosomti– O cheraini amjokmungba tamobo wngno sidu! Miyabo maporiliya. Mwtai eba kaitorni hamaribai kahamno wngjathun.
(Nangswrai Tokhiraino ringtwtwi borokni nogo phaio.)
Nangswrai– Ata nogoda tong? Oi… ata.
Kosomti– Sabo wngkha?
Nangswrai– Angse bachwi. Atakhai bwchayakhuda?
Kosomti– Nini ataba buini swlai tongbaiya. Miya hopung made mathusiba. Aitwtwiose bo muktwrwi thangwi chwng mahapsio. Hornwi wngkha nokni kwmajak. Miya horose nogo sokphaibwla.
(Kosomti kok satwtwi noksarono Nangswraino achukna khampwlai riui rio. Nangswrai achuktwtwi bini o kokno yachago.)
Nangswrai– Au bachwi, chwngbaino. Bisi kwtalniba kicha tongthoklaino hinwi bachwi Khinoktini nogo chuwak nwngtwtwi tas thwnglaimani. Thwnglaite thwnglaite buphurubo jani hornwi wngwi thangkha khase sirwkliya. Atabo puila bwkhakle manwi tongmase. Ulokhai bo mwtai hamyabai kolopjagwi waisa phano manliya.
Kosomti– Sabokhai mankhasa?
Nangswrai– Khinoktini bwsaimang mankhata. Tei sabo manna tong? Ang tei borokni nogokhai thwngliya bachwi. Jephuru phano bomang mano. Bihikbo chuwak phalwi rang ajio, bwsaibo tas thwngwi rang narwgo.
Kosomti– Au, norokni omotwi kokno khwnana akaisukkha. Tei salnwi saltham hinkhaino mwkhangse lupa lupa aro nugwi sugano. Haiyakhe tini sarigoda nukna tong.
Nangswrai– Nukya bachwi. Angkhaiba koborda! Akon atase tabuk bwde bwchano? Ang swkango bo rang riyajat tir thwngwi tonimani rangse naharna phaio. Miyao tini phaidi hinwi saui kabuo hinkhaiba.
(Kosomti noksar pharbaiwi noksi beraui Nangswraibai nahalalaikhe haono achugo.)
Kosomti– Tirni rang! Bini thani rangda tong hinba. Bisi kwtalni salose rang khoksa phano kwrwi wngwi togwla maknwi phalwi hatini muihan kicha tubudi tei cheraini bijabo kangsa paiwi tubudi hinwi togwla maknwi kotor kotor naiwi rohormani. Abose rang paisugwi sola bukcha sokphaio. Bo tei boroni rang manwi rohorna hinsa. Nukhungni manwibo paisugwi phalbaikha. Rangle bwswk manthaiba?
Nangswrai– Chisaise bachwi.
Kosomti– Chisai! Bini achaimanise waisabai aswk rang matangyakhuna. Anose kobor khwlaiwi butharna naisio. O kwpal… kwpal.
(Buluwa amjokmung paiwi nogo sokphaio. Bumasong phataro kok salaiwi tongmano nugwi bumani ganao achugo.)
Buluwa– Ama, ama. Himwi phaimani lengsukkha. Do twi kicha nahargadi.
Kosomti– O rangchak, lengnani kokno. Buihai malkhung kwsaui phainani hinbo rangbo kwrwi. Amjokmungkhai bahai wngkhasa?
Buluwa– Kahamno wngkha ama.
Kosomti– Akon lenglagadi hinkhe. Ang twi nahargwna.
(Kosomti nogo habwi thango. Buluwabai Nangswrai kok sanani chengo.)
Nangswrai– Bo remo sogwikhasa?
Buluwa– Rwngremchinwiose kaka.
Nangswrai– O sokkhabwlasa. Hinkhaiba tei porinase nangliya. Phaidi hinkhai angbai baksa tir mwthwnglaino. Chini nokni nini atakhai remchi jora poriui porinase soiliya. Angbai baksa tir mwthwngwi rang mano hinkhai. Bini rangbaino bike khungsa paise kipkha. Tabukkhai malkhung paina hinwi tongo.
(Buluwa mwnwisurusuru khwlaiwi Nangswraini kokno yachago.)
Buluwa– Ang abotwi sikokni samung tangya kaka.
(Nangswrai atomsa mwkhang somsaui thango.)
Nangswrai– Abo tamo hinma kok? Bahaikhe sikok wngkhasa?
Buluwa– Norokni o tirno sikok hinyakhai tei bobono hinnai kaka. Norokni obokhaiba yakbai khokya khabai khokkhata. Rang khoksanise nangkhakhe khokcharchi mano hinkhai.
Nangswrai– Obona ahaino tongma swlai selero hinwi tongthokna bagwi thwnglaima-mwthwnglaima kokse. Tamoni sikok wngna tong. Tir mwthwngnairokba tamo thwngnairokno buwi togwida rang segwi nahar?
Buluwa– Tabukni salo jesa samungno phano khwlainani bunani toknani nangya kaka. Aswkno selero hinwi thwnglaikhe phaidi angbo mwthwngano rang khoksani nangkhakhe khoksano mannaijat. Phunangwi mankhakheba sakni rangba rang mannai, phunang manliyakheba a rang ang mansinai. Selero hinwi tongthokna bagwise thwnglaio hinkhaiba ani omobo thwngnai tongano hinwi ang kha kaota.
Nangswrai– Abo tamo hinma kok? Biyangni biyang kok saui tong. Bui aswk tir thwnglaiwi nok kotor kotor kaham kaham tangwi tongmarokkhai nwng nukyada?
Buluwa– Tir thwngnairok khorok bwswk nok kotor kaham tangkha nukkhabwla! Khoroksa khoroksakhe naiwino saui ribai mannano. Phiya tir mwthwngnairokle bebakno nok kaham kaham tangbaikha.
Nangswrai– Cherairokbai kok sauiba hadwlwise machasibwla.
Buluwa– Ta jolidi kaka. Ani nukmale ahaise hinkhaiba. Baksa baksa tir thwnglaiwi nok-hukni mairang-luta kwmabaikha. Baksaba phalnok kwmaui gwnang tongmanino bigwra khaka. Aborokno naitugwi sanakhai sase sabaigwlak.
Nangswrai– Au, nuganobwla. Sabo sabono samung nang? Oro phaiwi osoise wngsibwla. Tongsithu, ulo rang naharsiwano. Thangmani chao.
(Khorang kisisa chikonsakhe saui Nangswrai jolijagwi Tokhiraisongni noksarni bwchaui thango.)
Buluwa– Samung joto borokno jotonono nango. Sak saichung o ha sakao kebo tongwi manya. Haiphano sitwtwile hamya samungo ang yapiri barokya. O amaba twi naharna thangma tamoswk lerkha hino. Ama…
(Buluwa bumano ringwi nok bisingo habwi thango.)
*****
NUKBRWI::
(Atomsa thuyamo rokotwtwi tamobo wngjagwi Kungpher saichung saichungno barsatwrwngwi yak yakungrok koiri-moiri wngjago. Abono nugwi buma Koiti bwsalani sakno mihimwi kapmani thakna siliya. Bupha Nangswraibo pala manjakya wngwi kaptwtwi bwsalani sakno simino mihimwi tongjasio. Logio Kungpherni sakchalai Topthaibo khoroksa tongo.)
Koiti– O babubwsa nwngba tangwi ahai wngmani kwlaikha! Babu… o ani Babu. Bo mwtai hamyani mokolo kena nangwiba nwng tini hai wngnani nangkha. Bwchadi Babu, do bwchadi.
Nangswrai– Babulu… o babulu. Nwma nini sak hamwi phaimano nainani muchungjago. Nono twiwise chini bebak imang. Nwng kwrwikhai chini langmabo kwrwibai baksa. Hamsidi, do hamjasidi.
Koiti– Haikhe tei tonglaiwi wnglaigwlakkha. Do nwng phano borok nahar phaigadi. Phunukyaui tei hamgwlakkha. (Bwsaino sao)
Nangswrai– Au, do akon tongsukgadi. Nini yongbwrwinobo naikolwi tonnigadi do yongbwsa.
(Nangswrai bwchatwtwi hikno samani yagulo Topthaino sao. Koiti bai Nangswraino lengtwi lengtwikhai kaplaiwi tongmani nugwi Topthai bono thangmani chawano hinwi wansugo.)
Topthai– Nwng tongdi yong. Ang naisiwano.
Nangswrai– Do akon hinkhai nwng phano thangadi.
Topthai– Au yong.
(Nangswrai teisa bwsalani ganao achugo. Topthai ochai nainani bagwi dodoro khapurumwi thango.)
Koiti– O sajwla hamjasidi, o sajwla. Nini babuno naisigwi naila do. Bwswkse nakhwrai kariui nini hammungno naisingwi tongja. O sajwla… o sajwla.
(Kungpher siringsa wngwi thango. Yak yakung lilaksa phano wngliya. Mokol simi philik philik. Abono nugwi Koiti teibo kwbak khorobwi kabo.)
Koiti– O sajwla… tabukle tei kwrwikha. Saboni swraimung nangwiba nini kwpalba hai wngkha. O sajwla…
(Topthai ochai Sengkarino tubuwi Nangswraisongni nogo dolaiwi happhailaio.)
Topthai– Tamo wngkha yongbwrwi? Tamo wngkha?
Koiti– Nini mwnai tabukle tei o ha sakasi kwrwikhana. Lilaksa phano wngliya. O sajwla… o rangchak, o kormo. Bwchadi, bwchasidi.
Topthai– Akon ochai sokphaikha yongbwrwi. Disa naiwi naigadi. Mungsa wngya niyada. Dabura ochai, do dakti daktise disa naigadi. Mungsaswkda wngwi tongkha?
Ochai– Twirok tubudi.
(Nangswrai dodoro dodoro khwlaiwi twi lutasa tei tulsi bosok soksa kholwi tubuo.)
Nangswrai– Tabukle nwngno sisinai yongchwla. Kicha kahamkhai naiwi naigadi.
Ochai– Ta wananaba. Nini yongchwlase tongble.
(Ochai twio tulsi bosok khichonwi komthai sao.)
Ochai– Aha… yi…… Kungpherni sago hamya sitwra kubulwi tongkhe…… do…
(Ochai tulsi bwlai naiwi sao.)
Ochai– Oma! Omoba belai angkwrasebwla. Yakarnase gosithaya.
Koiti– Tamo! Bobohai yongchwla?
Ochai– Kokoita kokoi. Tei tamo wngna tong. Waksa masasi sanwi tongbwla. Abobo horo phano nogose chana gosithaya. Bolongoyakhai chase chayaphun. Chakwrakyada lachijaknata.
Nangswrai– Wak-tok jesabai phano hamkhaise wngo yongchwla.
(Kungpher lengmani sichaui muktwi roi roi khwlaiwi khorang serek serekkhai kok sao.)
Kungpher– Ama, ang tei banchigwlakkha. Ani sakrok bebak kwthwihaise wngwi thangbaisio. Yak-yakungrok samungse khailiya.
(Koiti khorok mihimwi bwsalani khorang yachago.)
Koiti– Babulu nwng tei mungsa wngliya. Ta wanasidi. Nini dabura ochai phaikha niyada. Tabukno hamwi agini haino hai wngwi thangano.
Ochai– Ikola kokse manwi tongkha. Ang sayada kokoi nango hinwi. Rina gosikhaiba yakar rikhata.
Nangswrai– Au abotwino wngkhana yongchwla. Thaisingo lik lik sichayahaise wngwi tongmani. Tabukse sichasio. Chini bagwile nwngse mwtai. Nwngno bebak saui mansinai yongchwla.
Ochai– Ang tongsak ta wanadi ayungchwla. Ang thangsiwano. Mungsaswk wngkhai sahordi.
Nangswrai– Au akon. Nogo hatirok tisabaikhai nono sahorrano yongchwla do.
Ochai– Au, au. (Bwchao)
Nangswrai– Nini daburano thangdi tunui rigadi yongbwsa.
Topthai– Au, yong.
(Ochaini utung utung Topthai himwi thango. Koiti bai Nangswrai bwsalani ganaono achuklaiwi tonglaijao.)
*****
NUKBA::
(Koiti asamparwi duma nwngtwtwi mogwi bwsalabai kok salaiwi tonglaio.)
Koiti– Babulu nini sakrok tabuk teisa hode holikha?
Kungpher– Holiya ama. Tabukkhai teibo barimahaise wngwi tongsio.
Koiti– O sajwla nwngba tamo wngjakha? Mwtaibo jotono ribaikha. Wak, tok, pun nokni joto manwino paisugwi chabode teibo chanani muchungjakkhu sidu. Nono karwi ano phano khwlaikhe chakhamun. O swkalba tamoni aswk kena nangkha sidu.
Kungpher– Ama, ang tei banchiliya. Ang thwiwi thangbo norok babubai kahamkhai tonglaidi. Tamo jani ang tei banchiliyahaise matongsio.
Koiti– Thu thu, akabika! Tamo kokrok saui tong abo. Sak haya kwlaikheda thwiwi thangba. Buikheba sak haya wngyada. (Muktwini khorangbai yachago)
(Arang botoijwk Koitino nuhuntwtwi borokni nogo phaio.)
Arang– Toi nogoda tong? O toi…
Koiti– Nogono, achuk phaidi babu.
(Khampulaio achuktwtwi Arang kok sao.)
Arang– Kichingni sakrok tabukkhai bahai wngkhasa?
Koiti– Tei tamo wngna tong. Taltham kakha. Iko atwino atwita. Waisa hamo, waisa bario. Tinikhai barijakse tongsukha. Kahamkhai hase hamsukliyabwla babu. Mwtaibo paisugwi rikha. Nokni malmatabo mungsa phano kwrwikha. Tamo khwlainai chabwise manliya.
Arang– Boro abo mwtairok rimabai hamwi tongna toi. Soitanse kolobwi thwngwi tongkhana. Gormai kamio phola kwthar khoroksa tongo. Bobai surijakkhaino hamwi thangano kiching. Bui kwbangma aro thangwi hamwi tongbaikhabwla.
Koiti– Kubuidiba babu? Hinkhai tinikhai tini phanose twlangwi nairinani.
Arang– Au, kubuino toi. Kichingno haya kwlaima balukkha hinwi khwnauino aro waisa naijagwi naithun hinwi angbo sana phaimani.
Koiti– Chasukkha babu. Norokhai kiching kamaini phanbaino o hayung mwchangwi tongjao. Himdi hinkhai tabukno thangwi tinino suriui nailaiyano. Nini muwabo hatio thango. Bonokhai aroni simino twlangwi thangsiwano.
Arang– Himdi akon.
Koiti– Nini kichingno kicha romgadi.
Arang– Au, toi.
(Kungpher siring siringkhe rokoui tongmano buma Koiti bai Arang kwnwikhai romlaiwi bwchario.)
*****
NUKDOK::
(Kungpherni lakma thakcho thakcho. Bono kitingwi buma, bupha tei Kosomtikhe khoroktham khwlaiwi kokthai khollaiwi kaplaiwi tonglaijao.)
Nangswrai– O rangchak! Nwngba tangwi ahai wngjakha? O mwtai, o kaitor kicha naikhwlaijabasidi. Kubui kubuino tongo hinkhai hamriui rijadi.
Koiti– Do jesa phano jeba mungsa khwlaigadi babulupha. Haikhele tonglai chalailiya.
Kosomti– Au, haiyakhai hamgwlakkha.
Nangswrai– Tai tamosi khwlaisinani. Mwtai nango hinwibo mwtai paisugwi rikha. Soitan kolobo hinwibo paigugwi surikha. Yaphani rang aro waisa uro waisa thangmang thangmang paisugwi tabukle nokthai simise tongsio. Tabuk tei tamosi khwlaina wngkha!
(Buluwa dophwra-kaphwra khwlaiwi happhaio.)
Buluwa– Tamo kaki da Kungpher haya bari tongkha hinbwla?
Koiti– Au tasasidi, iko phungni simi lik lik kokkuk manya dibor wngkha. Tabukbose haino hai. Mokol simino gwlang gwlang. Tamosi khwlaina wngkha?
Buluwa– Sakham nokrogokhe twde twlangkha?
Koiti– Twlangyakhu babu. Ochai bai phola kwtharni nogo thangmang yaphao rang khoksa phano kwrwikha. Hade hamno, hade hamno hinwi naisingmang talsni kakha.
(Buluwa Kungpherni gana achugo.)
Buluwa– Himdi hinkhai sakham nogo twlangwi naiyano. Haikhe achugwi tonglaiwiba bahaikhe hamna. Sakni hayanoba boro mwtai rimabai simi, surimabai simi hamnai. Sakhamnogobo phunukna nango.
Nangswrai– Abotwi hinwino nini kakino sase sakha ang. Sakham nogo twlangna hinwi. Nini kakise twlangna soiya. Tabukkhai boroni rangbaise twlangkha?
Buluwa– Hayabo wngma balukkha. Rang kwrwirok wngwi tongano hinwino ani rang khatiui tonima nwisai tubuwi phaimani. Himdi abobai phano swkang phunuk naigwna kaka. Ulni ul wngano.
Nangswrai– Au, do akon babu.
(Nangswrai khapurumwi nokni phataro thangwi wao ritwrak khajak tubuwi phaio. Khorokbrwikhai Kungpherno romlaiwi ritwrago mokholo. Chwla bai chwla khorogo babaisa. Bwrwirokkhai yagwra khoroksa, yaksi khoroksa khwlaiwi ritwrak romlaiwi lam rilaio. Lam rilaite rilaite hapung kao ongkhoro. Satung watwi manjago. Himmang himmang harpekni lamao sokphailaio.)
Kosomti– Kahamkhai naiwi himdi rangchak. Lamabo hamya harpekmamang kwlaino.
Buluwa– Au ama.
Kosomti– Agulirogokhaiba lamani sakasi lama. Chini orokhaiba malkhung khungsa chakdrop phanose lama kwrwi. Bwtwi talikhaba sanwi tububaikha sidu kami amchaini borokrokba?
Nangswrai– Sana hamya bachwi. O kokrokno sakhai, sanai borokse chaya wngnai. Mannaphurukhai khulumsa khulumsa. Manbaikhai muituno kwrwi.
Kosomti– Au kwi, nangmani kok sakha. Ulokhaiba rinai borokno sininaino kwrwi. Chariui mannai, khaniui mannai Bose swkang wngnai.
Nangswrai– Tai tamo khwlainaba? Omohaise hani raida hinkhaiba.
(Himwi thanglaimang thanglaimang sogwitwi sogwitwi. Atomsa Kungpher haya bariui kaphwramahai wngo. Abono nugwi buma kapnani chengo.)
Koiti– O kormo, o kormo. Hamjabasidi, hamjabasidi.
Buluwa– Ta kapdi kaki. Iko malkhung kasanani thai sokphaina naikha niyada. Dakti dakti malkhung kaui sakham nogo sogwiwi phunukkhaino hamwi thangano.
(Jotono dolaiwi himlaio.)
*****
NUKSNI::
(Sanja jora. Tokhirai chuwak kephek mairang-luta, chekhuk, takhuk nokni manwi paisugwi nokhwkao khitarwi yago daborok twiwi nokhwla ongkhorwi kutugwi tongo.)
Tokhirai– Nogo simi phaigathun o philiktino. Tanwi khibinani. O bwsalabo bumanono solkha. Khoroksano phano tei nogo tosi toniliya. Phasimi phaigathun… phasimi phaigathun. (Wamachoromo)
(Kosomti bai Buluwa nokhwlao sokphailaio.)
Tokhirai– Ikola sokphaikha. Nono tei butharyasak phiyokliya… phiyokliya.
Boro aswk thangwi tongwi? Ang sapungni mai machaya wngwi tongma nwng sida si?
Kosomti– Akon nwngba tangwi hai wngjakha hino rangchak. Mai-muiba songwi kwlangjakno tongble. Chwngba kui Nangswraini bwsala haya barisugwi thwitwi thwitwi wngwi tongo hinwise sakham nogo twlangwi thanglaimani. Borokni logibo tei kebo kwrwi hinkhai.
Tokhirai– Twima barnani bagwi yakhwrai kwrwiphuru simi rungno samung nangjaklaio. Yakhwrai manwi paikhe sabono muitu khwlainai tong. Nwng sida si?
Kosomti– Si hinwle borok kahamnoba bahaikhe haino thwimano nairugwi rohorwi manna hino. Himdi babu.
Tokhirai– Tamo? Kok phirok phirogwida teisa nogo hapna naiwi tong. Nono tei phiyokliya. Tanwise khibisinani, tanwi.
(Tokhirai bihik kosomtini khwnai romwi totwra da bogwi tonio. Abono nugwi Buluwa tongwi manjakya wngwi buphani yakni da segwi dagarwi rohoro.)
Buluwa– Mapha hamyakhe sa birman mano. Sa hamyakhe Mapha birman mano. Babiknwino hamkhakhese nukhung hamsaui mano.Salburum burum omohaikhaimang walailaina-bulailaina bagwida norok kaijaklai? Hikno hik. Omoswk koborbaiba bahaikhese nukhung khaui tongkha? Chwla phekpwlai tei thwngpwlaibai kaijakkhai nukhung hamsaui manya. Bwrwi sipwlai tei risi gwnangbai kaijakkhai nukhung tongkwchang wngya. Aboswkboda siya?
(Buluwa kabwi kutuktwtwi nokhwlani nongkhorwi thango. Bumabo kaptwtwi kok saui bini utung utung thango.)
Kosomti– Thapwlachalangnaisa, nini nogo nwng saichungno tongdi. Chwng tei tosi tongliya. Nugano nini goronno.
(Kosomti bai Buluwa nongkhorwi thanglaio. Tokhiraikhai arono chuwak kephek didak-midak khwlaiwi tongwi tongo.)
*****
…..Nukchar bai Nukchuku(Paithak) nainani bagwi bijap ongkhorphuru haiyakheba thungnuk mwsajakphuru nainani bagwi jotonono koijao.
