Nokha pilalao chumui kobonsajak
Tal pirsajak mwnakser mwnaksero
Khumjarni bahai motomwi
Kwtal sal tubuna hinwi
Swngjagu buphuru tubunai?
Hordibor baikhwlai dorobo
Toksarogni khorang chiruk charak
Punglaima khorang khwnawi
khapangbai yakhwrai swnamna chengo.
Aichuk aipwram pwramo tukuwi
Kwtal sal tubuna hinwi
Baksaba Rwngni mwtaino suriwi
Kwtal lamao sal tubuna hinwi thanglaio.
Nuwai nwng kubui kubuide
Nini bwkwrang chwngno riya
Waisaswk birsana muchungo
Nuwaini bwkwrang manano khataungwi
Yak raplaiwi hoda hukumuni kok nasingo
Swkango himna bagwi.
Aikheno taiwaisa kwtal salno
Nasinglai khulumlaijao
Hoda hukumuni kokno
Kwtal salbai swkango twlangna hinwi
Buphuru mansinai kwtal sal
Nasingwi tongkha tabuk kwtal salno.
