Lama le Bere-bethep,bere-thep
Kha bisingo kokthai kupulung
Sanani khorang pasaya ani
Buba hai bachajak thulung -thulung.
Tei busuk chalkho,busukba tongkha?
Imangni lam kolokma,
Bikwrang gwnang birwi mankhe
Thangwi naikhamun busuk chal?
Aitorma hai chwngsana muchungo
Salkani sal kasatwi kana muchungo
Khorang kokoi phano rwchapna muchungo
Rwchapbuibo naio waisa,wuisu.
Yapri dedak-badak,dedak-badakkhe
Thinangni lam kolokmano himganw
Mwnakno mechenwide,pohor tubu mano?
Yapri sewi tongo dedak-badakhe.
Yak toloi logi tuina kwrwi
Kebo khorang rwnai kwrwi
Yongdulma hai koine-ne khe
Buphung hai thulung-thulung bachajak.
Imang kupulung khao chobwi
Thanangni kokno wansogwi,wanawi
Yapri senani lam kaham naitugwi
Angle tongjao jora kahamno naisingwi.
Thai:- Kormo Twisa,Longtharai Valley,Dhalai Tripura
