Puito bwkhao kwthangno tong kho
Saichungno tabuk ang kok sao;
Swng ya ang kebono kok thaisa phano.
Ang sio—
Tabuk ang bachajak langmani rukungo;
Sal, tal, athukiri ano nuhurwi tongo,
Borogno tabuk ani kichingsong.
Waisa uisu ang bonboniya thwngo
Toksa-toktwi, buphang-uaphang bai kok saui,
Phiya ang swngya kebono
Bwkhao mithikma kok thaisano;
Hama kolok rohorwi khano methebo,
Saichungno langmani bwkwrang subwi birsana naio.
Kwtwi, kwkha, mecher monogo ang—
Tabuk okno bandina swrwng kha;
Satung, watwino kiching swnamwi
Baithangno puitu chakha.
Kebo kwrwi tabuk ano kebengnai,
Kwrwi ano tatal kok sanai;
Tongo ang saichung langmani rukungo.
Sakni sampilino simi ang nugo,
Phiya yaksi yagwra mwnak;
Kwrwi ani kebono puito chanani
Tei khao busu yornaibo kwrwi!
Hor kolok ani maisingni sal hai,
Khani wansukma kuplung bai
Lamsogo phung kwchang;
Phung aima kha sirwk ya swrapsa hai se khao.
Jora ano ringhoro bini yaprino rwktharwi himnani;
Maising, sachwlang laima kha siya
Tabuk ani thani muplik kaisa hai.
Ang sio—
Yak bukcha nogwrai wngwi o hayungo phaimaba
Saichungno kiphilna nangnai.
Saichung ~ Andrew Debbarma
