Tamono naharwi swinai ang tini?
Hapung-hathairok rampralaijak
Twisa-twikhreng ransalaijak
Bolong kwkhrang moksalaijak
Tamono naharwi swisinai tini
Kokthairok bebak kwmajak ani.
Tamono lobwi swinai ang tini?
Khumulwng naikhe hoiprelaijak
Nokhani sal-tal pohor kwmajak
Boyar kwchango naislema sipjak
Tamono lobwi swisinai ang tini
Kokthairok bebak kwmajak ani.
Tamo muito khlai swinai ang tini?
Hukni gairingrok nobarbai baijak
Maichu mai motom bahai kwmajak
Gati holongthai pirima khajak
Tamono muito khlai swisinai ang tini
Bakuma perjak mukumurok ani.
Sabono khatungwi swinai ang tini
Khachukno naikhe nakhwrai karijak
Bayapno naikhe khaichorma bangjak
Takhuk-bukhukrok baithang nailaijak
Sabono khatangwi swisinai ang tini
Kokthairok bebak kwmajak ani.
