Ha yaphang khui nokhao
Chumui hadwlwi bukung thapjagwibo,
Mayungni sago chor nugui mokol toktwiswk
Horjwlai muthungna nangbo!
Twiyung kwcharni longoiduk kophono romrereba,
Bwlaio simi hupreo yasi.
Yakwlam lahan dalam choroijak twi,
Himani yapiri mari sijakya;
Yaphao simuk tongthai manliya!
Phikwlai-philsa salbwswk jora yaphar
Bisi bwswk utun utun…
Salsa aswkhai selenai aswkhai selenai!
Aswk bedek beredom kwbang o hayungo habanok,
Kobonu jorao kok saui;
Jorao siring siring himwi
Nokni simi lampwra malaiwi-
Hati basui habanok kathoroi
Swrwngmani simi phwrwngnai jora
Thwima tei thangma kwcharni kolomtwio
Sakphangni mungno sakno swina selenai!
Aphuruno swibwlai paisukriui swrwngmani
Muitu manwi waririk wngnai.
Bini turo kapmung bai mwnwimungni surani!
Phiya yasi depjakno sepengwi mwnwimungno nango.
Signature – Dipra Kishor Debbarma
