Sukhomoi !
Sukhomoi!
Bikromjoi! Bikromjoi!
Kaisa kaisa milstone norok
Jorani holongo swiwi kwlagnkha
Jani jani bumung.
Holong kosom bai thuklupjak tongo
Norok bwchaphaimani, himmani
Tei kiphil thahngbaimani kothomarok,
Boro boro khoroksa khoroknwi cherai bokphaio
Barsa barnwi khum bubar
O khum kherembar eba dukmali eba langmaku
Eba sampari phano wngmano,
Barsa barsa khumbubar bohrokni mutituni
Kolsa kolsa aitorma.
O salo thahngwi tongmani riksa kawi
Kichingni nogo,
Ani lama swkang thahngkha yong chwlani nok sederwi
Ani babainwi mwkhng tei mwkhang, emang, muitu
Kwkhrang tei kormo bwlaihni kuthumlaimung
Korai yakrai khorang eba mokol nukya himnairokni
lathani thok thok khorang,
Thahngte thahngte uansugo gila kok
Sarikni twilwlw satungo lamarok
Ano naharlai tongo lob lob.
Nugo yong chwla
Khorogo tungsa tungnwi bwkhanai kuphur
Yacheremwi tonglaikha,
Bangrani babainwi chamwi phaijak jorani yathek
Hilik wngwi berajak,
Bisma kisa bomjak
Khum bario twi luwi tongo
Bini yakni twi soi jila kwlaiya
Mwtang bini mokolo bothop thumkha ab,
Bwchang jora sairikni satung twilwlw
Thwnglai tongo bini nokhlao
Mirik cherai bodol hai
Lelamani jora!
Nokhlao tebil khungsa
Sakao kwchak pali bwklapni laihsi(bijab) kangsa
Kuna babaisa chonchuma yaskur muphaijak
Ani riksani bel pungo kring! kring!
Gana gini malkhungni horn chirigo khorang khoka
Baithang simani skwang ang kucugo khong! Khong!
Yong chwla kisa mwkhang tisawi naharo
Siya boba siyaride nuk eba ani mwkhang
Sawi manya boba korowi phano uade uansuk
Sukhomoi, bikromjoi rupini songni kokrok.
Huk, damra, nokhai, gairing yakarna dagiwi
Biyang bengwi twlangna muchungjakmani
Muya phainairokno,
Angto nugo yong chwla
Yakhilik twi sakao kwsana thahngwi
Tola baimang ongkhorwrwk
Mwnak koboljak hakor bwkhak
Tei bini khaklabni kongsa kongsa bekereng
Kogwi kwlai tongrugo bo yapiri semani lamani uklogo.
Yong chwla nono chwng borom rio kubuinw
Phiya jephuru paimari kwrwi lelamungni bising
Nwng sakbaithangno tharanw siringmungni thani
Bwswk jora kwthar tongo nini phola
Nini nok huk eba nini yakni sakbolai kwchak palini bana.
Sukhomoi ! Sukhomoi!
Bikramjoi! Bikormjoi!
Bumung khuo twihuk
Raisoklwngni rwchabmugno hamjaknai
Rai yrungni puitu no kha phurjaknai,
Longtorai, sakantang, subraikhung, dungur
Jampwi, khumpwi bubar, dongoini gairing
Jotonw yachaklaio o bumungrokno
Yachago, teibo phuaro, errio, piro joto babai
Supung rio nokha, panther, hauar, hathaih, haping, huk.
Angbo khwnao
Khwnao chethuang bolong, hakchalni tailam
Yachago yamroksa ujoyanta tei udoipurni
Noyungmao achugwi,
Nokhlani bari khumtwisa tei Jabra bobarbo,
Yong chwla nwng yade yachak
Eba kirijago
Phonwi thahnganw nini yakni raidang latha.
NB:I koklob 1988 bisio swijago, i koklob jorani yapiri bai gwdaljak.
