O hachwkni borokrok
Muiya phaiwi chanairok
Wansukde nai norok?
Wani bisingo wathwi-wa raja
Bolongbai kakya
Lukubai phaijakma thakya.
Songcha phaijakhe songnwi bachao
Jotoni okno supungwi tono.
Tini angchaya
Khwna angphaiya
Nuguile nono khasoimaya.
Nukhe ojadu
Langa supung phaio.
Chabaiya bara phwran narwgo.
Bwswkba tongno nini o maya?
Komorde thangno nini o kaya?
Twrwk twrwk walwng tanjakha
Kubun ni bwlwng swnam tisakha.
Rabar, segun, gamaini bwlwng Bangsakha.
Khaswrwk swrwk wathwi wa tini.
Nini buphambai hati chwng chao.
Nini bahanbai nokthai songchao.
Nini bukurbai ari chwng khao.
Salbwswk tongno nini chubama
Paide thangno bkhao kirima!
O hachwk- ha sakao tongnairok
Wansukde nai norok?
Khatiwi tisanani thinangni bagwi
Lamada saikha norok?
Komor thangkhele kiphil manglak
Taile ok supung chawi manglak.
