Rutuk rutuk naio ani khale nono
Nini chwnajak a naithok goronno.
Khumulwngni khumni bubaro
Motom twilwlwk khumni bahaio.
Bongbrai wngwi ang phaio
Rutuknani bagwi ang nono.
Rutuk rutuk naio ani mokol nono
Nini a mwchangjak naithok sakurno.
Borok kwbangma himlaijakni biro,
Hati habao thanglaimani jorao
Usigwi rutugo uklok bwskang nono
Made malaino khao chongwi nono.
Rutuk rutuk naio ani mangle nono
Nini mwnwijak naithok mwkhangno
Uarik uarik khe mwnwi phunugwi
Twlangmani khogwi ani khano
Manyasak rutugwi naianw ang
Khogwi tlangnai a khani borokno.
Rutuk rutuk naio nono talni pohoro
Talni pohor hai a naithok kwchwngno,
Tal nukskangni horo athukirirokni bodolo
Dubui dubui kobonjak chumuini bwlwngo
Haiphano manliya rutugwi ang nono
Tal, athukirirokni bisingo nini goronno.
Rutuk rutuk naio nono horni imango
Aswk imang nukmaobo nwng kwrwi aro,
Haiphano rutuk naio rutuk manya phano
Tamni hwnkhe ani khale nono mang sano,
Jeswk hakchalo nwng tongwi phano
Rutukma thakya angle nono
Rutugwi tubunai salsaya salsa nono.
