Swngcharkwrwngui naharui naimani,
Nairwrwk nugrwrwk wanama phaikha ang!
Tamo ungma kwlaikha
Chini dophani thinang!!
Termanya mungsa tongthoklaijak mang!
Chakhwi songna rwngya swrwnglaimang,
Thapla deh ungsinai chwng!
Thabolong chokthani yak kepleui,
Yakung deh chosinai chwng!
Tisumu kosom bai chuwan kuphur,
Halok borogni kwcham ,
Pherlaima siniya chwng!
Bolong daborok bai hokna thangthani,
Chini kwpal birman deh sraisraikhe
Salthwgwi manbusinai chwng!!
Athukiri naisamang naisamang,
Phanrinai salni pohorno deh saknangliya chwng!
Kung kuchuk ungmang ungmang,
Hapong deh chikonjak tonglaisi chwng!
