Siri-sitini simi eba kheba dongoima-dongoipha songni jorani simino tiprasani kailaimung khwlaijagwi phaimani.O ha sakao borok wngwi achai phaikhe jotono kaijakgwi nok-nukhung khwlaina nango abo kaisa swngcharni raidano hinwi mano.kubun bosongni eba kheba dophani kailaimungni raida tongma haino tiprasani kailaimungni raida bo tongo.O kailaimungno wngkha khoroksa chwla bai bwrwini halokno kubui,kwtha,Kwthar tei kwrak khe langma tongsak bwkha manjugwi tongnani lam rio.Swkangni jorao kailaimungni eba kaijakmani raidarok dalbidal tongo.Aborok wngkha khwrwi kaijaklaimani,raibai koksurwi kaijakmani,okwra-chakwra naiwi kailaimani tei chwla-bwrwi hamjakgwi kaijakmani akorog.Swkango kaijakmani raida wngkha kami kuthumwi okwra-chakwra bebakno chokdiri ni nokhao achugwi koklam salaiwi kailaimungni kok cholaio eba thikhwlaio.Aboni ulo kaijaknani swkang hoda-raida rwgwi chongjak chuwak,tei chajaknai-nungjaknai tei kami okwra-chakwra bebakno kobogwi ma tonio. Kaijakmani salo khe Ochai bai komthairok porijakgwi tei chwla bai bwrwino thwiyasakni bagwi sai-hik hinwi kaiwi rijakgo.O jorao okwra-chakwrani kokno karyawi borom riwi kubui Kwthar khe kaijakgwi nok-nukhung khwlaio tei langma tongsakno nukhungo tongthok-chathok khe tongwi tonglaio.Agio Chwla bai bwrwi kaijakna hingkhe swkang nukhungo lampra wathop mwtwino chwla bai bwrwi kwnwi baksa khe khulumwi kaijakna nango.Aboni ulo buma-bupha rokno khulumwi buma-bupha borokno nukhungo kaham kwrwngkhe tongdi hinwi hamari rio.
Tiprsani kailaimungni kokno sana thangkhe sawi paiya.Haiphano mokol baithang bai nugwi phaimani kwcham kailaimungni raida rok tabuk twrwk twrwk khe komorna phaising yapri sejagwi tongmani nugwi mano.Tamoni hinba kwtal kwtal raidarok bai gwdalmani bagwi swkangni kwcham raida rokno twiwi tabuk aswk kaijaknai Kwrwi kha.Tabuk buini dophano swrwngwi se dalbidal rang puisa burung burung swbai kaijaklaio tei yango baithangni kailaimungni raidano khe saktharmani Kwrwi kha.Abohaikhe tongmang tongmang chini tiprasani kwcham kailaimungni raidarok bebakno kwmabaina phaising.Aboni bagwi tabuk bo jora tongkhu o jora tongsani teisa thumwi,chabwi tei samung khwlaiwi tisana nango tei tisaimanya hingkhe kwmai thangnai.Tamoni hima le chini okwra-chakwrarog jotono hano yakarwi tei hukumu-mukumu no yakarwi thangbaikha,tabuk ni tongnairogse teisa kha thangsawi samung tangna nango.Aboni bagwi tabukni Hani sikla-siklirogno kwcham raidarokno tisanani nangnai.Tabuk jora bai baksa chini kwcham laibumano tisawi narwk mankha hinkhe kusung kusung kwthang tongnai tei borok bosong kuchukgo kanai.
*Kailaimungni dalrog:-
Raibai kok surwi kaijakmani.
2)Buma-bupha naiwi kailaimani.
3)chwla-bwrwi hamjakgwi kailaimani.
4)khokgwi eba kharwi kaijakmani.
5)Chamiri thangmani.
Laibumano rwgwi naikhe saimano chamiri thangmani raida daltham tongo.Aborok wngkha:-
1)Chamiri waikhwlai
2) Chamiri Ompa
3)Chami Chamiri Omor .
